Johana 1
1
Jeso unasemwa ndiye Neno wa Mulungu
1Phapho mwanzo phokala urumwengu kʼaudzangwe kuumbwa, Neno wa Mulungu wakalako. Yiye wakala u na Mulungu, na hata yiye naye wakala ni Mulungu. 2Ukati uo wa mwanzo, Neno wa Mulungu wakala u kuko kare na Mulungu. 3Vyumbe vyosi vyaumbwa kwa njiraye, na kʼakuna hata chumbe chimwenga choumbwa photsʼi yiye. 4Yiye ndiye chanzo cha uzima, na uzima uo ndio mwanga wa anadamu. 5Na mwanga uo unaamwirikira atʼu ario dzizani. Anjine a o atʼu ario dzizani ákala kʼaawenzi na achiheza kuuziza, ela achishindwa vivyo.
6 #
Mat 3:1; Mar 1:4; Luk 3:1, 2 Yiye ariye ndiye mwanga phokala u phephi na kudza, Mulungu wamuhuma mutʼu mumwenga aihiwaye Johana, 7kudzaambira atʼu dzuluye, kwa hata atʼu osi amukuluphire kuchirira yiye Johana. 8Yiye wakala tsʼiye uo mwanga, ela wakudza tu yiye, kudzaambira atʼu dzulu ya yiye ariye ndiye mwanga.
9Yiye ariye ndiye mwanga wa jeri wakala unadza duniani, na yiye unaamwirikira atʼu osi. 10Yiye wakudza duniani, na hata yo dunia yaumbwa kwa njiraye, ela atʼu a yiyo dunia kʼaamumanyire. 11Yiye walokera na kwa atʼue enye, ela anji a o atʼue enye kʼaamukubalire. 12Ela aratʼu osi omukubali na kumukuluphira, waahenda akale na haki ya kukala anangwa a Mulungu. 13Ao kʼaavyalirwe kulairirana na mulatso, hebu kwa konana chimwiri, na hebu kwa mutʼu kuhenza apate ana, ela Mulungu mwenye ndiye Abayao.
14Yiye Neno wa Mulungu wakala mudamu, na wasagala naswi. Siswi hwawona uo ubomuwe, ubomu urio ni wa yiye Mwana wa hicheye yelaa kwa Baba Mulungu na yiye u tele mbazi, na ujeri. 15Yiye ndiye mutʼu ariye Johana Mubatizi waambira atʼu dzuluye phogomba kwa laka ra dzulu kukala, “Yuyu ndiye yekala ninamuhadza phoamba, ‘Yendakudza nyuma zangu una widimi muno kuriko mimi, mana, wakalako hangu phokala tsʼidzangwe kuvyalwa.’ ” 16Na kwahivira wakala u tele mbazi, udzenderera kuhwonera mbazi. 17Maana, Mulungu walavya Shariya kuchirira Musa, na achionyesa mbazize na ujeriwe kuchirira Jeso Kʼirisito. 18Kʼakuna hata mumwenga yekala udzimona Mulungu kare. Ela yiye Mwana wa hicheye, ariye naye ni Mulungu na kʼarichana na Mulungu, wahumanyisa vivyo Mulungu arivyo.
Johana Mubatizi unadzisema ni ani
(Matayo 3:1-12; Mariko 1:1-8; Luka 3:1-18)
19Vilongozi a Ayahudi kuko Jerusalemu áahuma makuhani na Alawi kwa Johana akamuuze vivi, “Uwe u ani?” 20Johana ariphokwendauzwa, kʼaremere kwaudzidza, ela wagomba lwazu-lwazu kukala, “Mimi tsʼimi yiye Kʼirisito.” 21#Mal 4:5; Kʼumb 18:15, 18Ao achimwamba, “Tsʼigo gago, hwambire we u ani? Vidze, uwe u Eliya?” Johana achiudzidza achiamba, “Ngʼo, tsʼimi Eliya mino.” Ao achimuuza kahiri achimwamba, “Ukale ndiwe yiye mugomvi wa Mulungu?” Johana achiudzidza achiamba, “Ngʼo, tsʼimi mino!” 22Ao achimuuza kahiri achimwamba, “Bee, uwe u yuphiye sambi? Hwambire uwe u ani kwa hata hukaambire ohuhuma nao amanye.” 23#Isa 40:3Phapho Johana achiudzidza achiamba,
“Mimi ndimi mutʼu niriye ninagomba kwa laka ra dzulu kuko nyika kukala,
‘Yiikeni tititi njira ya Bwana Mulungu.’ ”
Maneno dza gago gágombwa chimbere ni mugomvi wa Mulungu Isaya.
24Anjine a ao atʼu okala ahumwa, ákala ni Afarisayo. 25Ndo ao achimuuza Johana vivi, “Uchikala we tsʼiwe yiye Kʼirisito, hebu Eliya, hebu yiye mugomvi wa Mulungu, kwadze unabatiza?” 26Johana achiaudzidza achiaamba, “Mino ninabatiza na madzi, mana, yiye Kʼirisito u phapha kati yenu, hata itsʼiphokala ni kʼamudzangwe kumumanya. 27Yiye ndiye yendakudza nyuma zangu, na mimi tsʼiwirya hata kukala muhendikaziwe wa kumuvula virahu.” 28Maneno gago gáhendeka kuko Betania, ngʼambo ya muho wa Jorodani kokala Johana unabatiza atʼu.
