เอเฟโซ 3
3
เปาโล เหว่ย จั๋น โหฒว เญย กง
1เหว่ย น้าย เยีย, เปาโล, เหว่ย กีตู่ เยซู หย่า เหว่ย เม่ย บัว จั๋น หฒุ หววน เจี๊ยน โล่. 2เยีย ฮนั้ม ต้าย เม่ย บัว ฒู้ง ไฮ์ ก๊อง ทิน-ฮู่ง เหธย เอน ปุน เยีย ม่าย น้าย หญู่ง กง โหฒว เหว่ย เถง เม่ย บัว จั๋น. 3ทิน-ฮู่ง หล่าว ย่าง นิ่น ไม้ แก้ง บย๋าง ย่าง เญย หฒะเอ๋ย ปุน เยีย ฮิ้ว, ฮนั้ง ฒิ่น ด่าง เยีย เฟี้ย โธว เญย บั๋ว เม่ย บัว วั้ว นอ. 4เม่ย บัว โตะ ลิ์ว วั้ว เต๋ย หว่า เม่ย บัว ฯฒฯ ฮิ้ว ตุ๊ เยีย ฮนั้ง หาย นอ เปียะ เฮญี้ยว ก๊อง เถา กีตู่ น้าย เต๋ย บย๋าง ย่าง เญย สี่.#โคโลสี 1:26-27 5ฒิ่น ด่าง ทิน-ฮู่ง ไม้ ปุน เมี่ยน ฮิ้ว น้าย เต๋ย สี่ มป่า อี้ หฒั่น นิ่น หล่ง สีง ลี่ง หล่าว ย่าง ปุน นิ่น เญย ธีง-เหฑ่ง กง-โฒ่ เหธา โต่ว หว่า เมี่ยน ฮิ้ว. 6เซ ฮนั้ง น้าย. คู้ เฝียน ปุน จั๋น ม่าย ป่วน จวั่ง ทิน-ฮู่ง แล์ง ปุน ยิวไท เมี่ยน เสี่ยว เญย จา-ตี้ง, ตุ๊ จวั่ง นอม ซิน หย่า ตุ๊ ฒิบ ป่วน เอย ทิน-ฮู่ง หล่ง กีตู่ เยซู แล์ง ต้าย เญย หว่า.
7เยีย ตุ๊ โหฒว น้าย คู้ เฝียน เญย โปว เซ เหว่ย ทิน-ฮู่ง เญย เอน-ฒี่ง ฮนั้ง, ต้ง นิ่น หล่ง นิ่น เญย ต้ม ชะ เหธย ปุน เยีย เญย เอน. 8เป๊ย ทิน-ฮู่ง เญย เหยียด ฒู้ง เมี่ยน, เก้า ไฝ เจี๋ย วั้ว เต้า, เยีย หธ่อ เก้า ไฝ นิ่น. มป่า ทิน-ฮู่ง เหธย เอน ปุน เยีย ไฮ่ ฒุ่น คู้ เฝียน ก๊อง กีตู่ ด่ง หาย หลง, ฒู้ง ก๊อง ไม้ หฒ่าย เญย เอน, บั๋ว หม่าน ฝีง จั๋น. 9เยีย หย่า ก๊อง เม่ง ปุน หฒวัง เมี่ยน ฮิ้ว ตุ๊ ทิน-ฮู่ง ฒิ่น ด่าง ไม้ แก้ง บย๋าง ย่าง เญย หฒะเอ๋ย ฮนั้ง หาย นอ โหฒว เหฒียง. ฒิ่น ด่าง เยียม เหฒย ลู่ง เหฒย เดา ต้าย, ต้ง เหฒย หม่าน หมวด เญย ทิน-ฮู่ง, มวั่ง เจี๊ยน น้าย เต๋ย สี่. 10มป่า อี้ หฒั่น ทิน-ฮู่ง อ๋อย หล่ง จิว-ปาง ปุน เยียม ด๊าม-ลู่ง ม่าย หลี่ง ม่าย ชะ เญย วั้ว เต๋ย ฮิ้ว ตุ๊ ทิน-ฮู่ง เญย หญู่งๆ ธง-เม่ง. 11ทิน-ฮู่ง ฮนั้ง น้าย นอ โหฒว เซ เอย นิ่น เหยียด ลิ์ว เญย หฒะเอ๋ย, ต้ง นิ่น หล่ง บัว เญย เฒี้ยว กีตู่ เยซู โหฒว เหฒียง เญย หฒะเอ๋ย. 12บัว เสียน กีตู่, ตุ๊ เหธา นิ่น จวั่ง แหม่ง เฒี่ยง ฯฒฯ ปู๋ง หล่าง เญย ไฮ่ มี่ง เถา ทิน-ฮู่ง เญย หฑะเฮมียน, ไม้ หฒุ กั้ม เหฑีย. 13ฮนั้ง หน่าย, เยีย โท้ เม่ย บัว ไม้ ตู๋ง เฮญี้ยว หนัม, หลาย เยีย เหว่ย เม่ย บัว เสี่ยว โค้ว. น้าย เหยียด ฒู้ง เซ เหว่ย เถง เม่ย บัว ตุ๊ หลง ฮนั้ง.#3:13 กีก หว่า ก๊อง “เซ เหว่ย เม่ย บัว เญย ฌัง-หล่าง”.
