ทิน เต่ย โต้ว 44
44
ญ่าน ฒ้าน ตี๋ง ล่าย
1โยเซ้บ พ้าย โก๋ว นิ่น เญย เปย๊า เญย ต้ม โปว, “เฒาะ เบย้า ตั๊บ น้าย เต๋ย เมี่ยน เญย บัวะ. ตั๊บ เก๋า นิ่น บัว ต้อ. แอ๋ง เฒาะ เก๊าะ-เมี่ยน ม์าย เบย้า เญย ญ่าน ตั๊บ เก๊าะ-เมี่ยน เญย บัวะ ฑุ่ย. 2เฒาะ เยีย เญย ฒ้าน, ต้ง ญ่าน ฒ้าน วั้ว นอม, เหธา ม์าย เบย้า เญย ญ่าน ตั๊บ เจี๊ยน โย์ว-ลาย วั้ว เต้า เญย บัวะ ฑุ่ย.” โปว ฯฒฯ เอย เจี๊ยน โยเซ้บ เญย หว่า โหฒว.
3ตะเหญ่ย ดอม เฑี้ยว เญย, ลู่ง เบี์ยวๆ ฌัง, ต้ม โปว ฯฒฯ ฝูง นิ่น บัว เหธา นิ่น บัว เญย ล่อ ธ้วด เจ๊า หฑวน. 4ธ้วด หฒิ ฒี่ง มี่ง ไม้ แก้ง หนั่ง โก, โยเซ้บ ก๊อง บั๋ว นิ่น เญย ต้ม โปว, “ก๊าน มี่ง หฒุ่น วั้ว เต๋ย เมี่ยน. หฒุ่น หฒ่าย, อ๋อย หฒุ หน่าย ก๋า นิ่น บัว, ‘เยีย บัว โหฒว หลง ปุน เม่ย บัว. เม่ย บัว เหว่ย หาย ติ่ว โหฒว หว่าย ปุน เยีย บัว? 5เม่ย บัว เหว่ย หาย ติ่ว หนิ่ม เยีย เญย เฒี้ยว เญย ญ่าน ฒ้าน มี่ง? น้าย นอม ฒ้าน นิ่น หล่ง ฮบ หย่า หล่ง หน่าย ฒิ่น โฮ์ เญย เจ๊า. เม่ย บัว หฒะเก้ง โหฒว ต่อง โด ไห่ อ๊ะ.’”
6วั้ว เต้า โปว หฒุ่น หฒ่าย, นิ่น ฯฒฯ เอย โยเซ้บ เญย หว่า ก๊อง. 7มป่า วั้ว เต๋ย มั์ว-ต่อย ก๊อง, “ต้ม ก๋อ อ่า, เม่ย โหฒว หาย หญู่ง ฮนั้ง น้าย นอ ก๊อง? เยีย บัว ฒู้ง ไม้ ฮนั้ม เถา ฮนั้ง น้าย นอ โหฒว. 8หมั่ง ก๋า, ม์าย ต้าว หฑุ่น เบย้า เญย ญ่าน เยียม เยีย บัว เญย บัวะ เยีย บัว ฒู้ง เยียม คานาอัน เต่ย-ปูง ต้อ ต้าย ถุย หฑวน ปุน เม่ย. เยีย บัว ฝู่ง ไฮ่ หนิ่ม เยียม เม่ย เญย เฒี้ยว เญย เปย๊า เญย เจียม ญ่าน? 9สี ก๊อง เม่ย ปวัด วั้ว นอม ฒ้าน เยียม หาย เต้า, ปุน วั้ว เต้า หฒุ ไต่ อ๊ะ. เหฒ่ง วั้ว เต๋ย แล์ง โหฒว เม่ย เญย โน่ว.”
10โปว ก๊อง, “หอบ เญย. เอย เจี๊ยน เม่ย บัว เญย หว่า โหฒว อ๊ะ. มป่า ล์อ ปวัด เยียม หาย เต้า เญย บัวะ, วั้ว เต้า กั้น อ๋อย หฒุ โหฒว เยีย เญย โน่ว. เหฒ่ง เหฌี่ย วั้ว เต๋ย ไม้ ต่อง หาย หญู่ง.”