Jeso ndiye Mwanagonzi wa Mulungu
29Kunadzachakwe, Johana wamona Jeso unadza kwakwe, na achiamba, “Asenani, yuyatʼu ndiye Mwanagonzi wa Mulungu ausaye dambi za dunia! 30Yuyatʼu ndiye yekala ninagomba dzuluye niriphoamba, ‘Yendakudza nyuma zangu una widimi muno kuriko mimi, mana, wakalako hangu phokala tsʼidzangwe kuvyalwa.’ 31Hata mimi mwenye nákala tsʼimumanya ni ani, ela nákudza nichibatiza atʼu na madzi, kwa hata nimumanyise kwa Aiziraeli.”
32Ndo phapho Johana achanza kwaambira atʼu jisi arivyomumanya mutʼu yiye. Yiye waamba, “Mimi nidzona Roho wa Mulungu unatserera na umbo dza ra ngiya kulaa mulunguni, na akahurira dzulu-dzuluye. 33Hata mimi tsʼingamumanyire ni ani, itsʼiphokala Mulungu phokala unanihuma nibatize atʼu wanamba, ‘Mutʼu yendamona utserererwa ni Roho wangu, na ahurire dzulu-dzuluye, yiye ndiye yendaabatiza atʼu na Roho wa Mulungu.’ 34Ndo vivyo nidzivyona, na ninamwambira kukala, yuyu ni Mwanangwa wa Mulungu.”
Ahumwa a Jeso a mwanzo
35Tsʼiku yotuwiriza, Johana wakala wimire phamwenga na anafunzie airi. 36Ariphomona Jeso unachira, waamba vivi, “Lolani! Yuyatʼu ndiye Mwanagonzi wa Mulungu.” 37Ao ahumwa airi ágasikira maneno gago, na achimutuwa Jeso. 38Jeso aripholola nyuma na kona ao ahumwa airi anamutuwa, waauza vivi, “Mutsakulani?” Ao nao achimuuza achiamba, “Rabi” (yiriyo maanaye ni mwalimu), “Kwani uwe usagalaphi?” 39Jeso achiaamba, “Nituwani namwi mundakona.” Ao anafunzi achimutuwa, na achiphaona phapho phatʼu phokala achisagala. Ukati uo, gari ni madzuwa ga dziloni, kwa vivyo, achimarigiza dzuwa naye phapho.
40Mumwenga wa ao ariosikira Johana unagomba na kumutuwa Jeso, wakala ni Andireya nduguye Simoni Pʼetero. 41Ndo Andireya waanza kwendamutsakula nduguye Simoni mwanzo hata achimona. Ariphomona wamwamba, “Hwamona yiye Masihi” (yiriyo maanaye ni Kʼirisito). 42Chisha, achimuphirika Simoni kwa Jeso. Jeso naye achimulola Simoni, na achiamba, “Uwe u Simoni mwana wa Johana. Na vivi nidzikuhatsʼa rinjine ndiwe Kefa,” (ririro kwa Chiyunani ni Pʼetero).#1:42 Madzina gaga ga Pʼetero na Kefa maana yao ni mwamba.
Filipu na Natanieli anakala anafunzi a Jeso
43Kunadzachakwe, Jeso wakwenda jimbo ra Galilaya. Kuko, wakwendamona Filipu na achimwamba, “Filipu, nituwa.” 44Filipu wakala ni muchina Betisaida, kadzidzi kolaa ano Andireya na Pʼetero. 45Ndo Filipu naye achendamona Natanieli na achimwamba, “Natanieli, hudzimona Jeso mwana wa Jesefu, kulaa Nazareti. Yiye ndiye yehadzwa ni Musa na agomvi a Mulungu anjine kukala undakudza.” 46Ela Natanieli achimwamba, “Hangu rini chitʼu chidzo chikalaa Nazareti?” Filipu achimwamba, “Unaambadze? Hebu hinde ukamone.” 47Jeso ariphomona Natanieli unaloka, waamba, “Munamona yiye alokaye! Yiye bee ni Mwiziraeli mwenye, na mwakwe ndani kʼamuna ulongo.” 48Natanieli achimuuza achimwamba, “Udzinimanyadze?” Jeso achimwamba, “Uwe phodzikala u kolo ra mutini, na hata phodzikala Filipu kʼadzangwe kukwiha, mino nidzikala ninakona vivyo.” 49Phapho Natanieli achimwamba, “Mwalimu, uwe u Mwanangwa wa Mulungu jeri. Uwe u Mufalume wa Iziraeli!” 50Jeso achimwamba, “Vidze, udzikuluphira vino kwakukala, nidzikwamba, nidzikona hangu u kolo ra mutini? Hʼaya bee manya kukala, undaona mabomu kuchira gaga.” 51#Mwa 28:12Jeso achenderera kwamba, “Ninamwambira jeri-jeri, mundaona mbingu zifunuka, na mone malaikangwa a Mulungu anakwera, na kutserera kwa mimi Mutʼu yelaa dzulu.”
Currently Selected:
Johana 1: CHIDUR
Highlight
Share
Copy
Want to have your highlights saved across all your devices? Sign up or sign in