หฑั่ม เล์ย-หลัด 31
31
โยซูวา หฑิบ เจี๊ยน โหฒว โมเซ เญย กง
1โมเซ แอ๋ง ก๊อง น้าย เต๋ย เหยียด ฒู้ง หว่า บั๋ว อิสะลาเอน เญย หฒวัง เมี่ยน. 2นิ่น ก๊อง, “เยีย อี้ หฒั่น ปวั๊ง เหยียด แป๊ะ หญี่ เหฒียบ หฮญัง อ๊ะ. เยีย ไม้ ไฮ่ ต้อ ไม้ ตุ๊ เม่ย บัว. เฒี้ยว บั๋ว เยีย, ‘เม่ย ไม้ ตุ๊ เจี๋ย จอแดน ด้าย.’#ซ้าว เมี่ยน 20:12 3เฒี้ยว, เม่ย บัว เญย ทิน-ฮู่ง กั้น, อ๋อย มี่ง ด่าง เยี์ยน เม่ย บัว, เยียม เม่ย บัว เญย วั้ว ด่าง แหมง เหมียด เหฑ่ง วั้ว เต๋ย ฝีงๆ เมี่ยน. เม่ย บัว ฯฒฯ ตุ๊ นิ่น บัว เญย เต่ย-ปูง เป๋น เม่ย บัว เญย ป่วน เต่ย-ปูง. โยซูวา อ๋อย มี่ง ด่าง ต้อ เม่ย บัว ฮนั้ง เฒี้ยว ก๊อง วั้ว นอ. 4เฒี้ยว อ๋อย โหฒว ปุน วั้ว เต๋ย ฝีงๆ เมี่ยน ฮนั้ง นิ่น โหฒว ปุน อาโมไล เมี่ยน เญย ฮู่ง, สิโหน เหธา โอก, เลี่ยม นิ่น บัว เญย เต่ย-ปูง เหมียด เหฑ่ง.#ซ้าว เมี่ยน 21:21-35 5เฒี้ยว อ๋อย เฒาะ นิ่น บัว จิว ปุน เม่ย บัว. เม่ย บัว อ๋อย หฒุ หฒิว เยีย หัด เม่ย บัว เญย เหยียด ฒู้ง หว่า โหฒว ปุน นิ่น บัว. 6เม่ย บัว อ๋อย หฒุ เฮ้น, หฒูง เจี๊ยน ต๊าม. ไม้ ตู๋ง กั้ม เหฑีย นิ่น บัว ฯฒฯ แฮะ กั้น, เหว่ย หฒุ เฒี้ยว, เม่ย บัว เญย ทิน-ฮู่ง, เหธา เม่ย บัว มี่ง. นิ่น เหยียด ลิ์ว ไม้ ปู๋ง ด๊อด เม่ย บัว หย่า ไม้ กวั่ง เม่ย บัว.”
