Забур 50
50
Гунагьрилай гъил къахчунин тӀалаб
1Манидаррин чӀехидаз. Давудан мани. 2Давуд Бат-Шевадихъ галаз хьайидалай гуьгъуьниз, адан патав НатӀан пайгъамбар атай чӀавуз.
3Я Аллагь, заз регьим ая
Жуван чӀехи регьимдалди,
Жуван рикӀ кунивди
завай хьайи хатаяр фидайвал ая рикӀелай.
4Чуьхуьз зун вири тахсиррикай,
михьи ая гунагьдикай.
5Куьз лагьайтӀа
завай хьайи хатаяр
за дериндай кьатӀузва,
зи гунагьни датӀана зи вилик ква.
6Тек са Ви вилик за авуна гунагь,
чӀуру карна за Ви вилик.
Адалат гва Вав къарарда Ви,
Ви дуванни рехне кутаз жерди туш.
7Ингье гунагькар яз ханва зун,
зи дидедик акатна зун гунагь кваз.
8Ингье Ваз кӀанзава дуьзвал хьана зи рикӀе,
ятӀа зи рикӀ ацӀура Ви камалдив.
9Исуп набататдив заз стӀалар ягъ,
михьи жеда зун,
чуьхуьх зун, жеда зун
живедилайни лацу.
10Шадвилинни хвешивилин ван къведайвал ая заз,
На кукӀварай зи кӀарабар шад хьурай.
11Зи гунагьрихъай чин элкъуьра са патахъ,
зи батӀулвал рикӀелай фидайвал ая.
12Я Аллагь! Тур зи хура михьи рикӀ,
цӀийи хъия заз гьахъ тир руьгь.
13Жуван чинивай зун къакъуд мийир,
Жуван Пак Руьгь къакъудмир завай.
14Вуна куьмек авунин
шадвал гахце зав,
гьайбат авай руьгьдалди
куьмек ая заз.
15Небгетриз чирда за рекьер Ви,
гунагькарар элкъведа Вахъ.
16Я Аллагь!
Хуьх зун иви экъичуникай,
Зун хилас хьунин Аллагь,
зи меци Ви гьахъвилин тариф ийида!
17Агъа, зи пӀузарар ахъая,
зи меци Ви тариф ийирвал.
18Къурбандар Ваз герек туш, за гудай абур,
кунугарни кӀанзавач Ваз.
19Аллагьдиз къурбанд я ханвай руьгь.
Вуна ханвай ва хажалат квай рикӀ
инкардач, Аллагь.
20 Сигьандин цлар хкажна цӀийи кьилелай,
Ярусалимдиз хъсанвал ая майилдивди Жуван.
21Гьа чӀавуз На кьабулда
лазим тир къурбандар,
санлай кудайбур, кунугар,
гьа чӀавуз гъида жунгаварни
къурбангандал Ви.
Currently Selected:
Забур 50: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
