Забур 87
87
Вири къакъатайла ийидай дуьа
1Къарагьан миресрин мани. Манидаррин чӀехидаз. «Бедбахтвиле азаб чӀугун» манидин макьам ягъиз. Эзрагьи Гьеманан шиир.
2Я Ребби, Аллагь зи хиласвилин,
юкъуз-йифиз за Ваз эвер авунай.
3Агакьрай зи дуьа Вав,
яб акала зи минетдихъ.
4АцӀанва зи рикӀ азабрив,
агъа дуьньядин сиве къерехдал ала зи уьмуьр.
5Суруз физвайбур хьтинди яз гьисабзава зун,
элкъвенва зун къуват авачир инсандиз.
6Гадарнава кьейибурун юкьваз зун –
Вуна мад рикӀел хкин тийизвай,
Ви гъилихъай къакъуднавай
яна кьенвайбур хьиз я суравай.
7Вуна суруз вегьена зун,
туна дерин мичӀивиле.
8Ви хъел ала зал заландиз.
Жуван вири лепейралди
яна Вуна зун.
Макьамдин ара
9Вуна закай зи дустар яргъа авуна,
закай такӀан затӀ авуна.
Къазаматнава зун, экъечӀиз жезвач.
10Дердиникди зи вилерин аман атӀанва.
Ребби, гьар юкъуз минетнай за Ваз,
жуван гъилер Вахъди яргъи авуна.
11Кьейибурун арада
къалурдатӀа яраб Вуна аламатар?
КъахрагъдатӀа кьейибур Ваз шукуриз?
Макьамдин ара
12Ви регьимдикай яраб сура лугьудатӀа,
Ви вафадикай
лугьудатӀа пачагьлугъда ажалдин?
13Ви аламатар малум жедатӀа мичӀивиле,
рикӀелай фенвай чилел
Ви гьахъвални малум жедатӀа?
14Амма, Ребби, Вавай куьмек тӀалабзава за,
пакамахъ фад за Ваз дуьа ийизва.
15Вучиз Вуна, я Ребби, зун инкар ийизва?
Вучиз закай Вуна Жуван чин чуьнуьхзава?
16Жегьил чӀавалай за азият чӀугвазва,
ажалдиз мукьва я,
Ви къургъари гъанва зун
чара атӀунал.
17Ви гъазаб фена винелай зи,
Ви къурхуйри зун авунва барбатӀ.
18Яргъи югъди абуру зун
ци хьиз кьунва элкъуьрна,
зун сагъдаказ туькьуьниз.
19Вуна завай яргъа авунва кӀанибурни дустар зи,
мичӀивал я зи кӀеви дуст.
Currently Selected:
Забур 87: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