7โมเซ เห่ว โยซูวา ต้าย ตอง เจี๊ยน อิสะลาเอน เญย หฒวัง เมี่ยน ก๊อง บั๋ว นิ่น, “เม่ย อ๋อย หฒุ เฮ้น, ต๊าม โฮล เญย, เหว่ย หฒุ เม่ย อ๋อย หฒุ เหธา น้าย เต๋ย แปะ ฝีง เปียะ เฒี้ยว เหธา นิ่น บัว เญย อง-ถาย แล์ง จิว ปุน นิ่น บัว เญย เต่ย-ปูง. เม่ย อ๋อย หฒุ ต้อ นิ่น บัว เปียะ มี่ง ตุ๊ วั้ว นอม เต่ย-ปูง เป๋น นิ่น บัว เญย ป่วน. 8เฒี้ยว กั้น อ๋อย เยียม เม่ย เญย วั้ว ด่าง แหมง. นิ่น เหยียด ลิ์ว ไม้ ปู๋ง ด๊อด เม่ย หย่า ไม้ กวั่ง เม่ย. ไม้ ตู๋ง กั้ม เหฑีย หย่า ไม้ ตู๋ง เฮญี้ยว ฮวาง.”#โยซูวา 1:5; ฮิบลู 13:5
เสี่ย หฮญัง อ๋อย หฒุ โตะ หฑุ่น เล์ย-หลัด โซว
9โมเซ ฯฒฯ เฟี้ย น้าย เต๋ย เล์ย-หลัด จิว ปุน เลวี ไซ เมี่ยน, ต้ง แกง เฒี้ยว เญย แล์ง แหง่ง หว่า ฟาง เญย ไซ เมี่ยน, เหธา อิสะลาเอน เมี่ยน เญย หฒวัง เมี่ยน โก๋. 10โมเซ หัด นิ่น บัว, “โม์ว หฑุ่น ปวั๊ง เสี่ย หฮญัง วั้ว หฮญัง,#เลวี 25:1-7; หฑั่ม เล์ย-หลัด 15:12 เซ ต้ง กวั่ง แฒะ เญย หฮญัง, ต๋อย บย๊อ ลิ่ว ฒิบ เญย เฒี่ยง โห่,#หฑั่ม เล์ย-หลัด 16:13-15 11อิสะลาเอน เญย หฒวัง เมี่ยน กั๊บ ฒุ้น เยียม เฒี้ยว, เม่ย บัว เญย ทิน-ฮู่ง, เญย หฑะเฮมียน, เซ เยียม นิ่น กิ๊น ต้าย เญย ต๋อง วั้ว หฒั่น, เม่ย อ๋อย หฒุ โตะ น้าย เต๋ย เล์ย-หลัด ปุน นิ่น บัว หมวัง. 12อ๋อย หฒุ เห่ว หฒวัง เมี่ยน, เลี่ยม มจั่ง มเซียะ เหธา ฝุเจว๊ย, เลี่ยม เยียม เม่ย บัว เญย ฒี่ง เญย กั้น ฝีง เมี่ยน, ต้าย กั๊บ ฒุ้น เหว่ย ปุน นิ่น บัว ตุ๊ ไฮ์ หย่า โหะ หลิ่น ท่าย เฒี้ยว, เม่ย บัว เญย ทิน-ฮู่ง, หย่า กัน หลง น้าย เต๋ย เล์ย-หลัด เญย เหยียด ฒู้ง หว่า. 13นิ่น บัว เญย เฒ้ย-ฟุน, ต้ง ไม้ ไฮ์ เจี๋ย น้าย เต๋ย เล์ย-หลัด วั้ว เต๋ย, ฯฒฯ ตุ๊ ไฮ์ หย่า โหะ หลิ่น ท่าย เฒี้ยว, เม่ย บัว เญย ทิน-ฮู่ง, ตะฟ่าน เม่ย บัว ตุ๊ เยียม เจี๊ยน เม่ย บัว อี้ หฒั่น อ๋อย เจี๋ย วั้ว หง่าน หฒิ จอแดน ด้าย ตุ๊ เป๋น เม่ย บัว เญย ป่วน วั้ว นอม เต่ย-ปูง.”
เฒี้ยว พ้าย ปุน โมเซ ฆะฮ้า ลาย เญย หว่า
14 เฒี้ยว ก๊อง บั๋ว โมเซ, “เม่ย เกวย เสย เญย ฮนอย-เหญียะ เถา ฟัด อ๊ะ. อ๋อย หฒุ เห่ว โยซูวา เหธา เม่ย มี่ง หวุ่ย ปวั้ง เญย ด๊บ-ลิ่ว, เยีย ฯฒฯ พ้าย นิ่น.” โมเซ เหธา โยซูวา ฯฒฯ เปียะ หวุ่ย ปวั้ง เญย ด๊บ-ลิ่ว กะญั์ว.
