Exodo 20

Iginhatag an Napulo nga mga Sugo

(Deut. 5:1-21)

1Naghimangraw an Dyos, ngan amo ini an iya mga pulong: 2“Ako amo an Ginoo nga iyo Dyos nga nagdara ha iyo tikang ha Ehipto, diin mga oripon kamo.

3“Ayaw kamo pagsingba hin lain nga diyos labot ha akon.

4“Ayaw kamo paghimo para ha iyo ngahaw hin mga ladawan hin bisan ano nga butang nga aadto ha langit, o aanhi ha tuna, o aadto ha tubig, ha ilarom han tuna. 5Ayaw kamo pagyukbo o pagsingba hin bisan ano nga diyosdiyos, kay ako amo an Ginoo nga iyo Dyos ngan maabugho ako nga Dyos. Kinakastigo ko adton mga nagdudumot ha akon ngan an ira mga tulin, tubtob ngadto han ikatulo ngan ikaupat nga katulinan. 6Kundi ipinapakita ko an akon paghigugma ngadto ha yinukot nga mga katulinan#20:6 yinukot nga mga katulinan; o yinukot. hadton mga nahigugma ha akon ngan nagsusugot han akon mga balaod.

7“Ayaw niyo paggamita an akon ngaran hin maraot nga panuyo, kay ako, an Ginoo nga iyo Dyos magakastigo han bisan hin-o nga nagamit han akon ngaran hin diri kaangayan.

8“Tumana niyo an Adlaw nga Igparahuway ngan pagbaraana ini nga adlaw. 9May-ada niyo unom ka adlaw hin pagbuhat han ngatanan niyo nga buruhaton, 10kundi adlaw hin pagpahuway an ikapito ka adlaw ngan ighahalad ini niyo ha akon. Dida hito nga adlaw kinahanglan waray magtrabaho—bisan kamo, an iyo mga anak, an iyo mga oripon, an iyo mga hayop, o an mga lumalangyaw nga nag-uokoy dida han iyo nasod. 11Sulod hin unom ka adlaw ako nga Ginoo naghimo han tuna, han langit, han kadagatan, ngan han ngatanan nga aada hini, kundi pinmahuway ako dida han ikapito nga adlaw. Amo ito nga ako nga Ginoo nagbendisyon han Adlaw nga Igparahuway ngan ginhimo ko ini nga baraan.

12“Tahora niyo an iyo amay ug an iyo iroy, basi maghilawig an iyo kinabuhi didto han tuna nga ihinahatag ko ha iyo.

13“Ayaw kamo pagpatay hin tawo.

14“Ayaw kamo panlibog.

15“Ayaw kamo pangawat.

16“Ayaw kamo pagsumbong hin buwa kontra han iyo igkasi-tawo.

17“Ayaw kamo kaipa han balay hin lain nga tawo; ayaw kaipa han iya asawa, han iya mga oripon, han iya mga baka, han iya mga asno, o han bisan ano nga iya mga butang.”

Nahadlok an mga Tawo

(Deut. 5:22-33)

18Han pakabati han mga tawo han dalugdog ngan han tunog han trompeta, ngan han pakakita nira han kikidlat ngan han nag-usbok nga aso ha bukid, nangurog hira hin kahadlok ngan pinmahirayo hira hin pagtindog. 19Nagsiring hira kan Moises, “Mamamati kami kon ikaw an maghimangraw ha amon; kundi nahadlok kami nga, kon an Dyos an maghimangraw ha amon, magkakamatay kami.”

20Binmaton hi Moises, “Ayaw kamo kahadlok; kinmahi la an Dyos hin pagsari ha iyo ngan hin pag-aghat nga dayuday magsugot kamo ha iya, basi diri kamo makasala.” 21Kundi pinmahirayo la gihapon hin pagtindog an mga tawo, ngan hi Moises la an hinmarani han madakmol nga dampog diin nakadto an Dyos.

Naghatag hin mga Balaod Hiunong hin mga Altar

22Nagsugo an Ginoo kan Moises nga sidngon niya an mga Israelita: “Hinkit-an na niyo kon gin-unan-o ko nga Ginoo hin pakighimangraw ha iyo tikang ha langit. 23Ayaw kamo paghimo para ha iyo kalugaringon hin kadiyosan nga salapi o bulawan nga pagsisingbahon niyo ngan itatampo ha akon. 24Paghimo kamo hin altar nga tuna para ha akon, ngan ighalad dida hini an iyo mga karnero ngan mga baka sugad nga mga halad nga tinubod ngan sugad nga mga halad hin pakig-urosa. Ha tagsa nga dapit nga akon igingahin nga pagsisingbahan niyo ha akon, makada ako ha iyo ngan magbibendisyon ako ha iyo. 25Kon magtindog kamo hin altar nga bato para ha akon, ayaw niyo pagtindoga ini tikang hin tinabas nga mga bato, kay kon ginagamitan niyo hin tigib an pagtabas han mga bato, hinihimo ini niyo nga diri na angay hin paggamit para han akon. 26Ayaw kamo pagtindog hin altar para ha akon nga may-ada mga balitang tipaigbaw, kay bangin ha pagsaka humuwaw kamo.

Currently Selected:

Exodo 20: MBBSAM

Highlight

Copy