2 ซามูเอน 10
10
ดาวิด เบ๊าะ ฮี่ง อัมโมน เมี่ยน เหธา ซีเลีย เมี่ยน
(เป๊ย หมั่ง 1 ฒุ่น ต่อย โต้ว 19:1-19)
1เจี๋ย ต้าย ฆะฮ้า, อัมโมน เมี่ยน เญย ฮู่ง, ไต่ หมี่ อ๊ะ. นิ่น เญย ตอน, ฮานูน, หฑิบ เจี๊ยน โหฒว ฮู่ง. 2ดาวิด ก๊อง, “เยีย อ๋อย เหธา นาหาด เญย ตอน, ฮานูน, โหฒว หลง, เหว่ย หฒุ นิ่น เญย เตีย โหฒว หลง ปุน เยีย.” ดาวิด ฯฒฯ พ้าย เต๋ย โต่ว เฝียน เมี่ยน มี่ง เถง นิ่น ไจ๊ เฑ่า เหว่ย หฒุ นิ่น เญย เตีย ไต่.
ดาวิด เญย โต่ว เฝียน เมี่ยน มี่ง เถา อัมโมน เต่ย วั้ว หฒั่น, 3โหฒว โฮล เญย อัมโมน เมี่ยน ก๊อง บั๋ว นิ่น บัว เญย เฒี้ยว, ฮานูน, “เม่ย ฮนั้ม ต้าย ดาวิด พ้าย เมี่ยน ต้าย เถง เม่ย ไจ๊ เฑ่า เซ เหว่ย ท่าย เม่ย เญย เตีย ไฟ? นิ่น เญย เมี่ยน ไม้ เฒ์ย ต้าย ธ้าย จั๊วะ, ฒ่า เต่ย-ปูง อ๋อย เบี๊ยน น้าย นอม ฒี่ง ไฟ?” 4ฮานูน ฯฒฯ เฒาะ ดาวิด เญย เมี่ยน ต้าย, เถย เหยียด ป่วน นิ่น บัว เญย ซยาม หย่า จั๊บ นิ่น บัว เญย ลุย-โหว นั้ง เถา ด๊าม-กู้ ค้วด-นอม แอ๋ง ปู๋ง นิ่น บัว หฑวน.
5ม่าย เมี่ยน เฒาะ น้าย เต๋ย เมี่ยน เญย สี่ มี่ง บั๋ว ดาวิด วั้ว หฒั่น, ดาวิด พ้าย เมี่ยน มี่ง ฒิบ นิ่น บัว เหว่ย หฒุ นิ่น บัว หฒะเก้ง! ไญ้ ไห่ อ๊ะ. ฮู่ง เตี๋ย ก๊อง, “กุ๊น เยียม เยลีโค ฒั้ว ซยาม แอ๋ง ด๊าว หธีง หฑวน.”
6อัมโมน เมี่ยน ฮิ้ว ตุ๊ ดาวิด เฉีย เจี์ย นิ่น บัว, นิ่น บัว ฯฒฯ ธี้ง เยียม เบดเลโหบ เหธา โสบา เญย ซีเลีย แปง, เซ อี หว่าน เต้า ยั่ง เดา แปง, หย่า ธี้ง มาอาคา ฮู่ง เหธา เหยียด ธิน เต้า แปง, แอ๋ง เหธา เยียม โท้บ เต่ย-ปูง ต้าย เญย เหยียด หว่าน อี ธิน เต้า.
7ดาวิด หมวัง ไฮ์ น้าย เต๋ย สี่, นิ่น พ้าย โยอาบ เหธา นิ่น เญย เหยียด ฒู้ง เบ๊าะ จ๋า เฮ้น เญย แปง ธ้วด มี่ง. 8อัมโมน เมี่ยน ธ้วด ต้าย เยียม นิ่น บัว เญย ฒี่ง แก้ง ด่าง หฒิว เบ๊าะ จ๋า เญย เหยียด เหญ่ย ไบ้ เจี๊ยน. เยียม โสบา เหธา เลโหบ เญย ซีเลีย เมี่ยน เหธา โท้บ เมี่ยน, มาอาคา เมี่ยน แอ๋ง กั้น เยียม นอม ต๋อง ฌัง เญย, เซ เยียม นอม ต๋อง เญย เดา-ฮวาง.
