ต้ม เจียน 18
18
มีคา เหธา ดาน เมี่ยน
1วั้ว จ๋า ลู่ง เดี๊ย อิสะลาเอน เมี่ยน ไม้ ม่าย ฮู่ง เตี๋ย. วั้ว เต๋ย หฮญัง-ต้าว เญย ฮนอย-เหญียะ ดาน ฝีง เญย เมี่ยน โย่ว เจี๊ยน มี่ง ล์อ ต๋อง เยียม, อ๋อย เป๋น นิ่น บัว กั้น หฑิบ เญย ป่วน เดา, เหว่ย หฒุ เถา วั้ว หฒั่น เยียม อิสะลาเอน เญย หฒวัง ฝีง บุด๋ง, ดาน เมี่ยน ไม้ แก้ง ตุ๊ นิ่น บัว กั้น หฑิบ เญย ป่วน เดา. 2ดาน เมี่ยน ฯฒฯ เยียม นิ่น บัว เญย ฝีง กะญั์ว, โสลา เหธา เอดทาโอน ฒี่ง, พ้าย ปยา เต้า เฮ้น เญย เมี่ยน มี่ง ฒ่า หมั่ง วั้ว นอม เต่ย-ปูง. หฒวัง เมี่ยน บั๋ว นิ่น บัว, “มี่ง ฒ่า หมั่ง วั้ว นอม เต่ย-ปูง โอ่.” นิ่น บัว ฯฒฯ มี่ง เถา เอฟาอิม เญย บง-ไอ๊ ต๋อง, เปียะ มีคา เญย เปย๊า หย่า ฮิด วั้ว. 3นิ่น บัว เถา มีคา เญย เปย๊า-เฮลน, นิ่น บัว เฒียะ ตุ๊ วั้ว เต้า เลวี เมี่ยน หลุน เมี่ยน เญย เฉีย, ฯฒฯ เปียะ มี่ง หน่าย นิ่น, “หาย เต้า ต้อ เม่ย ต้าย น้าย? เม่ย เยียม น้าย โหฒว หาย หญู่ง? เม่ย เหว่ย หาย ติ่ว เยียม น้าย?”
4นิ่น เตา วั้ว เต๋ย เมี่ยน, “มีคา ต้อ เยีย โหฒว น้าย โหฒว วั้ว หย่า ธี้ง เยีย, เยีย ฯฒฯ ตุ๊ โหฒว นิ่น เญย ไซ เมี่ยน.”
5วั้ว เต๋ย เมี่ยน ฯฒฯ ก๊อง บั๋ว นิ่น “โท้ เม่ย เถง เยีย บัว หน่าย ทิน-ฮู่ง, เยีย บัว อ๋อย ฮิ้ว ตุ๊ เยีย บัว มี่ง เญย เจ๊า ไฮ่ โหฒว ตุ๊ ธ้วด เญย ไฟ?”
6ไซ เมี่ยน เตา นิ่น บัว, “กุ๊น แป้ง ออน เญย มี่ง อ๊ะ. เม่ย บัว มี่ง เญย เจ๊า เฒี้ยว หอบ เฮญี้ยว เญย.”
7วั้ว เต๋ย ปยา เต้า เมี่ยน ฯฒฯ ธ้วด เจ๊า มี่ง เถา ลาอิด ฒี่ง, ปวัด วั้ว นอม ฒี่ง เญย แปะ ฝีง แป้ง ออน เญย เยียม ฮนั้ง ไซดอน ฒี่ง เญย เมี่ยน นอ, เยียม ตุ๊ ว้วน, ไม้ บู้ง หาย หญู่ง. เยียม น้าย นอม เต่ย-ปูง เญย เมี่ยน ไม้ ธา หาย หญู่ง, นิ่น บัว ฯฒฯ คู่ เยียม เญย. นิ่น บัว เล่ย ไซดอน เมี่ยน โก เญย, หย่า ไม้ เหธา หาย เต้า กะเหญี่ย เญย เมี่ยน จิว ทง.
