กง-โฒ่ 2
2
สีง ลี่ง เหฌี่ย
1เจี๋ย เพนเทค้อด ฒิบ วั้ว ฮนอย เถา, นิ่น บัว เหยียด ฒู้ง#2:1 เซ “เสียน เยซู เญย หฒวัง เมี่ยน” ไฟ ไซ-ก๋อ บัว. กั๊บ ฒุ้น เยียม นอม ต๋อง.#เลวี 23:15-21; หฑั่ม เล์ย-หลัด 16:9-11 2เลี่ยม เฒ่ย เยียม ลู่ง ม่าย เฉีย บุย ฮนั้ง ป์อง ต้ม หฑยาว นอ, บุย ปวั๊ง นิ่น บัว เฒว์ย วั้ว นอม เปย๊า. 3นิ่น บัว ปวัด หิ่น ธ้วด ต้าย ฮนั้ง โต์ว-เบียด นอ, หฑาน เหฌี่ย เถา นิ่น บัว เต้าๆ เมี่ยน. 4โม์ว เต้า ตุ๊ สีง ลี่ง ปวั๊ง เฮญี้ยว ฯฒฯ เจี์ย กอน ก๊อง ธ้วด กั้น หญู่ง หว่า ต้าย, เอย สีง ลี่ง ต้อ นิ่น บัว ก๊อง.
5วั้ว หฒั่น ม่าย ลู่ง เดี๊ย นอมๆ กั๊วะ, กัน หลง ทิน-ฮู่ง เญย ยิวไท เมี่ยน, ต้าย ฮิด เยลูซาเลม ฒี่ง. 6นิ่น บัว ไฮ์ น้าย เต๋ย เฉีย บุย, เมี่ยน ธั้ม ฯฒฯ กั๊บ ฒุ้น ต้าย. นิ่น บัว ฮนั้ม ไม้ เม่ง แปะ เหว่ย หฒุ เก๊าะ-เมี่ยน ไฮ์ วั้ว เต๋ย เมี่ยน ก๊อง เก๊าะ-เมี่ยน เญย ฮยาง-ปูง หว่า. 7หฒวัง เมี่ยน ฮนั้ม ไม้ เม่ง แปะ หย่า บัวะ ฮ่อง ไห่, ฯฒฯ หน่าย ก๋า, “อ๊า, ก๊อง เจี๊ยน หว่า น้าย เต๋ย เหยียด ฒู้ง เมี่ยน ไม้ เฒ์ย กาลิลี เมี่ยน ไฟ? 8นิ่น บัว ฮนั้ง หาย นอ ไฮ่ ก๊อง เยีย บัว เต้าๆ เมี่ยน เญย ฮยาง-ปูง หว่า นี? 9เยีย บัว เซ ปานเทีย เมี่ยน, มีเดีย เมี่ยน, เอลาม เมี่ยน, เหธา เยียม เมโสโปเตเมีย เต่ย-ปูง ต้าย เญย เมี่ยน, เยียม ยูเดีย, คับปาโดเซีย, ปอนทัด, เอเซีย, 10ฟาลีเจีย เหธา ปัมฟีเลีย แซ้ง ต้าย เญย เมี่ยน, เยียม อียิบ เต่ย-ปูง เหธา ลิเบีย กั๊วะ นิด ไซลีน มู้ง วั้ว เต๋ย ต๋อง ต้าย เญย เมี่ยน, หย่า ม่าย โลมา ฒี่ง ต้าย เญย แคะ เมี่ยน, เลี่ยม ยิวไท เมี่ยน แอ๋ง เหธา กัน ยิวไท เมี่ยน เสียน ทิน-ฮู่ง เญย จั๋น. 11ม่าย เต๋ย เยียม เคลี้ด ค้อย-โฑว ต้าย, เหธา เยียม อาละเบีย เต่ย-ปูง ต้าย เญย เมี่ยน. เยีย บัว เก๊าะ-เมี่ยน ไฮ์ นิ่น บัว ก๊อง ธ้วด เก๊าะ-เมี่ยน เญย ฮยาง-ปูง หว่า เธง ทิน-ฮู่ง โหฒว บัวะ ฮ่อง เญย สี่.” 12นิ่น บัว บัวะ ฮ่อง ไห่, ฮนั้ม ไม้ ทง. ล่าน หน่าย ล่าน, “เอ๊! หน่าย โหฒว หาย หญู่ง แล่?”
