ทิน เต่ย โต้ว 38
38
ยูดา เหธา ทามา
1ต้ง วั้ว หฒั่น, ยูดา เล่ย ฆอย นิ่น เญย มั์ว-ต่อย, เปย๋า มี่ง กัน เต้า อาดุนลัม เมี่ยน, บั๋ว เห่ว ฮีลา. 2เยียม วั้ว ยูดา ปวั้ง เต้า คานาอัน เมี่ยน, ชูอา, เญย เซียะ, ฯฒฯ หล่ง โหฒว เอ๊า. หล่ง เจี๊ยน, 3นิ่น เญย เอ๊า ฯฒฯ ม่าย เจี๊ยน ซิน อ๊ะ, ยู์ง ตุ๊ เต้า ตอน, ธ้วด บั๋ว เห่ว เออา. 4นิ่น เญย เอ๊า แอ๋ง ม่าย ตะเหญ่ย หฑุ่น ซิน, ยู์ง ตุ๊ เต้า ตอน, ธ้วด บั๋ว เห่ว โอนัน. 5ฆะฮ้า แอ๋ง ยู์ง เต้า ตอน, ธ้วด บั๋ว เห่ว เชลา. เชลา ธ้วด เสย วั้ว หฒั่น ยูดา เยียม เคซี้บ.#38:5 เคซี้บ ไฟ อักซี้บ.
6ยูดา เถง นิ่น เญย ตอน-โฮล, เออา, ล์อ ตุ๊ เต้า เอ๊า, บั๋ว เห่ว ทามา. 7มป่า หฒิว เฒี้ยว หมั่ง, เออา หว่าย ไห่. เฒี้ยว ฯฒฯ ปุน นิ่น ไต่ หมี่ อ๊ะ.
8ยูดา แอ๋ง ก๊อง บั๋ว โอนัน, “เม่ย อ๋อย หฒุ มี่ง เหธา เม่ย เญย ญาม เปว๋ย เหว่ย โหฒว โย์ว เญย เล์ย-เหญ่ย,#38:8 หฒิว นิ่น บัว เญย เล์ย, ก๋อ ไต่ มี่ง หย่า ไม้ ม่าย ฝุเจว๊ย, โย์ว อ๋อย หฒุ หล่ง ญาม เหว่ย ตุ๊ ฝุเจว๊ย ฝุน ก๋อ เญย ป่วน. ตุ๊ ฝุเจว๊ย เถง เม่ย เญย ก๋อ ม่าย โฮ์ ต่อย เฒ้ย-ฟุน.” 9โอนัน ฮิ้ว ตุ๊ ยู์ง ตุ๊ ฝุเจว๊ย มป่า ไม้ ฝุน นิ่น เญย ป่วน. ฮนั้ง หน่าย, หาย หฒั่น เหธา นิ่น เญย ญาม เปว๋ย, นิ่น ตุ๊-เอ๋ย ปู๋ง นิ่น เญย ญิม#38:9 ญิม วั้ว โจ๋ว หว่า ก๊อง หฒุ ไจ๋-หน่ง. ด๊อด กะเดี๊ย เดา เหว่ย ไม้ ปุน ก๋อ ม่าย โฮ์ ต่อย เฒ้ย-ฟุน. 10หฒิว เฒี้ยว หมั่ง, โอนัน โหฒว เญย สี่ เซ หว่าย ไห่. เฒี้ยว หย่า ปุน นิ่น ไต่ หมี่ อ๊ะ.
11ยูดา ก๊อง บั๋ว นิ่น เญย บวั์ง, ทามา, “หฑวน มี่ง เหธา เม่ย เญย เตีย เยียม อ๊ะ. เม่ย อ๋อย หฒุ โหฒว เอ๊า-กว๊า ฒั้ว เยีย เญย ตอน, เชลา, โฮล ต้าย.” ยูดา ฮนั้ง น้าย นอ ก๊อง เหว่ย หฒุ นิ่น เยียม เฮญี้ยว ฮนั้ม เฑ่า เหย เชลา ไต่ ฮนั้ง นิ่น เญย ก๋อ บัว นอ. ทามา ฯฒฯ หฑวน นิ่น เญย เตีย เญย เปย๊า หมี่ อ๊ะ.