11เต้าๆ ฯฒฯ เซี้ยบๆ เญย โป้ว บัวะ เหฌี่ย ตน เจี๊ยน วั้ว เดา คอย. 12โปว ฯฒฯ โซว อ๊ะ, เยียม ต้ม ก๋อ เญย โซว เจี๊ยน มี่ง เถา โย์ว-ลาย เญย. เถา เบนยามิน เญย บัวะ ฯฒฯ โซว ธ้วด วั้ว นอม ฒ้าน. 13วั้ว เต๋ย มั์ว-ต่อย เฑ่า ไห่, เป๊ด นิ่น บัว เญย ลุย, แอ๋ง โป้ว บัวะ ฝาว ปุน ล่อ ทอ เจี๊ยน ต๋าว ฆาง หฑวน วั้ว ฒี่ง อ๊ะ.
14ยูดา เหธา นิ่น เญย มั์ว-ต่อย หฑวน เถา โยเซ้บ เญย เปย๊า วั้ว หฒั่น, โยเซ้บ หธ่อ เยียม เปย๊า เญย. นิ่น บัว เยียม นิ่น เญย หฑะเฮมียน บ๊าบ เหฌี่ย เดา. 15โยเซ้บ ก๊อง บั๋ว นิ่น บัว, “น้าย เม่ย บัว โหฒว หาย หญู่ง แล่? เม่ย บัว ไม้ ฮิ้ว ตุ๊ เยีย น้าย หญู่ง เมี่ยน ไฮ่ หมั่ง ตุ๊ ธ้วด ฒิ่น โฮ์ เญย สี่, ไฮ่ เฒาะ ตุ๊ เม่ย บัว ไฟ?”
16ยูดา ก๊อง, “เยีย บัว ฮนั้ง หาย นอ ไฮ่ เตา เฒี้ยว? ฮนั้ง หาย นอ ไฮ่ ก๊อง? เยีย บัว ฮนั้ง หาย นอ ไฮ่ ไจ๊ ซิน? ทิน-ฮู่ง เว้ด ธ้วด เหฑ่ง เยีย บัว โหฒว ต่อง เญย สี่. อี้ หฒั่น ไม้ เฒ์ย ขูง ฒ้าน เยียม บัวะ วั้ว เต้า เป๋น เม่ย เญย โน่ว ฮนั้ง. เลี่ยม เยีย บัว เหยียด ฒู้ง เป๋น เม่ย เญย โน่ว อ๊ะ.”
17โยเซ้บ ก๊อง, “ไม้ เฒ์ย ฮนั้ง หน่าย เหลาะ. ขูง ฒ้าน เยียม บัวะ วั้ว เต้า อ๋อย หฒุ โหฒว เยีย เญย โน่ว ฮนั้ง. เหฒ่ง วั้ว เต๋ย กุ๊น แป้ง ออน เญย หฑวน เม่ย บัว เญย เตีย วั้ว อ๊ะ.”
ยูดา โท้ โยเซ้บ ปู๋ง เบนยามิน
18ยูดา แอ๋ง มี่ง ฟัด เต๋ย ต๋อย โยเซ้บ ก๊อง, “เยีย เญย เฒี้ยว อ่า, เยีย โท้ เหธา เม่ย ก๊อง โจ๋ว หว่า. เม่ย ไม้ ตู๋ง แก้ง เฉีย เจี์ย เยีย, เม่ย เญย โปว, ไม้ กุ๊น เม่ย ด่ง ฟาโล ฮู่ง โฮล. 19เฒี้ยว หน่าย เยีย บัว, เม่ย เญย โปว, ‘เม่ย บัว หธ่อ ม่าย เตีย, ม่าย โย์ว เญย ไฟ?’ 20เยีย บัว เตา, ‘เตีย ม่าย เญย มป่า โก๋ ไห่ อ๊ะ. โย์ว หย่า ม่าย เญย. เตีย ฒู้ง โก๋ ไห่ หธีง ตุ๊ น้าย เต้า ตอน-ลาย. น้าย เต้า ตอน เญย ก๋อ ไต่ หมี่ อ๊ะ. นิ่น บัว อี มั์ว จวั่ง มา มป่า อี้ หฒั่น ขูง ม่าย นิ่น กั้น ฮนั้ง. นิ่น เญย เตีย หย่า ฮนั้ม ไห่ นิ่น.’