13มป่า ม่าย เต๋ย จั๊ด เจี๊ยน ก๊อง, “อ๊า, น้าย เต๋ย เมี่ยน ติ๊ว ฆวิน ฮนั้ง.”
ปีเต ก๊อง เม่ง น้าย เต๋ย สี่
14ปีเต เหธา เจี๊ยน วั้ว เต๋ย เหฒียบ เยี้ยด เต้า กง-โฒ่ ฯฒฯ โซ้ว เจี์ย ต้าย หล่ง เฉีย โฮล เญย ก๊อง บั๋ว หฒวัง เมี่ยน, “ยิวไท เมี่ยน เญย หฒวัง ก๋อ-โย์ว เหธา เยียม เยลูซาเลม ฒี่ง เญย หฒวัง เมี่ยน อ้า! เม่ย บัว แปง มน่อม หมวัง หลง โอ่. เยีย อ๋อย ก๊อง เม่ง น้าย เต๋ย สี่. 15เม่ย บัว หล่าย น้าย เต๋ย เมี่ยน ฮบ ติ๊ว ฆวิน มป่า ไม้ เฒ์ย. อี้ หฒั่น ลู่ง ต้ม ดอม ฮนั้ง. 16น้าย เต๋ย สี่ ธ้วด ต้าย เอย เจี๊ยน โต่ว หว่า เมี่ยน, โยเอน, ก๊อง เญย หว่า. นิ่น ก๊อง,
17‘ทิน-ฮู่ง ก๊อง, ฆะฮ้า ลาย เญย ฮนอย
เยีย อ๋อย โต๋ เยีย เญย สีง ลี่ง เหธย ปุน หม่าน เมี่ยน.
เม่ย บัว เญย ตอน, เม่ย บัว เญย เซียะ อ๋อย เถง เยีย โต่ว หว่า.
เม่ย บัว เญย เมี่ยน หลุน เมี่ยน อ๋อย ปวัด หิ่น ย่าง เญย สี่.
เม่ย บัว เญย เมี่ยน โก๋ เมี่ยน อ๋อย เบ๋ยๆ.#โยเอน 2:28-32
18เยียม วั้ว เต๋ย ฮนอย เยีย หย่า อ๋อย โต๋ เยีย เญย สีง ลี่ง
เหธย ปุน เยีย เญย มจั่ง โปว, มเซียะ โปว,
นิ่น บัว ฯฒฯ เถง เยีย โต่ว หว่า.
19เยียม กู้ หงว่าย ลู่ง เยีย อ๋อย โหฒว ธ้วด บัวะ ฮ่อง เญย สี่.
เยียม กะเดี๊ย เดา อ๋อย โหฒว ธ้วด จั๋ง-โห่,
ม่าย ฑย้าม, ม่าย โต์ว, ม่าย โต์ว-เสียว-ตน.
20เฒี้ยว หล่ง เจี๊ยน เจี๋ย เญย ต้ม ฮนอย ไม้ แก้ง เถา,
บะฮนอย อ๋อย เจี๊ยะ มี่ง,
หฮลา หย่า อ๋อย ซิ มี่ง ฮนั้ง ฑย้าม นอ.
21วั้ว หฒั่น หาย เต้า เห่ว เฒี้ยว เญย บั๋ว,
วั้ว เต้า ฯฒฯ ตุ๊ เหฌียว.’