12เจี๋ย ต้าย, ยูดา เญย เอ๊า, ชูอา เญย เซียะ, เกวย เสย หมี่ อ๊ะ. ฒั้ว เฑ่า เญย เฒี่ยง โห่ เจี๋ย ลิ์ว, ยูดา เหธา นิ่น เญย โล์-แกง ต่อย, อาดุนลัม เมี่ยน, ฮีลา, มี่ง ทิมนาฮา, ม่าย เมี่ยน เถง จั๊บ นิ่น เญย ปะกี ยู่ง เปยย วั้ว นอม ต๋อง.
13ม่าย เมี่ยน บั๋ว ทามา, “เม่ย เญย อง-ปั่ว อ๋อย มี่ง ทิมนาฮา จั๊บ ปะกี ยู่ง เปยย.” 14ทามา ฯฒฯ เหยี่ยน ฆอย นิ่น เญย เอ๊า-กว๊า ลุย-โหว, เฒาะ คว้าย เดีย ปุ๋ย เจี๊ยน, บย์อง เจี๊ยน เฮมียน. ฒอง เหฒียง, นิ่น เฒว์ย เจี๊ยน มี่ง ทิมนาฮา เญย เจ๊า-เฮลน, เปียะ เอนาอิม มู้ง เญย ฒี่ง แก้ง ด่าง. นิ่น ฮิ้ว ตุ๊ ยูดา เญย ตอน-ลาย, เชลา, โฮล อ๊ะ, มป่า ยูดา ไม้ ปุน นิ่น หล่ง. 15ยูดา ปวัด ทามา, หล่าย นิ่น โหฒว หม่าย ป๊วน-ซิน เญย มเซียะ ตอน, เหว่ย หฒุ นิ่น ม่าย เดีย บย์อง เจี๊ยน เฮมียน. 16ยูดา มี่ง วั้ว เจ๊า-เฮลน เหธา นิ่น ก๊อง หว่า. นิ่น ก๊อง, “ต้าย ม่าะ! ปุน เยีย เหธา เม่ย เปว๋ย โอ่.” ยูดา ไม้ ฮิ้ว ตุ๊ เซ นิ่น เญย บวั์ง.
ทามา หน่าย, “เยีย เหธา เม่ย เปว๋ย, เม่ย ปุน หาย หญู่ง เยีย?”
17ยูดา เตา, “เยีย อ๋อย เฒาะ เต้า เยีย เญย ยู่ง กวั้น เญย ยู่ง ตอน ปุน เม่ย.”
ทามา เตา, “เม่ย อ๋อย หล่ง หาย หญู่ง ตี่ง เจี๊ยน ด่าง เถา เม่ย ฝูง ยู่ง ตอน ต้าย?”
18ยูดา หน่าย ก๋า, “เม่ย อ๋อย เยีย ตี่ง หาย หญู่ง ด่าง เก้า หลง?”
ทามา ก๊อง, “อ๋อย หฒุ ปุน เม่ย เญย เหยียน เหธา ดิ๋ว เหยียน เญย ฮลาง แอ๋ง เหธา เม่ย อี้ หฒั่น นั้น เจี๊ยน น้าย ติ้ว ปย๊า-บย่า.” ยูดา ฯฒฯ เฒาะ ต้าย ปุน นิ่น หมี่ อ๊ะ. ปุน เจี๊ยน ฯฒฯ เหธา นิ่น เปว๋ย. ฆะฮ้า ทามา ม่าย เจี๊ยน ยูดา เญย กู้งว์า อ๊ะ. 19ทามา หฑวน มี่ง เฒาะ ฆอย บย์อง เฮมียน เญย เดีย แอ๋ง ฒุ เจี๊ยน นิ่น เญย เอ๊า-กว๊า เญย ลุย-โหว ฮนั้ง โล์ วั้ว นอ.
20ยูดา บั๋ว นิ่น เญย โล์-แกง ต่อย, วั้ว เต้า อาดุนลัม เมี่ยน, ฮีลา, ต้อ ยู่ง ตอน มี่ง หฒัวะ นิ่น ตี่ง วั้ว เต๋ย กะน้าย หฑวน. ฮีลา มี่ง เกา, ล์อ ไม้ ปวัด วั้ว เต้า มเซียะ ตอน.
