Забур 72
72
ПУД ЛАГЬАЙ КТАБ
(72–88-кьилер)
Гьахъ гъалиб хьун
1Асафан мани.
ХупӀ хъсанвал ийизвачни Аллагьди
Исраилдизни рикӀер михьибуруз!
2За, лагьайтӀа,
жизви татаб хьун кумазни кӀвачер зи,
жизви цӀуьдгъуьн хьун кумазни камар зи,
3пехилвална лавгъабурал,
небгетрин саламатвал акуна.
4Вучиз лагьайтӀа абуруз авач рекьидалди азабар,
сагъламвилив ва къуватрив ацӀанва.
5Заланвиликай адетдин йикъарин
азад я абур,
абурулай бедбахтвилер инсанрин
алатна физва,
6гьавиляй дамах яха хьиз я абурун гарданда,
зулумкарвал партал хьиз алукӀнава абурал.
7Абурун вилерал пи акьалтнава,
абурун кьуру такабурвилиз сергьятар авач.
8Абурун гафар ягьанатдивни
хъилев ацӀанва,
аваз чпин лавгъавиле,
къургъар гузва зулуматдив.
9Чпин сивер ахъайзава акси яз цавариз,
абурун мез чилин и патай а патаз къекъвезва.
10Гьавиляй гьабурухъ элкъвезва Адан халкь,
ада яд хъвазва ацӀай фейжандай абурун.
11Лугьузва: «ГьикӀ чир жеда Аллагьдиз?
Авани чирвал виридалай Виневайдахъ?»
12Ингье небгетар ихьтинбур я:
абуру датӀана
уьмуьр тухузва са къайгъуни авачиз,
артухариз девлетар.
13ГьакӀ хьайила за гьавая михьна жал жуван рикӀ,
михьивиле чуьхвена жал гъилер зи,
14за азият чӀугуна гьар юкъуз,
гьар пакамахъ заз жазани гана.
15ЛагьанайтӀа за: «За гьакӀ лугьуда»,
за Ви халкьдин аялар маса гун жедай.
16Идан гъавурда алахъайла акьаз зун,
и кӀвалах заз четин яз аквазвай
17гьахьдалди зун пакханадиз Аллагьдин,
акьадалди гъавурда небгетрин кьисметдин.
18Эхь, Вуна абур эцигна чӀидгъем рекьерал,
гъана абур михьиз барбатӀ хьунихъ.
19Садлагьана терг хьана абур,
телеф хьана, хаф яна хьиз!
20Акур ахвар хьиз, квахьдай уях хьайила,
гьакӀ Ваз, Агъа, къарагъна, небгетар аквазвай
вилер авач.
21Зи рикӀ туькьуьл дердинив ацӀайла,
чанди азаб чӀугвазвайла,
22зун ахмакь тир, гьатзавачир гъавурда,
гьайван хьиз тир зун Ви вилик.
23Амма зун датӀана Вахъ гала:
Вуна кьунва зи эрчӀи гъил.
24Вуна Жуван меслятдив заз
рехъ къалурзава,
ахпа зун тухузва
Вуна Жув алай баркалладив кьван.
25Вуж ава цава, Валай гъейри захъ?
Валай гъейри затӀни кӀандач заз чилел.
26Гьалдай фейитӀани зи беден, зи рикӀ,
Аллагь зи рикӀин арха я, даим яз зи ирс я.
27Гьа икӀ телеф жеда Вавай чеб къакъудзавайбур,
тергзава Вуна гьар сад Ваз вафа техвейди.
28Амма зун патал бахт я мукьва хьун
Аллагьдиз,
Агъадикай, Реббидикай
за жуваз далда кьун,
За хабар гун паталди Адан вири крарикай.
Currently Selected:
Забур 72: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
