Забур 67
67
Аллагьдин гъалибвал
1Манидаррин чӀехидаз. Давудан мани.
2Къарагърай Аллагь,
чукӀуррай Адан душманар,
катрай Адан виликай
Ам такӀандайбур!
3Гум чкӀидайвал чукӀура абур!
ЦӀрадайвал цӀукай мум
Аллагьдин виликай квахьрай небгетар!
4Гьахъ-михьибуру шадвалрай,
шад хьурай Аллагьдин вилик,
хвешивал авурай шадвиле!
5Манияр лагь Аллагьдиз!
Тарифдин манияр лагь Адан тӀварцӀиз!
Цифераллаз къекъвезвайдан тарифар ая!
Адан тӀвар Ребби я!
Адан вилик шадвал ая!
6Етимрин буба тир, хендедайрин арха тир
Аллагь Вичин пак КӀвале ава.
7Ялгъузбуруз Аллагьди КӀвал гузва,
абадвилихъ инсанар акъудзава къазаматрай,
амма муьтӀуьгъ тахьайбуру
уьмуьр тухузва кьуру чилерал.
8Я Аллагь, Вун фидайла
Жуван халкьдин виликай,
къекъведай чӀавуз кьурумда,
Макьамдин ара
9чил зурзанай,
гьатта цаварин кӀанни хкатнай
Синайдин Аллагьдин вилик,
Исраилдин Аллагьдин вилик!
10Аллагь, Вуна къурнай къати марф
чилел Ви.
Ам яван хьанвайла,
ам Вуна тухарна.
11Ана Ви халкь уьмуьр тухуз ацукьна.
Аллагь, Жуван дугъривилив
Вун кесибдаз куьмекар гуз хьана.
12Агъади эмирна,
гзаф кьадар папар
дугъри хабар гваз дуьньяда къекъвена,
чӀехи кьушун хьиз.
13«Душманрин кьушунрин пачагьар катда, катда,
Исраилдин папари
па́йда гъиле гьатай кьван.
14Хпер авай парахда хьайитӀани къаткиз куьн,
гимишдини къизилди кьада куьн,
лифрен луварал абурун рангар алайвал».
15Вири Алакьдайда
чукӀурайла пачагьар чилел и,
Цалман дагъдал жив къвадай саягъда.
16Аллагьдин дагъ я Башандин дагъ!
КукӀушрин дагъ я Башандин дагъ!
17КукӀушрин дагълар, вучиз куьн
килигзава Сигьан дагъдиз пехилдиз?
Аллагьдиз кӀан хьана адал уьмуьр тухуз,
эхь, Ребби датӀана жеда адал уьмуьр тухуз!
18Дапурагар Аллагьдихъ
ава цӀуд агъзурар, агъзур агъзурар.
Агъа атана Синай дагъдилай
Вичин пакханадиз.
19Хкаж хьана Вун кьакьандиз,
гуьгъуьнал алаз тухуз есирар,
инсанривай къачуна савкьватар,
гьатта муьтӀуьгъ туширбурувайни.
Ребби Аллагь, иниз атана Вун
ина уьмуьр тухун паталди.
20Гьар юкъуз шукур хьурай Ваз, Агъа:
чи пар Вуна тухузва.
Аллагьди чаз куьмек гузва.
Макьамдин ара
21Аллагь чун патал
хиласдай Аллагь я,
Ажалдикай хиласвал
гва Агъадив, Реббидив.
22Аллагьди кукӀварда
кьилер Вичин душманрин,
чӀар алай кьил, вичин тахсирра
сейр ийиз къекъвезвай.
23Агъади лагьана:
«Башандай душманар вахгуда за,
ахкъудда гьуьлуьн дегьнедай,
24вуна, Исраил,
кӀвачер чуьхуьн паталди ивидай,
кицӀери чпин мецер чуьхуьрвал
ивидай куь душманрин».
25Абуруз Вун къведайвал акуна, Аллагь,
зи Аллагь, зи Пачагь къведайвал пакханадиз.
26ЭкъечӀна манияр лугьурбур кьилеваз,
гуьгъуьнал алай ядайбур симер алай алатар,
юкьва рушар авай, тафтар язавай.
27Межлисда тарифа Аллагьдин,
Реббидин тарифа, Исраилдин уьмуьрдин чешмедин.
28Гьа тайифади, Бунъяминан гъвечӀи тайифади,
ам идара ийизва,
ахпа гзаф гьакимри Ягьудатдин,
гьакӀни гьакимри
Забулундинни Нифталидин.
29Я Аллагь,
Жуван Къуватдиз эмир це,
чи куьмекдиз ракъурай а Къуватдиз,
я Аллагь.
30Ярусалимда авай Ви Ибадатханадин хатурдай
гъида пачагьри савкьватар Ваз.
31Чуьнуьх хьанвай нацӀара
вагьши гьайван явашара,
арада авай зайиф данайрин
къуват авай яцар явашара.
Секинара абур, Ваз
гъун паталди чпин гимиш,
чукӀур ая дявеяр кӀанзавай халкьар.
32Мисридай къведа илчияр,
Кушди вичин гъилер хкажзава Аллагьдихъ.
33Чилин пачагьлугъар,
манияр лагь Аллагьдиз!
Агъадиз тарифдин мани лагь,
Макьамдин ара
34къекъвезвайдаз лап сифте кьиляй
цаварин цавара.
Ада ван хкажзава, Ам кӀеви ванцелди рахазва.
35Хиве яхъ Аллагьдихъ къуват галайди!
Зурбавал я Адан Исраилдал алайди,
Адан къудрат цавун цифера ава.
36Вичин пакханадай
кичӀевал кутазва Аллагьди,
Исраилдин Аллагьди,
халкьдиз гузвай къудратни къуватар.
Шукур хьуй Ваз, я Аллагь!
Currently Selected:
Забур 67: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
