1 ซามูเอน 18
18
โยนาทาน เหธา ดาวิด แล์ง เจี์ย แหง่ง หว่า
1ดาวิด เหธา เซาโล ก๊อง ลิ์ว หว่า, โยนาทาน หฒะเก้ง ฮนั้ม ไห่ ดาวิด, ฒู้ง ฮนั้ม ด่ง ฮนั้ม นิ่น กั้น เญย แหม่ง. 2วั้ว ฮนอย เซาโล เลี่ยว เจี๊ยน ดาวิด เหธา นิ่น เยียม, ไม้ ปุน หฑวน นิ่น เญย เตีย เญย เปย๊า. 3โยนาทาน ฯฒฯ เหธา ดาวิด แล์ง เจี์ย แหง่ง หว่า, เหว่ย หฒุ นิ่น ฮนั้ม ดาวิด ด่ง ฮนั้ม นิ่น กั้น เญย แหม่ง. 4โยนาทาน ฯฒฯ ไจ๊ นิ่น เญย ลุย-ด๊าว เหธา เบ๊าะ จ๋า เญย ลุย, เลี่ยม นิ่น เญย หฑุ ด๊าว เหธา จวัง-หฒิน เหธา โหว-ฮลาง ปุน ดาวิด.
5ไม้ กุ๊น เซาโล พ้าย ดาวิด มี่ง โหฒว หาย หญู่ง, ดาวิด หย่า โหฒว ตุ๊ ธ้วด เญย. เซาโล ฯฒฯ ออน ดาวิด โหฒว จุน-แปง เญย เปย๊ย. ฮนั้ง น้าย โหฒว, หฒวัง แปะ ฝีง เหธา เซาโล เญย เจียน เหยียด ฒู้ง อะเฮน้ย เญย.
เซาโล เหมว่ย เจี๊ยะ ดาวิด
6ดาวิด ไต๋ ลิ์ว วั้ว เต้า ฟีลิสะเตีย เมี่ยน, เหธา เจี๊ยน หฒวัง เมี่ยน หฑวน วั้ว หฒั่น, ม่าย เต๋ย มเซียะ ตอน เยียม อิสะลาเอน เญย หฒวัง ฒี่ง ธ้วด ต้าย หธัง เหย ป๋าว เจี๊ยน ฑูง ต้าย ฒิบ เซาโล ฮู่ง. นิ่น บัว เฌียน-โย่ว เญย ป๋าว ฑูง เบ๊าะ ล่อ เบ๊าะ โฑ์ หย่า พัด ต้าน ป้า. 7วั้ว เต๋ย มเซียะ ตอน เหยียด ปิ่น หธัง เหย, เหยียด ปิ่น ป๋าว ฑูง, เตา จ๋า ก๊อง,
“เซาโล ไต๋ เมี่ยน เป๋น ธินๆ,
ดาวิด ไต๋ เมี่ยน เป๋น หว่านๆ.”#1 ซามูเอน 21:11; 29:5
8เซาโล หฒะเก้ง! เฉีย เจี์ย ไห่. น้าย เต๋ย หว่า ไม้ หอบ นิ่น เญย เฮญี้ยว. นิ่น ก๊อง, “นิ่น บัว เธง ดาวิด ไต๋ เมี่ยน เป๋น หว่านๆ, มป่า นิ่น บัว ก๊อง เยีย ไต๋ เมี่ยน เป๋น ธินๆ ฮนั้ง. ธ้วด ลิ์ว กั๊วะ หฒั่ง ดาวิด แอ๋ง ไฮ่ ตุ๊ หาย หญู่ง?” 9เยียม วั้ว ฮนอย ต้าย เซาโล ปู๋ง มฒีง หมั่ง เจี๊ยน ดาวิด.
10ตะเหญ่ย ฮนอย ม่าย เต้า เอ๊าะ เญย เมี้ยน เยียม ทิน-ฮู่ง ต้าย ม่อ เซาโล. เซาโล เยียม กั้น เญย เปย๊า ชะ ก๊อง ไม้ ฑัง เญย หว่า. ดาวิด ฮนั้ง เหยียด เกา พัด ต้าน ป้า ปุน เซาโล หมวัง. เซาโล เญย ปั์ว นั้น เจี๊ยน ธัง. 11เซาโล ฯฒฯ ปิว ธัง มี่ง. นิ่น เยียม เฮญี้ยว ฮนั้ม, “เยีย อ๋อย ฑบ ดาวิด ปั่ง หฌ่ง ตีง เจี๊ยน.” มป่า อี หฑุ่น ดาวิด ฒู้ง ซิ้ม ดุ๊ด หมี่ อ๊ะ.