21“เม่ย เห่ว เยีย บัว, เม่ย เญย โปว, ต้อ นิ่น ต้าย น้าย ปุน เม่ย หมั่ง. 22เยีย บัว บั๋ว เม่ย, เยีย บัว เญย เฒี้ยว, ‘วั้ว เต้า ตอน เล่ย ไม้ ตุ๊ นิ่น เญย เตีย. เล่ย นอ, นิ่น เญย เตีย ไฮ่ ไต่ เญย.’ 23มป่า เม่ย บั๋ว เยีย บัว, เม่ย เญย โปว, ‘เยีย บัว ไม้ ต้อ น้าย เต้า โย์ว-ลาย เหธา เจี๊ยน ต้าย นอ, เยีย บัว ไม้ ตุ๊ แอ๋ง ปวัด เม่ย เญย เฮมียน.’ 24เยีย บัว ต้อ เม่ย เญย หว่า หฑวน มี่ง ก๊อง ปุน เม่ย เญย โปว, เยีย บัว เญย เตีย, หมวัง.
25“เยีย บัว เญย เตีย บั๋ว เยีย บัว, ‘แอ๋ง มี่ง ม์าย เต๋ย เบย้า ม่าะ!’ 26เยีย บัว เตา, ‘เยีย บัว ไม้ ไฮ่ มี่ง. สี ก๊อง เยีย บัว เญย โย์ว-ลาย เหธา เจี๊ยน เยีย บัว มี่ง นอ, เยีย บัว มี่ง เญย. เหว่ย หฒุ โย์ว-ลาย ไม้ เหธา เยีย บัว มี่ง นอ, เยีย บัว ไม้ ตุ๊ ปวัด วั้ว ล่าน เมี่ยน เญย เฮมียน.’
27“เม่ย เญย โปว, เยีย บัว เญย เตีย, บั๋ว เยีย บัว, ‘เม่ย บัว ฮิ้ว ตุ๊ เยีย เญย เอ๊า, ลาเซน, ยู์ง ตุ๊ อี เต้า ตอน ปุน เยีย ฮนั้ง. 28ม่าย เต้า ฒู้ง เล่ย ฆอย เยีย. เยีย ฮนั้ม ต้าย นิ่น หฒุ เฮยี่ย กะน้าย เป๊ด นิ่น หมี่ อ๊ะ. เถา อี้ หฒั่น เยีย ไม้ ตุ๊ ปวัด วั้ว เต้า ตอน. 29สี ก๊อง เม่ย บัว ต้อ น้าย เต้า มี่ง, นิ่น หย่า ปวั้ง หฒุ สี่ นอ, เม่ย บัว ฯฒฯ ปุน เยีย, อง-มฆ้อง-แปะ, เฑ่า เถา เปียะ เยี่ยม เกน.’”#44:29 เยี่ยม เกน ไฟ โฒ้ว. เยียม 44:31 ฟี่ ฮนั้ง เญย.
30ยูดา แอ๋ง ก๊อง, “สี ก๊อง เยีย หฑวน เม่ย เญย โปว, เยีย เญย เตีย, วั้ว, หย่า ไม้ ม่าย น้าย เต้า ตอน เหธา เยีย หฑวน, 31เยีย เญย เตีย ปวัด เยีย เญย โย์ว ไม้ เหธา เยีย หฑวน นอ, นิ่น ฯฒฯ ไต่ อ๊ะ, เหว่ย หฒุ น้าย เต้า ตอน โหฒว เยีย เญย เตีย เญย บะฑิว-กอน. ฮนั้ง น้าย เยีย เญย เตีย, เม่ย เญย โปว, อง-มฆ้อง-แปะ, เฑ่า เถา ไต่.#44:31 ฟาน หฒะ ก๊อง เถา เปียะ เยี่ยม เกน. 32เยีย กั้น หล่ง เยีย เญย แหม่ง โหฒว ดาม-ต้าว บั๋ว เยีย เญย เตีย, ‘เยีย ไม้ ต้อ น้าย เต้า โย์ว หฑวน ปุน เตีย นอ, เยีย แล์ง เยียม เตีย เญย หฑะเฮมียน เหยียด เสย ดาม-ตอง.’
33“ฮนั้ง หน่าย, เยีย โท้ ปุน เยีย, เม่ย เญย โปว, เยียม น้าย โหฒว เม่ย เญย โน่ว ตี๊ น้าย เต้า ตอน. โท้ ปุน นิ่น กัน เจี๊ยน นิ่น เญย ก๋อ บัว หฑวน อ๊ะ โอ่. 34สี ก๊อง น้าย เต้า ตอน ไม้ เหธา เยีย หฑวน, เยีย ฮนั้ง หาย นอ ไฮ่ หฑวน เยีย เญย เตีย วั้ว. เยีย ไม้ อ๋อย ปวัด เยีย เญย เตีย หฒุ เหฒะ หน่าน ห่อย นิ่น.”
Currently Selected:
ทิน เต่ย โต้ว 44: IuMiTH
Highlight
Share
Compare
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
