Забур 83
83
Аллагьдин КӀвалел шадвал авун
(Зиярат ийизвайла лугьудай мани)
1Манидаррин чӀехидаз. Гитит ягъиз. Къарагьан миресрин мани.
2Вуч иер я Вуна уьмуьр тухузвай чка,
Я Ребби Къуватрин!
3 Реббидин КӀвалин гъенера жез кӀанз,
зи чан гьелек хьанва хьи;
рикӀини беденди мани лугьузва
уьмуьр гудай Аллагьдиз.
4НуькӀрени кваз жагъурзава вичиз кӀвал,
чубарукди – муг вичиз,
чпин шарагар ахъаюн патал
Ви къурбангандив,
я Ребби Къуватрин,
Пачагь зи, Аллагь зи!
5Бахтавар я Ви кӀвале уьмуьр тухузвайбур,
абуру Ви тарифарда акъваз тавуна.
Макьамдин ара
6Вичин къуват Валди тир
кас бахтавар я,
рикӀе зияратдал фин мурад авайди.
7Физ-физ Мелгьемдин тарарин дередай,
абуру ана ачухзава чешмеяр,
анаг рухсатдив кьаз тазва хъуьтӀуьн марфади.
8Абур мад ва мад мягькем жезва,
акъатзава Аллагьдин вилик Сигьандал.
9Я Ребби, Къуватрин Аллагь,
ван ша зи дуьадин!
Яб це заз, Якьубан Аллагь!
Макьамдин ара
10Килиг чаз, Аллагь, къалхан чи!
Жуван гуьцӀуьрдин чиниз килиг!
11Ви гъенел
хьайи са югъ
адалай къеце хьайи агъзур йикъалай
хъсан я.
Аллагьдин КӀвалин гуьрцелдив хьун хъсан я
небгетрин чардахра уьмуьр тухурдалай.
12Куьз лагьайтӀа Аллагь, Ребби
рагъ я чи, къалхан я,
баркаллани берекат
савкьватар я Реббидин.
Рехне квачиз къекъвезвайбур
магьрумдач Ада хъсанвиликай.
13Я Ребби Къуватрин,
Вак умуд кутазвай кас бахтавар я.
Currently Selected:
Забур 83: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