12เซาโล ฯฒฯ กั้ม เหฑีย ดาวิด, เหว่ย หฒุ เฒี้ยว เหธา ดาวิด เยียม มป่า เล่ย ฆอย เซาโล หมี่ อ๊ะ. 13ฮนั้ง หน่าย เซาโล เห่ว ซุ้ย ดาวิด มี่ง เล่ย ฆอย นิ่น, หย่า ออน นิ่น กุ๊น เหยียด ธิน เต้า แปง. ดาวิด ต้อ แปง เปียะๆ ธ้วดๆ เญย เบ๊าะ จ๋า. 14ไม้ กุ๊น ดาวิด โหฒว หาย หญู่ง นิ่น หย่า โหฒว ตุ๊ ธ้วด เญย, เหว่ย หฒุ เฒี้ยว เหธา นิ่น เยียม. 15เซาโล ปวัด ดาวิด โหฒว ตุ๊ ธ้วด หญู่งๆ นิ่น ฯฒฯ กั้ม เหฑีย ไห่ ดาวิด. 16มป่า อิสะลาเอน เญย หฒวัง เมี่ยน เหธา ยูดา เมี่ยน ฮนั้ม ดาวิด, เหว่ย หฒุ ดาวิด หฒั่นๆ ต้อ นิ่น บัว เปียะๆ ธ้วดๆ.
17เซาโล ก๊อง บั๋ว ดาวิด, “น้าย เซ เยีย เญย เซียะ-โฮล, บั๋ว เห่ว เมล้าบ. เยีย อ๋อย ปุน เม่ย หล่ง โหฒว เอ๊า. เม่ย ขูง อ๋อย หฒุ เหว่ย เยีย โหฒว ต๊าม โฮล, เถง เฒี้ยว เบ๊าะ จ๋า.” เหว่ย หฒุ เซาโล เยียม เฮญี้ยว ฮนั้ม, “เยีย ไม้ หล่ง เยีย เญย ปั์ว ห่อย นิ่น. เยีย ปุน ฟีลิสะเตีย เมี่ยน ห่อย นิ่น ฮนั้ง.”
18ดาวิด เตา เซาโล, “เยียม อิสะลาเอน กั๊วะ เยีย ต้ง หาย เต้า? เยีย เญย เธียน-เธะ ไฟ เยีย เญย เตีย เญย โต้ว ฒง หย่า ต้ง หาย เต้า? เยีย ฝู่ง ไฮ่ ผุย ตุ๊ โหฒว ฮู่ง เตี๋ย เญย เซียะ-ล่าง?” 19ฆะฮ้า เถา เฒี่ยง โห่ ปู๋ง เซาโล เญย เซียะ, เมล้าบ, จิว ปุน ดาวิด, มป่า เซาโล ปู๋ง ปุน อาดลีเอน เมี่ยน, เมโหลา, หล่ง โหฒว เอ๊า หมี่ อ๊ะ.
20เซาโล เญย กั้น เต้า เซียะ, มีคาน, ฮนั้ม ดาวิด. ม่าย เมี่ยน มี่ง บั๋ว เซาโล. เซาโล หย่า หอบ เฮญี้ยว เญย. 21เซาโล เยียม เฮญี้ยว ฮนั้ม, “เยีย ปู๋ง เยีย เญย เซียะ ปุน นิ่น เหว่ย ปุน เยีย เญย เซียะ ฮนั้ง ฮลาง ฮลบ เจี๊ยน นิ่น, ฟีลิสะเตีย เมี่ยน เญย ปั์ว ฯฒฯ ไฮ่ ห่อย นิ่น อ๊ะ.” ฮนั้ง หน่าย, เซาโล ฯฒฯ ก๊อง ตะเหญ่ย หฑุ่น บั๋ว ดาวิด, “เม่ย อ๋อย หฒุ โหฒว เยีย เญย เซียะ-ล่าง.”
