ยากอบ 2
2
ไม้ ตู๋ง หมั่ง ไฝ หาย เต้า
1เยีย เญย ก๋อ-โย์ว อ้า! เม่ย บัว เสียน เขา บัว ฌัง-หล่าง เญย เฒี้ยว, เฒี้ยว เยซู กีตู่. เหว่ย น้าย ไม้ ตู๋ง หมั่ง หาย เต้า เญย เฮมียน. 2สี ก๊อง ม่าย ล่าน เมี่ยน ฒุ ลุย-โหว หลง เญย หย่า ตั้ง เจี๊ยน เจียม-ปั์ว-โด๊ะ-แฑง เปียะ เม่ย บัว กั๊บ ฒุ้น เญย ต๋อง, แอ๋ง ม่าย ล่าน เมี่ยน จ่ม เมี่ยน ฒุ เจี๊ยน ลุย-โหว-ฮู้ หย่า เปียะ ต้าย, 3เม่ย บัว ท่าย ฒุ ลุย-โหว หลง วั้ว ล่าน ฯฒฯ บั๋ว นิ่น, “ต้าย เฒว์ย น้าย หลง เจี๋ย เญย ต๋อง โอ่.” แอ๋ง บั๋ว จ่ม วั้ว ล่าน, “โซ้ว เจี๊ยน หน่าย. ไม้ เฒย นอ, ต้าย เฒว์ย เยีย น้าย เหฒา-เฮลน.” 4ฮนั้ง หน่าย เยียม เม่ย บัว กะญั์ว เม่ย บัว ปุน ฆอย โหฒว เหฒีย ฮ่อง เมี่ยน ไม้ เฒ์ย? เม่ย บัว หล่ง เม่ย บัว กั้น เอ๊าะ ไห่ เญย เฮญี้ยว สัม เมี่ยน ไม้ เฒ์ย?
5เยีย ฮนั้ม ไห่ เญย ก๋อ-โย์ว อ่า, เม่ย บัว หมวัง โอ่. ทิน-ฮู่ง กิ๊น ป้าม เกน เญย เมี่ยน จ่ม เมี่ยน ต้าย เหว่ย ปุน นิ่น บัว ปุ๊ด เสียน ฟิม เญย ฒ่อย หย่า ปุน นิ่น บัว ตุ๊ หฑิบ ทิน-ฮู่ง เญย กั๊วะ, ต้ง ทิน-ฮู่ง แล์ง ปุน ฮนั้ม นิ่น วั้ว เต๋ย เมี่ยน เญย กั๊วะ. 6มป่า เม่ย บัว หมั่ง เผีย เมี่ยน จ่ม เมี่ยน. โหฒว โตะ เม่ย บัว เซ ต้ง ปุ๊ด-ฒ่อย เมี่ยน ไม้ เฒ์ย? ทอ เม่ย บัว มี่ง วั้ว สี่ ต้อง หย่า ต้ง ปุ๊ด-ฒ่อย เมี่ยน ไม้ เฒ์ย? 7ต้ง น้าย เต๋ย ปุ๊ด-ฒ่อย เมี่ยน ก๊อง โตะ เม่ย บัว เหญี่ยม วั้ว นอม จ๋าย เญย บั๋ว ไม้ เฒ์ย?
8กีง-โซว เฟี้ย เจี๊ยน ก๊อง,
“อ๋อย หฒุ ฮนั้ม เมี่ยน ฮนั้ง ฮนั้ม กั้น นอ.”#เลวี 19:18; มัดทาย 7:12; 22:39; ลูกา 10:27
สี ก๊อง เม่ย บัว เอย เจี๊ยน น้าย ติ้ว ทิน-ฮู่ง เญย หลี่ง โหฒว, เม่ย บัว ฯฒฯ โหฒว ตุ๊ หอบ อ๊ะ. 9มป่า สี ก๊อง เม่ย บัว ท่าย น้าย ล่าน, หมั่ง ไฝ วั้ว ล่าน, เม่ย บัว ฯฒฯ ป์าม ฒุ์ย. เล์ย-หลัด หย่า ตี่ง เม่ย บัว เญย ฒุ์ย อ๊ะ.