21นิ่น ฯฒฯ หน่าย ก๋า วั้ว นอม ต๋อง เญย เมี่ยน, “เยียม เอนาอิม มู้ง เญย เจ๊า-เฮลน วั้ว เต้า หม่าย ป๊วน-ซิน เญย มเซียะ ตอน เจี๋ย หาย หมี่ อ๊ะ.”
นิ่น บัว เตา, “เยียม น้าย ไม้ ม่าย หม่าย ป๊วน-ซิน เญย มเซียะ ตอน.”
22ฮีลา ฯฒฯ หฑวน มี่ง บั๋ว ยูดา, “เยีย ล์อ ไม้ ปวัด วั้ว เต้า มเซียะ ตอน. เยียม วั้ว เญย เมี่ยน หย่า ก๊อง เยียม หน่าย ไม้ ม่าย เจี๋ย หม่าย ป๊วน-ซิน เญย มเซียะ ตอน.”
23ยูดา ก๊อง, “วั้ว เต๋ย กะน้าย ธิ่น นิ่น หล่ง อ๊ะ. เหฑีย เมี่ยน อ๋อย จั๊ด บัว มเปย. ต้อ ยู่ง ตอน มี่ง อ๋อย ปุน หย่า ล์อ ไม้ ปวัด นิ่น ปุน.”
24ฆะฮ้า อ๊า ลั่ม เต๋ย ปัว หฮลา เหญียะ เญย ต๋อง, ม่าย เมี่ยน บั๋ว ยูดา, “เม่ย เญย บวั์ง, ทามา, เหฮยียน โหฆ. อี้ หฒั่น ทอย กู้งว์า อ๊ะ.”
ยูดา ก๊อง, “ต้อ นิ่น ธ้วด ต้าย ปั๊ว กวั่ง ม่าะ!”
25ต้อ ทามา ธ้วด ต้าย วั้ว หฒั่น, ทามา จุ๋ย หว่า มี่ง บั๋ว นิ่น เญย อง-ปั่ว, “เหฮยียน เยีย ทอย กู้งว์า เซ ต้ง น้าย เต๋ย กะน้าย เญย เฒี้ยว. หลงๆ เญย หมั่ง ก๋า. น้าย นอม เหยียน, ฮลาง เหธา ปย๊า-บย่า เซ หาย เต้า เญย?”
26ยูดา เฒียะ ตุ๊ น้าย เต๋ย กะน้าย เซ นิ่น เญย. นิ่น ก๊อง, “น้าย เต้า มเซียะ ตอน โหฒว เญย เซ เก้า หอบ เยีย โหฒว เญย, เหว่ย หฒุ เยีย ไม้ ปุน นิ่น หล่ง เยีย เญย ตอน, เชลา.” ฆะฮ้า ยูดา เหยียด ลิ์ว ไม้ เหธา นิ่น เปว๋ย.
27เถา ยู์ง เญย เฒี่ยง โห่ ปวัด ทามา ม่าย ซูง-กู้งว์า. 28มุน เจี๊ยน วั้ว หฒั่น, ม่าย เต้า เญย ปั์ว ธ้วด ด่าง. โก๋ว ทามา วั้ว เต้า มเซียะ ตอน เฒาะ ติ้ว เฟย-ซิ โด้ เจี๊ยน กู้งว์า เญย ปั์ว-เซย-จาง แอ๋ง ก๊อง, “น้าย เต้า ธ้วด เสย ด่าง.” 29มป่า กู้งว์า แอ๋ง ฮล้วด นิ่น เญย ปั์ว เปียะ, ตะเหญ่ย เต้า ฯฒฯ ยู์ง ธ้วด ด่าง. โก๋ว ทามา วั้ว เต้า มเซียะ ตอน ก๊อง, “โหฒว หาย หญู่ง เม่ย เบ๋ง ธ้วด ด่าง แล่?” วั้ว เต้า ตอน นิ่น บัว ฯฒฯ ธ้วด บั๋ว เห่ว เปเล้ด.#38:29 เปเล้ด เญย เอ๋ย เล์ย เซ เบ๋ง ธ้วด. 30โด้ เจี๊ยน เฟย-ซิ วั้ว เต้า ตอน ฆะฮ้า ยู์ง หย่า ธ้วด บั๋ว เห่ว เฒลา.#38:30 เฒลา เญย เอ๋ย เล์ย เซ หฑั่น ซิ.
Currently Selected:
ทิน เต่ย โต้ว 38: IuMiTH
Highlight
Share
Compare
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