8วั้ว เต๋ย ปยา เต้า ธ้าย จั๊วะ เมี่ยน หฑวน เถา โสลา เหธา เอดทาโอน, นิ่น บัว เญย ก๋อ-โย์ว หน่าย ก๋า, “เม่ย บัว ม่าย หาย หญู่ง ก๊อง?”
9นิ่น บัว เตา, “เจี์ย ต้าย. บัว ล่ม ฑ่อย มี่ง เบ๊าะ นิ่น บัว ม่าะ! เหว่ย หฒุ เยีย บัว ปวัด วั้ว นอม เต่ย-ปูง หฒะเก้ง หลง ไห่. เม่ย บัว หธ่อ เฒว์ย เจี๊ยน หน่าย ไม้ ต์ง ไฟ? ไม้ ตู๋ง ไง่. ก๊าน เปียะ มี่ง แฑง วั้ว นอม เต่ย-ปูง อ๊ะ. 10เม่ย บัว มี่ง เถา วั้ว ฯฒฯ ปวัด วั้ว เต๋ย เมี่ยน ไม้ บู้ง หาย หญู่ง. เต่ย-ปูง หย่า จั๊ง ไห่. ทิน-ฮู่ง ฒู้ง เฒาะ วั้ว นอม เต่ย-ปูง จิว ปุน เยียม เม่ย บัว เญย ปั์ว-เดี๊ย หมี่ อ๊ะ. น้าย นอม เต่ย-ปูง หย่า ไม้ ธา เหยียด หญู่ง เยียม น้าย ลู่ง เดี๊ย เญย กะน้าย.”
11ดาน ฝีง เญย หลัวะ แป๊ะ เต้า เมี่ยน ฯฒฯ ต้อ เจี๊ยน หวัวะ กิ่น เยียม โสลา เหธา เอดทาโอน ธ้วด มี่ง เบ๊าะ จ๋า. 12มี่ง เกา, นิ่น บัว เหลียบ เธี้ยง เยียม ยูดา เต่ย นิด คีลิย้าดเยอาลิม. เหว่ย น้าย เยียม คีลิย้าดเยอาลิม เญย ไฟ ปูง แหมง วั้ว นอม ต๋อง เมี่ยน ธ้วด บั๋ว เห่ว มาหะเนดาน#18:12 เอ๋ย เล์ย เซ ดาน เญย เธี้ยง. เถา อี้ จ๋า ฮนอย. 13นิ่น บัว เยียม หน่าย เจี๋ย มี่ง เถา เอฟาอิม เญย บง-ไอ๊ ต๋อง ฯฒฯ ต้าย เถา มีคา เญย เปย๊า.