9โยอาบ ปวัด เบ๊าะ จ๋า เญย เมี่ยน ไบ้ เจี๊ยน เยียม นิ่น เญย วั้ว ด่าง แหมง เหธา นิ่น เญย ฆะฮ้า ฆาง, นิ่น ฯฒฯ กิ๊น เหฒียง เยียม อิสะลาเอน เก้า เฮ้น เจี๋ย เญย แปง ปุน นิ่น บัว ต๋อย ซีเลีย เมี่ยน ไบ้ เจี๊ยน เบ๊าะ ซีเลีย เญย แปง.#10:9 เป๊ย หมั่ง 1 ฒุ่น ต่อย โต้ว 18:5-6. 10เหฒ่ง เหฌี่ย เญย แปง นิ่น จิว ปุน นิ่น เญย โย์ว, อาบีไช, กุ๊น หย่า พ้าย นิ่น บัว มี่ง เบ๊าะ อัมโมน เมี่ยน. 11โยอาบ ก๊อง, “สี ก๊อง ซีเลีย เมี่ยน เญย ชะ เก้า เฮ้น เจี๋ย เยีย, เม่ย อ๋อย หฒุ ต้าย เถง เยีย. มป่า สี ก๊อง อัมโมน เมี่ยน เญย ชะ เก้า เฮ้น เจี๋ย เม่ย, เยีย ฯฒฯ มี่ง เถง เม่ย. 12อ๋อย หฒุ เฮ้น หย่า อ๋อย หฒุ เหว่ย บัว เญย เมี่ยน เหธา บัว เญย ทิน-ฮู่ง เญย ฒี่ง โหฒว จุน-เฒ้ย เมี่ยน. โท้ เฒี้ยว โหฒว หฒิว นิ่น ปวัด หอบ หฒุ โหฒว เญย.”
13โยอาบ เหธา กัน นิ่น วั้ว เต๋ย แปง ธ้วด มี่ง เบ๊าะ ซีเลีย เมี่ยน. ซีเลีย เมี่ยน ฯฒฯ เยียม โยอาบ เญย วั้ว ด่าง แหมง ถิว เปย๋า. 14อัมโมน เมี่ยน ปวัด ซีเลีย เมี่ยน ถิว เปย๋า, นิ่น บัว หย่า เยียม โยอาบ เญย โย์ว, อาบีไช เญย วั้ว ด่าง แหมง เปย๋า เปียะ ฒี่ง กะญั์ว. โยอาบ ฯฒฯ กวั่ง ไม้ เบ๊าะ อัมโมน เมี่ยน. นิ่น หฑวน เยลูซาเลม หมี่ อ๊ะ.
15ซีเลีย เมี่ยน ปวัด นิ่น บัว กั้น เซวย อิสะลาเอน เมี่ยน, นิ่น บัว ฯฒฯ แอ๋ง กั๊บ ฒุ้น ต้าย. 16ฮาดัดเอเซ ฮู่ง พ้าย โต่ว เฝียน เมี่ยน มี่ง ล์อ ยูเฟติด ด้าย ตง ปูง แหมง เญย ซีเลีย เมี่ยน ต้าย. นิ่น บัว ฯฒฯ ต้าย เถา เฮลาม หย่า ม่าย ฮาดัดเอเซ เญย จุน-แปง เญย ต้ม แปง-เปย๊ย, โซบัก, ต้อ นิ่น บัว.
17ม่าย เมี่ยน ก๊อง บั๋ว ดาวิด, ดาวิด ฯฒฯ เห่ว อิสะลาเอน เญย หฒวัง เมี่ยน กั๊บ ฒุ้น เจี๋ย วั้ว หง่าน หฒิ จอแดน ด้าย มี่ง เหธา ซีเลีย เมี่ยน ต๋อย เฮมียน หฒิว เบ๊าะ จ๋า เญย เหยียด เหญ่ย ไบ้ เจี๊ยน. ดาวิด ไบ้ เหฒียง แปง ฯฒฯ มี่ง เบ๊าะ ซีเลีย เมี่ยน. ซีเลีย เมี่ยน แอ๋ง เหธา นิ่น บัว เบ๊าะ. 18มป่า ซีเลีย เมี่ยน เยียม อิสะลาเอน เมี่ยน เญย วั้ว ด่าง แหมง ถิว เปย๋า. ดาวิด หย่า ไต๋ ซีเลีย เมี่ยน ฒ้าง เบ๊าะ จ๋า เญย ม์า-เธีย เญย แปง เธี้ยด แป๊ะ เต้า, เหธา เก้ ม์า แปง เปยย หว่าน เต้า, แอ๋ง ปุน ซีเลีย เมี่ยน เญย จุน-แปง-เปย๊ย, โซบัก, หฒุ มุน. นิ่น ฯฒฯ เยียม หน่าย เบ๊าะ จ๋า เธี้ยง ไต่ หมี่ อ๊ะ. 19เยียม ฮาดัดเอเซ เญย ปั์ว-เดี๊ย วั้ว เต๋ย เหยียด ฒู้ง ฮู่ง ปวัด นิ่น บัว หฒุ อิสะลาเอน เมี่ยน เบ๊าะ ป่าย, นิ่น บัว ฯฒฯ เหธา อิสะลาเอน เมี่ยน ก๊อง หอบ, แอ๋ง เยียม นิ่น บัว เญย ปั์ว-เดี๊ย.
เหว่ย น้าย, ฆะฮ้า ซีเลีย เมี่ยน ไม้ ก๊าม เถง อัมโมน เมี่ยน อ๊ะ.
Currently Selected:
2 ซามูเอน 10: IuMiTH
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