22เซาโล ก๊อง บั๋ว นิ่น เญย โปว, “อ๋อย หฒุ ปี๋ง เจี๊ยน ก๊อง บั๋ว ดาวิด, ‘ฮู่ง เตี๋ย อะเฮน้ย ไห่ เม่ย. ฮู่ง เตี๋ย เญย เหยียด ฒู้ง โปว หย่า ฮนั้ม เม่ย. ฮนั้ง หน่าย, เม่ย กุ๊น โหฒว ฮู่ง เตี๋ย เญย เซียะ-ล่าง อ๊ะ.’”
23เซาโล เญย โปว ฯฒฯ เฒาะ น้าย เต๋ย หว่า ก๊อง ปุน ดาวิด หมวัง, มป่า ดาวิด ก๊อง “เม่ย บัว หล่าย โหฒว ฮู่ง เตี๋ย เญย เซียะ-ล่าง เซ ไฝ-ฟิ้ว เญย สี่ ไฟ? เยีย เป๋น เมี่ยน จ่ม เมี่ยน, ไม้ ม่าย หาย หญู่ง เม่ง โห่ เญย เมี่ยน.”
24เซาโล เญย โปว บั๋ว เซาโล, “ดาวิด ฮนั้ง น้าย ก๊อง.” 25เซาโล ก๊อง บั๋ว นิ่น บัว, “เม่ย บัว กุ๊น ฮนั้ง น้าย ก๊อง บั๋ว ดาวิด, ‘ฮู่ง เตี๋ย ไม้ หล่ง หาย หญู่ง เล์ย-กีง. ขูง อ๋อย หล่ง ฟีลิสะเตีย เมี่ยน เญย เหยียด แป๊ะ นอม ไจ๋-เฒว้ย ด๊บ เหว่ย จ๊าว เซี่ยว ปุน ฮู่ง เตี๋ย เญย วิน-วั้ง.’” เซาโล ต๊า หฒะเอ๋ย ปุน ฟีลิสะเตีย เมี่ยน เญย ปั์ว ไต๋ ดาวิด.
26วั้ว เต๋ย โปว ฯฒฯ ก๊อง น้าย เต๋ย หว่า ปุน ดาวิด หมวัง. ดาวิด ฯฒฯ ปวั๊ง เฮญี้ยว โหฒว ฮู่ง เตี๋ย เญย เซียะ-ล่าง. ตี่ง เหฒียง เญย เฒี่ยง โห่ ไม้ แก้ง เถา, 27ดาวิด เหธา กัน นิ่น เญย เมี่ยน มี่ง ไต๋ หญี่ แป๊ะ เต้า ฟีลิสะเตีย เมี่ยน. ดาวิด ฯฒฯ ต้อ วั้ว เต๋ย เมี่ยน เญย เหยียด ฒู้ง ไจ๋-เฒว้ย ด๊บ ต้าย เฒาะ ปวั๊ง โสว โหม่ว ปุน ฮู่ง เตี๋ย เหว่ย ปุน นิ่น ตุ๊ โหฒว ฮู่ง เตี๋ย เญย เซียะ-ล่าง. เซาโล ฯฒฯ เฒาะ นิ่น เญย เซียะ มีคาน, ปู๋ง ปุน ดาวิด หล่ง โหฒว เอ๊า.
28เซาโล หมั่ง หย่า ฮิ้ว ตุ๊ เฒี้ยว เหธา ดาวิด เยียม. เซาโล เญย เซียะ มีคาน หย่า ฮนั้ม ดาวิด. 29เซาโล ฯฒฯ เก้า ฟัด กั้ม เหฑีย ดาวิด. ฮนั้ง หน่าย เซาโล หฒั่นๆ โหฒว ดาวิด เญย วิน-วั้ง.
30ฟีลิสะเตีย เมี่ยน เญย แปง-เปย๊ย หฒั่นๆ ธ้วด ต้าย เบ๊าะ จ๋า. ไม้ กุ๊น นิ่น บัว ธ้วด ต้าย บัวะ เหฒีย หฑุ่น, ดาวิด เบ๊าะ ฮี่ง เก้า ธั้ม เซาโล เญย หฒวัง แปง-เปย๊ย. ดาวิด ฯฒฯ ตุ๊ เม่ง เต้า โฮล ไห่.
Currently Selected:
1 ซามูเอน 18: IuMiTH
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