10หาย เต้า กัน เหฑ่ง เล์ย-หลัด มป่า ต่อง เหยียด ติ้ว, เซ ฟี่ ฮนั้ง ต่อง เหฑ่ง ติ้วๆ อ๊ะ. 11ทิน-ฮู่ง ก๊อง,
“ไม้ ตู๋ง เหฮยียน เอ๊า เหฮยียน โหฆ,”#ธ้วด อียิบ 20:14; หฑั่ม เล์ย-หลัด 5:18
หย่า ก๊อง,
“ไม้ ตู๋ง ไต๋ เมี่ยน.”#ธ้วด อียิบ 20:13; หฑั่ม เล์ย-หลัด 5:17
สี ก๊อง เม่ย บัว ไม้ เหฮยียน เอ๊า เหฮยียน โหฆ มป่า ไต๋ เมี่ยน, เม่ย บัว หย่า เป๋น ป์าม เล์ย เญย เมี่ยน อ๊ะ.
12เม่ย บัว อ๋อย หฒิว ปุน เมี่ยน ตุ๊ ปู๋ง ฆอย เญย เล์ย หฒุ เซี้ยม. ฮนั้ง หน่าย เม่ย บัว ก๊อง เญย เหธา โหฒว เญย อ๋อย หฒุ ต๋อย วั้ว หญู่ง เล์ย. 13หาย เต้า ไม้ ค้อ-เลี่ยน เมี่ยน, เถา เซี้ยม ฒุ์ย วั้ว หฒั่น ทิน-ฮู่ง ฯฒฯ ไม้ ค้อ-เลี่ยน วั้ว เต้า. ค้อ-เลี่ยน เมี่ยน เญย สี่ ฮี่ง เจี๋ย ตี่ง ฒุ์ย เญย เจ๊า.
เสียน ฟิม เหธา โหฒว เญย สี่
14เยีย เญย ก๋อ-โย์ว อ่า, หาย เต้า ก๊อง นิ่น ม่าย เสียน ฟิม หย่า ไม้ เอย เจี๊ยน ฑุ่ย ก๊อง เญย โหฒว นอ, ฝู่ง ม่าย ลั่ม หล่ง? นิ่น เญย เสียน ฟิม ไฮ่ เหฌียว นิ่น ไฟ? 15สี ก๊อง ม่าย เต้า ก๋อ-โย์ว ไฟ ต่อ เฑี์ย ไม้ ม่าย ลุย-โหว ฒุ, หฮนาง-ต๋น หย่า ไม้ ม่าย หญั่น, 16เม่ย บัว หย่า ม่าย เต้า บั๋ว นิ่น, “แป้ง ออน เญย มี่ง อ๊ะ. ฒุ เซี้ยว หญั่น เป๊ว โอ่.” มป่า นิ่น เฉียม หล่ง เญย กะน้าย หย่า ไม้ ปุน. น้าย ฝู่ง ม่าย ลั่ม หล่ง?
17เสียน ฟิม หย่า ฮนั้ง หน่าย นอ. ขูง เสียน ฮนั้ง หย่า ไม้ เอย เจี๊ยน โหฒว เซ ต๋อง ไต่ หมี่ อ๊ะ.