เปาโล เหว่ย เอเฟโซ จิว-ปาง เต๋า เก๋า
14เหว่ย น้าย เยีย เกว่ย เหฌี่ย หฒั่ง เตี๋ย เญย หฑะเฮมียน, 15เยียม ทิน-ต้อง เหธา เยียม ป้าม เกน ไม้ กุ๊น หาย ฝีง หาย หญู่ง เมี่ยน, ก๊อง เตีย วั้ว โจ๋ว หว่า เซ เยียม หฒั่ง เตี๋ย วั้ว โจ๋ว ธ้วด ต้าย. 16เยีย โท้ หฒั่ง เตี๋ย เอย นิ่น โฮล ไห่ เญย ต้ม ฌัง-หล่าง หล่ง นิ่น เญย สีง ลี่ง เหธย ชะ ปุน เม่ย บัว เญย เฮญี้ยว กะญั์ว เฮ้น เจี์ย ต้าย. 17หย่า โท้ กีตู่, เหว่ย หฒุ เม่ย บัว เสียน นิ่น, เยียม เม่ย บัว เญย เฮญี้ยว กะญั์ว. โท้ ปุน เม่ย บัว ฮนั้ม นิ่น หย่า ฮนั้ม เมี่ยน ฮนั้ง เหฌี่ย ฑู่ง เฒี่ยง ตุ๊ ว้วน นอ. 18ฮนั้ง หน่าย, เม่ย บัว ฯฒฯ ม่าย ชะ เหธา เหยียด ฒู้ง เสียน เญย เมี่ยน ไฮ่ เม่ง แปะ กีตู่ ฮนั้ม เมี่ยน เญย เฮญี้ยว ด่ง หาย จั๊ง, ด่ง หาย ด๊าว, ด่ง หาย ฮลัง, ด่ง หาย โด. 19เยีย โท้ หฒั่ง เตี๋ย ปุน เม่ย บัว เม่ง แปะ กีตู่ ฮนั้ม เม่ย บัว ด่ง หาย ธั้ม, ไม้ กุ๊น ไม้ ม่าย หาย เต้า ไฮ่ ฮิ้ว ตุ๊ เหฑ่ง. ฮนั้ง หน่าย, ม่าย ตุ้น ยุ่น เญย ทิน-ฮู่ง เญย เฟียม-ฝีง เยียม ปวั๊ง เม่ย บัว เญย เฮญี้ยว อ๊ะ.
20ทิน-ฮู่ง, เอย นิ่น หล่ง นิ่น เญย ต้ม ชะ เยียม บัว เญย เฮญี้ยว กะญั์ว โหฒว กง, ฒู้ง ไฮ่ โหฒว เก้า ธั้ม บัว ไฮ่ โท้ เญย ไฟ ฮนั้ม ตุ๊ เถา เญย. 21เยีย ฯฒฯ โท้ นิ่น หล่ง กีตู่ เยซู เยียม จิว-ปาง ปุน เมี่ยน เหยียด ลิ์ว เธง นิ่น เถา หม่าน โก๊ว หม่าน ต่อย. อาเมน.
Currently Selected:
เอเฟโซ 3: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007