22“อิสะลาเอน ก๋อ-โย์ว อ้า! หมวัง เยีย ก๊อง เญย หว่า โอ่. นาซาเล้ด มู้ง เญย เยซู, ทิน-ฮู่ง ปุน เยียม เม่ย บัว น้าย โหฒว ธ้วด บัวะ ฮ่อง, ฮนั้ม ไม้ เม่ง แปะ เญย สี่, หย่า โหฒว จั๋ง-โห่ ปุน เม่ย บัว ฮิ้ว ตี่ง นิ่น เซ เยียม ทิน-ฮู่ง ต้าย. 23ทิน-ฮู่ง เอย นิ่น กั้น เญย หฒะเอ๋ย จา-ด่าง ตี่ง เหฒียง ปุน เยซู หฒุ เฒาะ จิว ปุน เม่ย บัว. เม่ย บัว หย่า ปุน เอ๊าะ เมี่ยน เฒาะ นิ่น ตีง เจี๊ยน เหฒียบ หฑั่ง จ๋า ไต๋ นิ่น.#มัดทาย 27:35; มาโค 15:24; ลูกา 23:33; โยฮัน 19:18 24มป่า ทิน-ฮู่ง ปุน นิ่น แอ๋ง นั่ง ต้าย, เปย๋า ดุ๊ด ไฮ่ ไต่ เญย โค้ว หน่าน, เหว่ย หฒุ ไฮ่ ไต่ เญย ชะ กุ๊น ไม้ เจี๊ยน นิ่น.#มัดทาย 28:5-6; มาโค 16:6; ลูกา 24:5-6 25ฮนั้ง ดาวิด ฮู่ง ก๊อง เถา นิ่น นอ, นิ่น ก๊อง,
‘เยีย ปวัด เฒี้ยว หฒั่นๆ เยียม เยีย เญย หฑะเฮมียน.
นิ่น เยียม เยีย เญย บย่าว แหมง ปูง,#2:25 “ปุน เมี่ยน เยียม บย่าว แหมง ปูง,” เญย เอ๋ย เล์ย เซ ท่าย เมี่ยน.
ฯฒฯ ไม้ ม่าย หาย หญู่ง ไฮ่ ดั่น หฒุ เยีย.#สีง ฑูง 16:8-11
26เหว่ย น้าย เยีย อะเฮน้ย ไห่,
หย่า ก๊อง ธ้วด เฌียน-โย่ว เญย หว่า.
เยีย เญย ซิน อ๋อย ตุ๊ เฒี่ยง เจี๊ยน ม่าย ลั่ม ฮนั้ม ต๋อง,
27เหว่ย หฒุ เม่ย ไม้ กวั่ง เยีย เญย ลี่ง ว่วน เยียม เยี่ยม เกน,#2:27 ม่าย เต๋ย โซว ฟาน ต้าย ก๊อง เต่ย หญัวะ. เยียม 2:31 ฟี่ ฮนั้ง เญย.
หย่า ไม้ ปุน เม่ย เญย ธีง-เหฑ่ง โปว เญย เซย ฮู้.
28เม่ย ปุน เยีย ฮิ้ว ตุ๊ เฒี่ยง แหม่ง เญย เจ๊า.
เม่ย เหธา เยีย เยียม ฯฒฯ ปุน เยีย เฌียน-โย่ว ออน-เหลาะ เถา ต้าว.’
