เยเลมี 33
33
เฒี้ยว แล์ง ปุน เยลูซาเลม ตุ๊ หลง ฮนั้ง โล์ วั้ว นอ
1เยเลมี หธ่อ หฒุ หววน เจี๊ยน เซี้ยว แกง เญย แปง เญย หลาด กะญั์ว, นิ่น แอ๋ง ตุ๊ ฒิบ เฒี้ยว เญย หว่า ตะเหญ่ย หฑุ่น ก๊อง, 2“เฒี้ยว, ต้ง เหฒย เดา วั้ว เต้า, เซ เฒี้ยว นั้น เดา-เป้ย ต้าย เหว่ย เหลียบ เจี์ย. นิ่น เญย บั๋ว เซ เฒี้ยว, ฮนั้ง น้าย ก๊อง, 3‘กุ๊น โท้ เยีย, เยีย ฯฒฯ เตา เม่ย แอ๋ง เฒาะ ต้ง เม่ย ไม้ ฮิ้ว ตุ๊ โฮล ไห่, เกม เจี๊ยน เญย สี่ ปิ๋ว เม่ง บั๋ว เม่ย.’ 4เหว่ย หฒุ เฒี้ยว, อิสะลาเอน เญย ทิน-ฮู่ง, ฮนั้ง น้าย ก๊อง เถา น้าย นอม ฒี่ง เญย เปย๊า เหธา ยูดา ฮู่ง เญย ติ่น, ต้ง แธะ เหฌี่ย เหว่ย ตั๊ง เจี๊ยน วิน-วั้ง ดุย เนีย ฮลัง เว่ย ฒี่ง เญย ต๋อง เหธา หฑุ ด๊าว. 5เมี่ยน อ๋อย เหธา เคนเดีย เมี่ยน เบ๊าะ จ๋า, เคนเดีย เมี่ยน ฯฒฯ เฒาะ ต้ง เยีย เฉีย เจี์ย, โน์ว เจี๊ยน ไต๋ วั้ว เต๋ย เมี่ยน เญย เซย, ตั๊บ ปวั๊ง วั้ว เต๋ย เปย๊า, เหว่ย หฒุ เยีย เนี้ยว เฮมียน กั้น ปูง, ไม้ หมั่ง น้าย นอม ฒี่ง, หลาย นิ่น บัว โหฒว เญย เหยียด ฒู้ง เอ๊าะ สี่.
6“‘หมั่ง ม่าะ! เยีย ฒู้ง อ๋อย ปุน น้าย นอม ฒี่ง ตุ๊ หฒ่อ หลง. เยีย อ๋อย หฒ่อ นิ่น บัว หลง ต้าย หย่า ปุน นิ่น บัว หฒะเก้ง ปู๋ง-หฒัวะ หย่า ตุ๊ แป้ง ออน เญย เยียม. 7เยีย อ๋อย ปุน หฒุ ธ้าง มี่ง เญย ยูดา เมี่ยน เหธา อิสะลาเอน เมี่ยน ตุ๊ หฑวน ต้าย แอ๋ง เหลียบ นิ่น บัว เจี์ย ฮนั้ง ต้ง ธอ วั้ว นอ. 8เยีย อ๋อย สา เหฑ่ง นิ่น บัว โหฒว ต่อง เยีย เญย เหยียด ฒู้ง ฒุ์ย, เซ โหฒว ต่อง หย่า แหง่ง เยีย เญย เหยียด ฒู้ง ฒุ์ย. 9ลู่ง เดี๊ย หม่าน กั๊วะ เมี่ยน หมวัง ไฮ์ เยีย ฮนั้ง หาย นอ โหฒว หลง ปุน น้าย นอม ฒี่ง เญย เหยียด ฒู้ง สี่, นิ่น บัว ฯฒฯ ปุน เยีย ตุ๊ เม่ง โห่, ตุ๊ เฌียน-โย่ว, ตุ๊ เมี่ยน เธง, หย่า ตุ๊ เมี่ยน ท่าย. วั้ว เต๋ย เมี่ยน ฯฒฯ กั้ม เหฑีย, ซิน หฒิน เหว่ย เยีย ด่ง หน่าย ปุน น้าย นอม ฒี่ง ตุ๊ เหยียด ฒู้ง หลง เญย, ปู๋ง-หฒัวะ เญย เจ๊า.