14ต้ง ฒิ่น ด่าง มี่ง ลาอิด เต่ย ธ้าย จั๊วะ วั้ว เต๋ย ปยา เต้า เมี่ยน ก๊อง บั๋ว นิ่น บัว เญย ก๋อ-โย์ว, “เม่ย บัว ฮิ้ว เญย ไฟ? เยียม น้าย เต๋ย เปย๊า ม่าย เอโฟ้ด เหธา เปย๊า ฒง เมี่ยน หฒั่ง เญย หมิ่ว-ฝัง เหธา ดี้ง ต้าย, โต๋ ต้าย เญย หมิ่ว-ฝัง. ฮนั้ง หน่าย เม่ย บัว ฮนั้ม หมั่ง ก๋า, เม่ย บัว อ๋อย หฒุ ฮนั้ง หาย นอ โหฒว.” 15นิ่น บัว ฯฒฯ มี่ง เถา เลวี เมี่ยน หลุน เมี่ยน เยียม วั้ว นอม เปย๊า, เซ มีคา เญย เปย๊า, หน่าย ก๋า เลวี เมี่ยน นิ่น เยียม หลง เญย ไฟ? 16ต้อ เจี๊ยน เบ๊าะ จ๋า เญย หวัวะ กิ่น วั้ว เต๋ย หลัวะ แป๊ะ เต้า ดาน ฝีง เมี่ยน ต้าย โซ้ว เจี๊ยน เปย๊า เญย หลาด แก้ง ด่าง. 17ต้ง ฒิ่น ด่าง มี่ง ธ้าย จั๊วะ ฒ่า เต่ย-ปูง วั้ว เต๋ย ปยา เต้า เมี่ยน ฯฒฯ เปียะ เปย๊า มี่ง เฒาะ ดี้ง ต้าย เญย หมิ่ว-ฝัง เหธา เอโฟ้ด เหธา เปย๊า ฒง หฒั่ง เญย หมิ่ว-ฝัง เหธา โต๋ ต้าย เญย หมิ่ว-ฝัง ต้อ มี่ง. ไซ เมี่ยน เหธา ต้อ เจี๊ยน เบ๊าะ จ๋า เญย หวัวะ กิ่น วั้ว เต๋ย หลัวะ แป๊ะ เต้า โซ้ว เจี๊ยน หลาด แก้ง ด่าง.
18น้าย เต๋ย เมี่ยน เปียะ มีคา เญย เปย๊า เฒาะ ดี้ง ต้าย เญย หมิ่ว-ฝัง เหธา เอโฟ้ด, เปย๊า ฒง เมี่ยน หฒั่ง เญย หมิ่ว-ฝัง เหธา โต๋ ต้าย เญย หมิ่ว-ฝัง วั้ว หฒั่น, ไซ เมี่ยน หน่าย นิ่น บัว, “เม่ย บัว โหฒว หาย หญู่ง แล่?”
19วั้ว เต๋ย เมี่ยน ฯฒฯ ก๊อง บั๋ว นิ่น, “ไม้ ตู๋ง โค โล. เฒาะ ปั์ว ปวัง เจี๊ยน เม่ย เญย ฑุ่ย. กัน เจี๊ยน เยีย บัว มี่ง ม่าะ! ต้าย โหฒว เยีย บัว เญย เตีย, เถง เยีย บัว โหฒว ไซ เมี่ยน. เม่ย เยียม เหยียด เต้า เญย เปย๊า โหฒว ไซ เมี่ยน เก้า หลง ไฟ โหฒว อิสะลาเอน เญย เหยียด ฝีง เหยียด ปู้ง เญย ไซ เมี่ยน เก้า หลง?” 20วั้ว เต้า ไซ เมี่ยน ฯฒฯ อะเฮน้ย ไห่. นิ่น เฒาะ เอโฟ้ด เหธา เปย๊า ฒง หฒั่ง เญย หมิ่ว-ฝัง เหธา ดี้ง ต้าย เญย หมิ่ว-ฝัง กัน เจี๊ยน วั้ว เต๋ย เมี่ยน มี่ง อ๊ะ. 21นิ่น บัว ต๋าว ซิน ธ้วด วั้ว นอม ต๋อง วั้ว หฒั่น, นิ่น บัว ปุน ฝุเจว๊ย-ไฝ, แซง-คู้ เหธา นิ่น บัว เญย เหยียด ฒู้ง กะน้าย มี่ง ด่าง.
22นิ่น บัว เล่ย มีคา เญย เปย๊า โก เต๋ย อ๊ะ. นิด มีคา เญย เปย๊า เญย เมี่ยน กั๊บ ฒุ้น ต้าย หฒุ่น หย่า หฒุ่น หฒ่าย ดาน เมี่ยน, 23ฯฒฯ หล่ง ชะ เห่ว. ดาน เมี่ยน ฮวิน หฑวน หน่าย มีคา, “เม่ย ต้อ เมี่ยน ต้าย ด่ง หน่าย ธั้ม โหฒว หาย หญู่ง?”