29“หฒวัง ก๋อ-โย์ว อ้า! เยีย อ๋อย ปู๋ง หล่าง เญย ก๊อง เถา บัว เญย อง-ถาย-แงะ, ดาวิด ฮู่ง, เญย เจ๊า-โหล่ว. นิ่น เกวย เสย หย่า ปย๊บ เจี๊ยน. นิ่น เญย โฒ้ว หธ่อ เยียม บัว น้าย เถา อี้ จ๋า ฮนอย. 30นิ่น โหฒว เต้า โต่ว หว่า เมี่ยน หย่า ฮิ้ว ตุ๊ ทิน-ฮู่ง เหธา นิ่น แล์ง แหง่ง หว่า อ๋อย ปุน เต้า นิ่น เญย เฒ้ย-ฟุน โหฒว ฮู่ง ฮนั้ง ดาวิด กั้น โหฒว ฮู่ง นอ.#2:30 กีก หว่า ก๊อง “เฒว์ย ดาวิด ฮู่ง เญย เหว่ย”.#2 ซามูเอน 7:12-13; สีง ฑูง 132:11 31ดาวิด จา-ด่าง ฮิ้ว เหฒียง ฆะฮ้า ฮี้ง อ๋อย ธ้วด เญย สี่ ฯฒฯ ก๊อง กีตู่ อ๋อย นั่ง ต้าย เญย เจ๊า-โหล่ว. ดาวิด ก๊อง, ‘นิ่น ไม้ หฒุ กวั่ง เยียม เยี่ยม เกน. นิ่น เญย เซย หย่า ไม้ ฮู้.’#สีง ฑูง 16:10 32ต้ง น้าย เต้า เยซู ไต่ มี่ง, ทิน-ฮู่ง ปุน นิ่น แอ๋ง นั่ง ต้าย. เยีย บัว เหยียด ฒู้ง ฮิ้ว ตุ๊ นิ่น หฒะเก้ง นั่ง ต้าย ฯฒฯ เหว่ย น้าย เต๋ย สี่ โหฒว ฒอง-เหฒง. 33ทิน-ฮู่ง ต้อ เยซู ฝาว มี่ง เยียม นิ่น เญย บย่าว แหมง, หย่า เอย นิ่น แล์ง เญย หว่า เหธย สีง ลี่ง ปุน เยซู. เยซู ฯฒฯ โต๋ สีง ลี่ง เหฌี่ย ปุน เยีย บัว, เซ ต้ง อี้ หฒั่น เม่ย บัว ปวัด เญย เหธา ไฮ์ เญย. 34ไม้ เฒ์ย ดาวิด กั้น ฝาว ทิน-ต้อง มป่า นิ่น ก๊อง,
‘เฒี้ยว ก๊อง บั๋ว เยีย เญย เฒี้ยว,
เฒว์ย เจี๊ยน เยีย เญย บย่าว แหมง ปูง,#สีง ฑูง 110:1
35ฒั้ว เยีย ปุน เม่ย เญย วิน-วั้ง
โหฒว เม่ย หลอง เหฒา เญย ต๋อง.’
36“ฮนั้ง หน่าย, อิสะลาเอน เญย หฒวัง เมี่ยน อ๋อย หฒุ ฮิ้ว ตี่ง, ต้ง เม่ย บัว ตีง เหฒียบ หฑั่ง จ๋า น้าย เต้า เยซู, ทิน-ฮู่ง ออน โหฒว เฒี้ยว หย่า โหฒว กีตู่.”
37หฒวัง เมี่ยน ไฮ์ ลิ์ว น้าย เต๋ย หว่า, ฯฒฯ ไฮ์ เฮญี้ยว มุน ไห่, ฮนั้ง กะน้าย ป๊ะ เจี๊ยน บะฑิว นอ. นิ่น บัว หน่าย ก๋า ปีเต เหธา เหยียด ฒู้ง กง-โฒ่, “ก๋อ-โย์ว อ้า! เยีย บัว อ๋อย หฒุ ฮนั้ง หาย นอ โหฒว?”
