Римвийриз 7

Къанун ва гунагь

1Стхаяр-вахар, зун квехъ галаз Къанун чизвайбурухъ галаз хьиз рахазва. Инсандал анжах чан аламай кьван адал Къанундин гьукум алайди квез чизвачни кьван? 2Месела, гъуьлуьк квай паб, гъуьлел чан аламай кьван, некягьдин къанундалди вичин гъуьлуьхъ галаз алакъада ава. Эгер хьи гъуьл кьейитӀа, паб и къанундикай азад жезва. 3Гьавиляй, гьеле гъуьлел чан аламаз, паб масадаз гъуьлуьз физ хьайитӀа, и кардалди ада гъуьлуьнни папан вафа чӀурзава, амма гъуьл кьенватӀа, паб къанундикай азад я ва адак, масадаз гъуьлуьз хъфизвайла, гъуьлуьнни папан вафа чӀурна лугьуз, тахсир кутаз жедач.

4Куьнни гьакӀ я, зи стхаяр-вахар. Куьн Масадаз, кьейидалай кьулухъ чан Хтайдаз, талукь хьун патал ва гьа икӀ Аллагьдиз бегьер гъун патал, Месигьдин Беден кьинин куьмекдалди куьн Къанун патал кьена. 5Чна чи гунагькар тӀебиатдив кьурвал уьмуьр тухудай чӀавуз Къанунди чак чи бедендин паяра чпин кар аквазвай гунагькар гьевесар уяхардай, ва абурун бегьер ажал тир. 6Гила лагьайтӀа, са мус ятӀани чун пацук кутур Къанун патал чун кьенвайла, виликдай хьиз, Къанундин гьарфунив кьурвал ваъ, цӀийикӀа, Руьгьдин куьмекдалди Аллагьдиз къуллугъун патал, чун азад авунва.

7Им вуч лагьай чӀал я? Къанун гунагь я лагьай чӀал яни? Гьелбетда, ваъ. Амма гунагь вуч ятӀа заз чир жедачир, Къанун авачиртӀа. Мумкин тир, месела, заз нефс вуч ятӀа чир тахьун, Къанунди лугьузвачиртӀа: «Темягьда гьатмир»#ЭхкъечӀун 20:17; Киххьей Къанун 5:21.. 8Гунагьди, и тагькимдай багьна жагъанваз, зи чанда вири жуьрейрин гьевесар арадал гъана, амма Къанун галачиз гунагьдал чан жедач. 9Са мус ятӀани за Къанун течиз уьмуьр тухузвай, амма заз тагьким чир хьайи чӀавуз гунагьдал зи беденда чан атана, 10зун лагьайтӀа, кьена. КилигайтӀа, уьмуьр гъун лазим тир тагькимди ажал гъана, 11вучиз лагьайтӀа гунагьди, тагьким вич гъиликиз, зун алцурарна ва Руьгьдин рекьяй кьиникьал гъана. 12Гьа икӀ Къанун пакди я, тагькимни пакди я, гьахъ-михьиди ва хъсанди я.

13АкӀ хьайила, хъсанда заз ажал гъанани? Гьелбетда, ваъ! Амма гунагьди вич гунагь яз къалурун патал, хъсандан куьмекдалди вичин кар ийиз, зи чанда ажал арадал гъана. Ва гьа и саягъда, тагькимдин куьмекдалди, чаз гунагь гьикьван эйбежер ятӀа аквадай мумкинвал хьана.

14Къанун руьгьани тир чӀал чаз чизва. Зун лагьайтӀа беден авайди я, зун гунагьдиз лукӀвиле маса ганва. 15За вучзаватӀа, зун гъавурда акьазвач. Заз вуч кӀанзаватӀа за ийизвач, адан чкадал жуваз такӀанзавай кар ийизва. 16Жуваз кӀан тийизвай кар за ийизватӀа, за идалди Къанун вич хъсан тирдахъ галаз разивал ийизва. 17Гьа икӀ и кар за жува ваъ, зак квай гунагьди ийизва. 18Зак, зи бедендик, хъсан са затӀни квачирди заз чизва, вучиз лагьайтӀа заз хъсанвал ийиз кӀанзава, амма ийиз жезвач. 19За ийизвайди заз ийиз кӀанзавай а хъсанвал туш. За жуваз тийиз кӀанзавай писвал ийизва. 20Гьа икӀ, жуваз кӀан тийизвай кар за ийизватӀа, и кар ийизвайди зун ваъ, зак квай гунагь я.

21Гьа икӀ ина заз ихьтин къанунди кар ийизвайди жагъана: заз хъсанвал ийиз кӀанзавай чӀавуз гьасятда писвал атана акъатзава. 22Къенепатай за Аллагьдин Къанундал шадвалзава, 23амма заз зи беденда маса къанунди вичин кар ийизвайди аквазва. И къанунди зун рикӀяй вичелай рази тир къанундихъ галаз дяве тухузва ва закай зи бедендин паяра вичин кар ийизвай гунагьдин къанундин есир ийизва. 24Бахт авачир инсан я зун! Зун ажал галай и бедендикай ни хилас авурай? 25И кар чи Ребби Иса Месигьдин куьмекдалди авур Аллагьдиз шукур хьурай!

Гьа икӀ, зун зи акьулдалди Аллагьдин Къанундин, амма бедендалди зун гунагьдин къанундин лукӀ я.

Currently Selected:

Римвийриз 7: ЛезПК

Highlight

Copy