24มีคา เตา, “เม่ย บัว เฒาะ เยีย โหฒว ต้าย เญย หมิ่ว-ฝัง เหธา เยีย เญย ไซ เมี่ยน ต้อ มี่ง. วั้ว หญู่ง เยีย หธ่อ เหฒ่ง หาย หญู่ง? ฮนั้ง หน่าย เม่ย บัว ฝู่ง หน่าย เยีย, ‘เม่ย โหฒว หาย หญู่ง?’”
25ดาน เมี่ยน ก๊อง บั๋ว มีคา, “ไม้ ตู๋ง ปุน เยียม เยีย บัว บุด๋ง หมวัง ไฮ์ เม่ย เญย เฉีย. เหฑีย ม่าย เต๋ย กะเฉีย เป๊ะ เญย เมี่ยน ไฮ่ โหฒว เธี้ยว ปุน เม่ย บัว. เม่ย เหธา เม่ย เญย เปย๊า ฒง เมี่ยน ฯฒฯ หฒุ กวั่ง แหม่ง.” 26ดาน เมี่ยน ฯฒฯ กัน เจี๊ยน นิ่น บัว เญย เจ๊า มี่ง. มีคา ปวัด วั้ว เต๋ย เมี่ยน เก้า เฮ้น นิ่น, นิ่น ฯฒฯ ต๋าว ซิน หฑวน นิ่น กั้น เญย เปย๊า หมี่ อ๊ะ.
27ดาน เมี่ยน ฯฒฯ ต้อ มีคา โหฒว ต้าย เญย กะน้าย เหธา นิ่น เญย ไซ เมี่ยน กัน เจ๊า มี่ง เถา ลาอิด ฒี่ง เบ๊าะ แป้ง ออน, ไม้ บู้ง หาย หญู่ง เญย เมี่ยน หย่า หล่ง หฑุ ด๊าว ไต๋ นิ่น บัว, แอ๋ง หล่ง โต์ว ปั๊ว นิ่น บัว เญย ฒี่ง. 28ไม้ ม่าย หาย เต้า ต้าย เหฌียว, เหว่ย หฒุ นิ่น บัว เล่ย ตุ๊ ไซดอน ฒี่ง โก ไห่. นิ่น บัว หย่า ไม้ เหธา หาย เต้า จิว ทง. วั้ว นอม ฒี่ง เยียม ฮ์อง นิด ฟัด เบดเลโหบ.
ดาน เมี่ยน ฯฒฯ แอ๋ง เหธย เจี์ย วั้ว นอม ฒี่ง หย่า เยียม เจี๊ยน วั้ว นอม ฒี่ง อ๊ะ. 29นิ่น บัว ธ้วด วั้ว นอม ฒี่ง เญย บั๋ว กัน นิ่น บัว เญย อง-ถาย, อิสะลาเอน เญย ตอน, ดาน, เญย บั๋ว เห่ว ดาน ฒี่ง. น้าย นอม ฒี่ง ฒิ่น ด่าง เห่ว ลาอิด. 30ดาน เมี่ยน เยียม วั้ว เหว่ย กั้น เหลียบ วั้ว เต๋ย ดี้ง ต้าย เญย หมิ่ว-ฝัง. โมเซ เญย ฟุน, เกโซน เญย ตอน, โยนาทาน, เหธา โยนาทาน เญย ตอน บัว โหฒว ดาน ฝีง เญย ไซ เมี่ยน เถา น้าย นอม เต่ย-ปูง หฒุ เมี่ยน ธ้าง เญย เฒี่ยง โห่. 31ดาน เมี่ยน เหว่ย กั้น เหลียบ มีคา ดี้ง ต้าย เญย หมิ่ว-ฝัง, ด่ง ทิน-ฮู่ง เญย เปย๊า เยียม ซีโล ฒี่ง เล่า.
Currently Selected:
ต้ม เจียน 18: IuMiTH
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