38ปีเต เตา, “เม่ย บัว เต้าๆ อ๋อย หฒุ ก๊อย เฮญี้ยว กวั่ง ฒุ์ย, เต๊ง เยซู กีตู่ เญย บั๋ว เจี๋ย ววม เญย เล์ย, เหว่ย ตุ๊ ทิน-ฮู่ง กวั่ง เม่ย บัว เญย ฒุ์ย. เม่ย บัว ฯฒฯ ตุ๊ ฒิบ ทิน-ฮู่ง เหธย ปุน เญย สีง ลี่ง. 39ทิน-ฮู่ง แล์ง น้าย เต๋ย แหง่ง หว่า เซ เหว่ย เม่ย บัว เหธา เม่ย บัว เญย ฟุน-ฟะ, หย่า เหว่ย เหยียด ฒู้ง เยียม โก เญย เมี่ยน, ต้ง เฒี้ยว, บัว เญย ทิน-ฮู่ง, เห่ว ต้าย เป๋น นิ่น เญย แปะ ฝีง วั้ว เต๋ย.”
40ปีเต แอ๋ง ก๊อง หว่า ธั้ม เญย โหฒว ฒอง-เหฒง ขวิน นิ่น บัว. นิ่น ก๊อง, “เม่ย บัว อ๋อย หฒุ เหฌียว เม่ย บัว กั้น เปย๋า ดุ๊ด น้าย ต่อย เฮญี้ยว หว่าย เญย เมี่ยน อ๋อย หฒุ ตี่ง เญย ฒุ์ย.” 41เมี่ยน ธั้ม เญย เสียน ปีเต เญย หว่า ฯฒฯ เจี๋ย ววม เญย เล์ย. ต้ง วั้ว ฮนอย ม่าย เล่ย ไม้ โก ปัว ธิน เต้า เมี่ยน ทิม เปียะ กง-โฒ่ บัว เญย กวั้น. 42นิ่น บัว หล่ง เฮญี้ยว หมวัง กง-โฒ่ บัว หฌาว เล์ย หย่า ล่ม ฑ่อย จิว ทง, จวั่ง เจี๊ยน แมะ ฌั้ว#2:42 นิ่น บัว แมะ ฌั้ว เหว่ย จิว ทง หย่า เหว่ย โหฒว ฮนั้ง เยซู หฌาว นิ่น เญย ไซ-ก๋อ บัว โหฒว นอ. เป๊ย หมั่ง มัดทาย 26:26-29. หย่า เต๋า เก๋า.
เสียน เยซู เญย เมี่ยน ฮนั้ง หาย นอ เยียม
43กง-โฒ่ บัว โหฒว ธั้ม-หญู่ง จั๋ง-โห่ เหธา บัวะ ฮ่อง เญย สี่, หฒวัง เมี่ยน หย่า กั้ม เหฑีย ไห่. 44เสียน เยซู เญย เมี่ยน กั๊บ ฒุ้น เยียม.#2:44 ไฟ “เหยียด เฒย ม่าย จิว ทง ธั้ม เจี๊ยน ฝาว”. ม่าย หาย หญู่ง นิ่น บัว จวั่ง เจี๊ยน หล่ง.#กง-โฒ่ 4:32-35 45นิ่น บัว หย่า หม่าย นิ่น บัว เญย ลี่ง เต่ย จา-ตี้ง กะน้าย, เฒาะ วั้ว เต๋ย ญ่าน หฒิว เก๊าะ-เมี่ยน เฉียม หล่ง เญย ปุน ฆอย หล่ง. 46นิ่น บัว ฮนอยๆ กั๊บ ฒุ้น เยียม หฒั่ง ทิน-ฮู่ง เญย เปย๊า หย่า เยียม นิ่น บัว เญย เปย๊า แมะ ฌั้ว.#2:46 เป๊ย หมั่ง 2:42 วั้ว เหยี่ยม. นิ่น บัว จวั่ง หญั่น จวั่ง ฮบ, ล่ม ฑ่อย อะเฮน้ย, หล่ง เหฑ่ง เฮญี้ยว โหฒว, 47หย่า เธง ทิน-ฮู่ง. หฒวัง เมี่ยน หย่า ท่าย นิ่น บัว. เฒี้ยว ฮนอยๆ ปุน ตุ๊ เหฌียว เญย เมี่ยน ทิม เปียะ นิ่น บัว เญย กวั้น.
Currently Selected:
กง-โฒ่ 2: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007