18มป่า ม่าย เมี่ยน อ๋อย ก๊อง, “เม่ย ม่าย เสียน ฟิม, เยีย ม่าย เยีย โหฒว เญย สี่.” เยีย ฯฒฯ เตา, “วั้ว หญู่ง ปุน เยีย หมั่ง ก๋า เม่ย ฮนั้ง หาย นอ ไฮ่ ม่าย เสียน ฟิม หย่า ไม้ เอย เจี๊ยน โหฒว หาย หญู่ง? เยีย ฯฒฯ ปุน เม่ย หมั่ง เยีย โหฒว เญย สี่ ปุน ธีง เยีย เญย เสียน ฟิม.” 19เม่ย เสียน ขูง ม่าย ดุ เต้า ทิน-ฮู่ง ฮนั้ง ไฟ? หลง อ๊ะ. เลี่ยม เมี้ยน หย่า เสียน, กั้ม เหฑีย ไห่, ซิน หฒิน เหฑ่ง. 20เมี่ยน หฮงง เมี่ยน อ้า! ขูง เสียน ฮนั้ง, ไม้ เอย เจี๊ยน โหฒว เซ ไม้ ลั่ม หล่ง. เม่ย บัว อ๋อย เยีย ปิ๋ว เม่ง ปุน เม่ย บัว ฮิ้ว ไฟ? 21บัว เญย อง-ถาย-แงะ, อับลาฮัม, ฮนั้ง หาย นอ ตุ๊ เหธา ทิน-ฮู่ง หอบ เฮญี้ยว? เซ เหว่ย นิ่น โหฒว เญย สี่, ต้ง นิ่น ต้อ นิ่น เญย ตอน, อีสัก, อัน วั้ว เหฒี่ย-ต้อง อ๋อย เหฒี่ย ปุน ทิน-ฮู่ง.#ทิน เต่ย โต้ว 22:1-14 22เม่ย บัว ปวัด เญย ไฟ? อับลาฮัม เญย เสียน ฟิม เหธา โหฒว เญย สี่ กั๊บ เจี๊ยน. นิ่น โหฒว เญย สี่ ฯฒฯ ปุน นิ่น เญย เสียน ฟิม ตุ้น ยุ่น ฑ่อย. 23ฮนั้ง หน่าย, กีง-โซว เญย หว่า ธ้วด ต้าย ต๋อย-ติ่ว เหฑ่ง. กีง-โซว ก๊อง, “อับลาฮัม เสียน ทิน-ฮู่ง. เหว่ย นิ่น เสียน, ทิน-ฮู่ง ฯฒฯ ฝุน นิ่น โหฒว ตุ๊ หอบ ทิน-ฮู่ง เญย เฮญี้ยว.”#ทิน เต่ย โต้ว 15:6 อับลาฮัม ฯฒฯ ตุ๊ เม่ง โหฒว ทิน-ฮู่ง เญย โล์-แกง ต่อย.#2 ฒุ่น ต่อย โต้ว 20:7; อิสะยา 41:8 24ฮนั้ง น้าย, เม่ย บัว ปวัด เญย, เมี่ยน ตุ๊ เหธา ทิน-ฮู่ง หอบ เฮญี้ยว เซ เหว่ย นิ่น บัว โหฒว เญย สี่, ไม้ เฒ์ย ขูง เหว่ย เสียน ฮนั้ง.
25วั้ว เต้า หม่าย ป๊วน-ซิน เญย มเซียะ ตอน, ลาหับ, ฟี่ ฮนั้ง เญย, เหว่ย นิ่น โหฒว เญย สี่ ตุ๊ เหธา ทิน-ฮู่ง หอบ เฮญี้ยว, ต้ง นิ่น ฒิบ ธ้าย จั๊วะ เญย ยิวไท เมี่ยน#2:25 ฟาน หฒะ ก๊อง โต่ว เฝียน เมี่ยน. หย่า ปู๋ง นิ่น บัว ธ้วด กั้น ติ้ว เจ๊า.#โยซูวา 2:1-21 26สี ก๊อง ซิน ไม้ ม่าย เฉีย, เมี่ยน ฯฒฯ ไต่ หมี่ อ๊ะ. เสียน ฟิม หย่า ฟี่ ฮนั้ง เญย. ไม้ เอย เจี๊ยน โหฒว เซ ไม้ ลั่ม หล่ง, ฮนั้ง ไต่ หมี่ อ๊ะ นอ.
Currently Selected:
ยากอบ 2: IuMiTH
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