15 เฒี้ยว หิ่น ต้าย เยียม บ๋วน-เดี้ยว กะญั์ว, ด๊บ-ลิ่ว เญย แก้ง ด่าง กู้ หงว่าย. 16เฒี้ยว แอ๋ง ก๊อง บั๋ว โมเซ, “ไม้ เล่า เม่ย อ๋อย หฒุ เกวย เสย.#31:16 ฮิบลู หว่า ก๊อง “อ๋อย หฒุ มี่ง เหธา เม่ย เญย อง-ถาย บัว เยียม.” เอ๋ย เล์ย เซ ไต่. ฆะฮ้า น้าย เต๋ย แปะ ฝีง ฯฒฯ ไม้ เหฒียบ ฒัวะ เญย กัน เยีย. นิ่น บัว อ๋อย มี่ง หฒั่ง ต้ง นิ่น บัว มี่ง เยียม วั้ว นอม เต่ย-ปูง เญย กั้น ฝีง เมี่ยน เญย เฒี่ยน. นิ่น บัว อ๋อย กวั่ง เยีย หย่า ป์าม เยีย เหธา นิ่น บัว เหลียบ เจี์ย เญย แหง่ง หว่า. 17เถา วั้ว ฮนอย เยีย ฯฒฯ เฉีย เจี์ย ไห่ นิ่น บัว หย่า กวั่ง นิ่น บัว. เยีย อ๋อย ปวัง เจี๊ยน เยีย เญย เฮมียน, ไม้ หมั่ง นิ่น บัว. นิ่น บัว ฯฒฯ หฒุ เหมียด, หฒุ เธี้ยว เญย สี่ เหธา ต้ม เหฒะ หน่าน ห่อย นิ่น บัว. เถา วั้ว ฮนอย นิ่น บัว ฯฒฯ หน่าย, ‘บัว หฒุ น้าย เต๋ย เหฒะ หน่าน หลาย บัว เญย ทิน-ฮู่ง ไม้ เหธา บัว เยียม ไม้ เฒ์ย?’ 18เถา วั้ว ฮนอย เยีย ฒู้ง อ๋อย ปวัง เจี๊ยน เยีย เญย เฮมียน, ไม้ หมั่ง นิ่น บัว, หลาย นิ่น บัว โหฒว เหยียด ฒู้ง หว่าย สี่, ป๋าย เหญี่ย เญย เฒี่ยน.
19“อี้ หฒั่น เม่ย บัว อ๋อย หฒุ เฟี้ย น้าย ติ้ว ฑูง หฌาว อิสะลาเอน เมี่ยน โหะ เถา หฒัวะ เหว่ย ปุน เยีย หล่ง โหฒว ฒอง-เหฒง โก๋ นิ่น บัว. 20เยีย อ๋อย ต้อ นิ่น บัว เปียะ วั้ว นอม เดา-โท้ว หลง เญย เต่ย-ปูง,#31:20 เป๊ย หมั่ง ธ้วด อียิบ 3:8. เซ ต้ง เยีย เหธา นิ่น บัว เญย อง-ถาย โฮ้ว เจี๊ยน แล์ง ปุน เญย เต่ย-ปูง. เยียม วั้ว นอม เต่ย-ปูง นิ่น บัว ตุ๊ หญั่น เป๊ว หย่า คู่ เยียม. นิ่น บัว ฯฒฯ ฮวิน มี่ง หฒั่ง เหญี่ย เญย เฒี่ยน กวั่ง เยีย, หย่า ป์าม เยีย เหธา นิ่น บัว แล์ง เญย แหง่ง หว่า. 21นิ่น บัว หฒุ เหฒีย หญู่ง เหฒะ หน่าน เหธา เธี้ยว เญย สี่ เญย เฒี่ยง โห่, น้าย ติ้ว ฑูง ฯฒฯ โหฒว ฒอง-เหฒง โก๋ นิ่น บัว, เหว่ย หฒุ นิ่น บัว เญย เฒ้ย-ฟุน หฒั่นๆ ปุ้ย น้าย ติ้ว ฑูง, ไม้ หละคุ. ไม้ กุ๊น เยีย ไม้ แก้ง ต้อ นิ่น บัว เปียะ เยีย โฮ้ว ปุน นิ่น บัว เญย เต่ย-ปูง, นิ่น บัว เญย เฮญี้ยว อ๋อย ฮนั้ง หาย นอ โหฒว เยีย ฒู้ง ฮิ้ว หมี่ อ๊ะ.” 22ต้ง วั้ว ฮนอย โมเซ ฯฒฯ เฟี้ย น้าย ติ้ว ฑูง ต้าย แอ๋ง หฌาว อิสะลาเอน เมี่ยน.
