YouVersion Logo
Search Icon

Exodo 20

20
Saray Samploran Ganggan
1Say Dios nansalita a kuanto: 2“Siak so Katawan a Dios yo ya angipaway ed sikayod Egipto ya akaaripenan yo.
3“Ag mo igagalang iray arum a diriyos; siak labat so igalang mo.
4“Ag mo igagawaay sikan dili na talintao odino antokaman a kaolibay na bengatlan walad tawen odino walad tapew na dalin odino bengatlan walad danum diad dalem na dalin. 5Ag ka ondadakmomo odino mangigagalang ed saraya, ta siak, say Katawan a Dios mo, et maimon ak. Dusaen ko ray mamosul ed siak tan saray kabyangay boleg da ya anggad kumatlo tan kumapat a kailalakan. 6Balet aroen ko ray nilibon kailalakan na saray mangarod siak tan mangonur na saray ganggan ko.
7“Ag mo ikakanad maoges iran getma so ngaran ko a Yahweh#20:7 YAHWEH: Nengneng yoy Gen. 2:4. a Dios mo, ta dusaen koy siopaman a mangikanad ngaran ko diad andi-kakanaan a pamaakaran.
8“Ngilinan moy Agew na Panagpainawa tan ipasen mon masanto. 9Anem agew a makapankimey ka, 10balet say kumapiton agew et agew na panagpainawa a nisaklang ed siak. Diad sayan agew nepeg ya anggapoy toon mankimey: sika, saray anak mo, saray aripen mo, saray ayayep mo, odino saray sangkailin manaayam ed bansam. 11Diad loob na anemiran agew siak a Katawan et pinalsak so tawen tan dalin, saray dayat tan amin a logan da, balet diad kumapiton agew nampainawa ak. Sikato yay makasengeg a siak a Katawan et binindisionan koy Agew na Panagpainawa tan ginawak a masanto.
12“Igalang moy amam tan say inam, pian andokey so pambilay mo ed dalin ya iter kod sika.
13“Ag ka mamapatey.
14“Ag ka mikakaloguran.
15“Ag ka mantatakew.
16“Ag ka mantitila no mantasi ka sumpad kaparam a too.
17“Ag mo iibegan so abung na kaparam a too; ag mo iibegan so asawa to, saray aripen to, saray baka to, saray asno to, odino antokaman a kayaryan to.”
Saray Takot na saray Totoo
(Deut. 5:22-33)
18Nen nadngel na saray totoo so karul tan say tanul na trumpita tan anengneng day kirmat tan manasasewek a palandey, manggiwgiw irad takot da tan nanalagey irad arawdawin pasen. 19Inkuandad kinen Moises, “No mansalita kad sikami, ondengel kami; balet ag mo pansasalitaen ed sikami so Dios, ta ompan ompatey kami.”
20Inmebat si Moises, “Ag kayo natatakot; sinmabi so Dios, ta suboken to kayo tan labay to kayon mangonur lawas ed sikato, pian ag kayo mankasalanan.” 21Balet nansiansian nanalagey ed arawdawi a pasen iray katoowan, tan si Moises labat so sinmingger ed abay na makapal a lorem a kawalaan na Dios.
Saray Ganggan a nipaakar ed saray Altar
22Say Katawan ingganggan toy Moises ya ibaga tod saray Israelita: “Anengneng yon dili a siak a Katawan et nansalita ed sikayo manlapud tawen. 23Ag yo igagawaay sikayon dili na saray diriyos a pilak odino balituk, insan kaibak iran galangen yo. 24Manggawa kayo na dalin ya altar a para siak tan diad tapew to so pambagatan yo na karniro yo tan baka yo a sikaray bagat a popoolan tan bagat a para kareenan. Diad amin a pasen ya ibiig kon pangigalangan yod siak, onla ak ed sikayo tan bindisionan ta kayo. 25No manggawa kayoy baton altar a para siak, aliwan saray tinabas a bato so ikana yo, ta no mangikana kayo na sinsil ed saray bato, pagmaliwen yo ran aliwan manepeg ya ikanak. 26Ag kayo manggagawa na altar a para siak a wala ray balitang to; ta no wala ray balitang to, nanengneng so laman yo no ontakayan kayo.

Currently Selected:

Exodo 20: MBBPAN83

Highlight

Share

Copy

None

Want to have your highlights saved across all your devices? Sign up or sign in