10“เฒี้ยว ฮนั้ง น้าย ก๊อง, ‘เม่ย บัว ฮนั้ง น้าย ก๊อง เถา น้าย นอม ต๋อง, “เป๋น ป่าย ฮวาง เญย ต๋อง, ไม้ ม่าย เมี่ยน หย่า ไม้ ม่าย แซง-คู้.’ เยียม ยูดา เญย ฒี่ง เหธา เยลูซาเลม เญย จาย-ห่อง ไม้ ม่าย เมี่ยน, ไม้ ม่าย แซง-คู้ เญย ต๋อง, 11มป่า เยียม หน่าย ฒู้ง แอ๋ง ตุ๊ หมวัง ไฮ์ เฌียน-โย่ว, เหน่า หญิด เญย เฉีย, เซียง-ล่าง เซียง-บวั์ง เญย เฉีย, เหธา ป๋าว ฑูง เมี่ยน เญย เฉีย ต๋อย นิ่น บัว ต้อ ฝ่ง ห่อ แล์ง ฒี่ง เญย กะน้าย มี่ง หฒั่ง เฒี้ยว เญย เปย๊า ก๊อง,
“อ๋อย หฒุ แล์ง ฒี่ง เน่น เจี๋ย เญย เฒี้ยว
เหว่ย หฒุ เฒี้ยว เซ หลง ไห่,
เหว่ย หฒุ นิ่น เหยียด ลิ์ว เหฒียบ ฒัวะ เญย ฮนั้ม เมี่ยน.”#1 ฒุ่น ต่อย โต้ว 16:34; 2 ฒุ่น ต่อย โต้ว 5:13; 7:3; เอสะลา 3:11; สีง ฑูง 100:5; 106:1; 107:1; 118:1; 136:1
เหว่ย หฒุ เยีย อ๋อย ปุน เต่ย-ปูง หฑวน ต้าย ตุ๊ หลง ฮนั้ง ต้ง ธอ วั้ว นอ.’ เฒี้ยว ฮนั้ง น้าย ก๊อง.
12“เน่น เจี๋ย เญย เฒี้ยว ฮนั้ง น้าย ก๊อง, ‘เยียม น้าย นอม ป่าย ฮวาง เญย ต๋อง, ต้ง ไม้ ม่าย เมี่ยน, ไม้ ม่าย แซง-คู้ เญย ต๋อง, เยียม น้าย นอม ต๋อง เญย นอมๆ ฒี่ง แอ๋ง อ๋อย ม่าย ปู๋ง ปะกี ยู่ง เญย เมี่ยน เยียม เญย ต๋อง, ปุน นิ่น บัว เญย ปะกี ยู่ง เยียม หน่าย ฮิด ขวน. 13เยียม บง-ไอ๊ ต๋อง เญย ฒี่ง, บง-จั๊วะ#33:13 ฟาน หฒะ ก๊อง เซเฟลา. เญย ฒี่ง, เยียม เนเกบ เญย ฒี่ง, เยียม เบนยามิน เต่ย, เยียม เว่ย ก๋อม เยลูซาเลม เญย ต๋อง, เหธา เยียม ยูดา เญย ฒี่ง ฒู้ง แอ๋ง ม่าย ปะกี ยู่ง กวั้น เจี๋ย ซ้าว เญย เมี่ยน เญย ปั์ว-เดี๊ย.’ เฒี้ยว ฮนั้ง น้าย ก๊อง.
14 เฒี้ยว ก๊อง, “ฮนอย-เหญียะ อ๋อย เถา, เยีย อ๋อย โหฒว เหฒียง เยีย เหธา อิสะลาเอน เญย เฒ้ย-ฟุน เหธา ยูดา เญย เฒ้ย-ฟุน แล์ง เญย แหง่ง หว่า.#เยเลมี 23:5-6
15“เถา วั้ว เต๋ย ฮนอย-เหญียะ เหธา วั้ว เต๋ย เฒี่ยง โห่,
เยีย อ๋อย เหว่ย ดาวิด ปุน แป้ง ฟิม เญย หธุน#33:15 หธุน เป๊ย เหยียด เต้า เฒ้ย-ฟุน. ธ้วด.
นิ่น อ๋อย เยียม เต่ย-ปูง โหฒว แป้ง ฟิม, โหฒว ตุ๊ หอบ.
16เยียม วั้ว เต๋ย ฮนอย-เหญียะ ยูดา ฒู้ง ตุ๊ เหฌียว,
อิสะลาเอน หย่า ตุ๊ ถาย-แป้ง เญย เยียม.
น้าย นอม ฒี่ง อ๋อย ตุ๊ บั๋ว เห่ว,
‘เฒี้ยว เซ เยีย บัว เญย แป้ง ฟิม.’