23 เฒี้ยว ฮนั้ง น้าย นอ พ้าย นุน เญย ตอน, โยซูวา, “เม่ย อ๋อย หฒุ เฮ้น, ต๊าม โฮล เญย, เหว่ย หฒุ เม่ย ฒู้ง อ๋อย หฒุ ต้อ อิสะลาเอน เมี่ยน เปียะ เยีย โฮ้ว ปุน นิ่น บัว เญย เต่ย-ปูง. เยีย กั้น อ๋อย เหธา เม่ย เยียม.”#ซ้าว เมี่ยน 27:23; โยซูวา 1:6
24โมเซ เฒาะ น้าย เต๋ย เล์ย-หลัด เญย หว่า เยียม กอน เถา เซ้ด เมว์ย เฟี้ย เหฌี่ย โซว เหฑ่ง หมี่ อ๊ะ. 25นิ่น ฯฒฯ พ้าย แกง เฒี้ยว เญย แล์ง แหง่ง หว่า ฟาง เญย เลวี เมี่ยน. 26นิ่น ก๊อง, “เฒาะ น้าย หฌุ่น เล์ย-หลัด โซว อัน เจี๊ยน เฒี้ยว, เม่ย บัว เญย ทิน-ฮู่ง, เญย แล์ง แหง่ง หว่า ฟาง กะเฮลน. อัน เจี๊ยน หน่าย เหว่ย โหฒว ฒอง-เหฒง โก๋ เม่ย บัว อิสะลาเอน เมี่ยน. 27เยีย ฮิ้ว ตุ๊ เม่ย บัว ด่ง หาย เฮญี้ยว แหง่ง, มน่อม โฮ์. เยีย หธ่อ เฒี่ยง เจี๊ยน เหธา เม่ย บัว เยียม เญย เฒี่ยง โห่, เม่ย บัว ด่ง หน่าย แหง่ง เฒี้ยว, เยีย ไต่ มี่ง เญย เฒี่ยง โห่, เม่ย บัว อ๋อย ด่ง หาย แหง่ง ไม้ ฮิ้ว อ๊ะ. 28อ๋อย หฒุ เห่ว เม่ย บัว ฝีงๆ เญย หฒวัง เมี่ยน โก๋ เหธา เม่ย บัว เญย เหยียด ฒู้ง เจียน ต้าย กั๊บ ฒุ้น. เยีย ฯฒฯ ก๊อง น้าย เต๋ย หว่า ปุน นิ่น บัว หมวัง หย่า เห่ว ลู่ง เหธา เดา โหฒว ฒอง-เหฒง โก๋ นิ่น บัว. 29เหว่ย หฒุ เยีย ฮิ้ว ตี่ง, เยีย ไต่ มี่ง, ฆะฮ้า เม่ย บัว อ๋อย กวั่ง เยีย หัด เม่ย บัว เญย เหยียด ฒู้ง หว่า, มี่ง โหฒว หว่าย สี่. เฒี้ยว ปวัด เม่ย บัว โหฒว เญย เอ๊าะ สี่ เหธา เม่ย บัว เญย ปั์ว โหฒว ธ้วด เญย กะน้าย, ฯฒฯ ธัวะ นิ่น เฉีย เจี์ย ไห่ หธีง ต้าย ฆะฮ้า ฮี้ง เม่ย บัว อ๋อย หฒุ ต้ม เหฒะ หน่าน.”
โมเซ เญย ฑูง
30โมเซ ฯฒฯ โตะ ตอง น้าย ติ้ว ฑูง เญย หว่า ปุน อิสะลาเอน เญย หฒวัง เมี่ยน หมวัง.
Currently Selected:
หฑั่ม เล์ย-หลัด 31: IuMiTH
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