17เหว่ย หฒุ เฒี้ยว ฮนั้ง น้าย ก๊อง, ‘ดาวิด เหยียด ลิ์ว ม่าย เมี่ยน เฒว์ย อิสะลาเอน เฒ้ย-ฟุน เญย เหว่ย.#2 ซามูเอน 7:12-16; 1 ฮู่ง โต้ว 2:4; 1 ฒุ่น ต่อย โต้ว 17:11-14 18เลวี ไซ เมี่ยน เหยียด ลิ์ว หย่า ม่าย เมี่ยน เยียม เยีย เญย หฑะเฮมียน ต้อ ฝ่ง ห่อ ปั๊ว เหฒี่ย เญย กะน้าย, เหว่ย ฝ่ง ห่อ ปั๊ว เหฒี่ย เญย ล่าง หฒิ หย่า เหว่ย เหยียด ลิ์ว หลิ่ว เล์ย ฝ่ง ห่อ เหฒี่ย เญย เจ๊า.”#ซ้าว เมี่ยน 3:5-10
19เยเลมี แอ๋ง ตุ๊ ฒิบ เฒี้ยว เญย หว่า ก๊อง, 20“เฒี้ยว ฮนั้ง น้าย ก๊อง, ‘สี ก๊อง เม่ย บัว ไฮ่ ปุน เยีย เหว่ย ลู่ง ฮนอย หฒั่น เหลียบ เญย แหง่ง หว่า เหธา เยีย เหว่ย ลู่ง ม์วน หฒั่น เหลียบ เญย แหง่ง หว่า ตั๋ง นอ, ฯฒฯ ปุน ลู่ง ฮนอย ลู่ง ม์วน ไม้ หฒิว ตี่ง ต้าย เญย เฒี่ยง โห่ ธ้วด, 21เยีย เหธา เยีย เญย โปว, ดาวิด, แล์ง เญย แหง่ง หว่า หย่า ไฮ่ ตั๋ง. ฮนั้ง หน่าย ฯฒฯ ปุน นิ่น ไม้ ม่าย ตอน เฒว์ย นิ่น เญย เหว่ย โหฒว ฮู่ง. เยีย เหธา ฟู-สู เยีย เญย เลวี ไซ เมี่ยน เหลียบ เญย แหง่ง หว่า หย่า ตั๋ง.
22ลู่ง เญย เหฮลย ซ้าว ไม้ ฮี่ง, ค้อย-เฮลน เญย ซา-เฒียว หย่า ฮลาว ไม้ เฒี์ยน ฮนั้ง หาย นอ, เยีย หย่า อ๋อย ฮนั้ง วั้ว นอ ปุน เยีย เญย โปว, ดาวิด, เญย เฒ้ย-ฟุน หฮยาง ธั้ม เจี๊ยน ฝาว. ฟู-สู เยีย เญย เลวี ไซ เมี่ยน เยีย หย่า อ๋อย ปุน หฮยาง ธั้ม เจี๊ยน ฝาว.’”
23เยเลมี ตุ๊ ฒิบ เฒี้ยว เญย หว่า ก๊อง, 24“เม่ย ไม้ จั๋ง หมวัง น้าย เต๋ย แปะ ฝีง ก๊อง เญย หว่า ไฟ? นิ่น บัว ก๊อง, ‘เฒี้ยว กิ๊น ต้าย เญย อี ฝีง นิ่น ฒู้ง กวั่ง หมี่ อ๊ะ.’ ฮนั้ง หน่าย นิ่น บัว หมั่ง เผีย เยีย เญย แปะ ฝีง. หฒิว นิ่น บัว หมั่ง ฒู้ง ไม้ ตุ๊ แอ๋ง เป๋น เหยียด กั๊วะ เมี่ยน. 25เฒี้ยว ฮนั้ง น้าย ก๊อง, ‘สี ก๊อง เยีย ไม้ เหธา ลู่ง ฮนอย เหธา ลู่ง ม์วน เหลียบ แหง่ง หว่า หย่า ตี่ง ลู่ง เหธา เดา เญย เล์ย, 26เยีย ฯฒฯ กวั่ง ยาโค้บ เหธา เยีย เญย โปว, ดาวิด, เญย เฒ้ย-ฟุน, ไม้ กิ๊น เหยียด เต้า นิ่น เญย เฒ้ย-ฟุน กุ๊น อับลาฮัม, อีสัก เหธา ยาโค้บ เญย เฒ้ย-ฟุน. เหว่ย หฒุ เยีย อ๋อย ปุน นิ่น บัว ตุ๊ หลง ฮนั้ง โล์ วั้ว นอ, หย่า ค้อ-เลี่ยน นิ่น บัว.’”
Currently Selected:
เยเลมี 33: IuMiTH
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
