Забур 41
41
КЬВЕД ЛАГЬАЙ КТАБ
(41–71-кьилер)
Гъурбатда авайдан дуьа
1Манидаррин чӀехидаз. Къарагьан миресрин шиир.
2Маралди цихъ чӀугвадай хьиз,
зи рикӀи Вахъ чӀугвазва, я Аллагь.
3Къаних я зи рикӀ
Аллагьдихъ,
чан алай Аллагьдихъ.
Мус атана акъвазда зун вилик Ви?
4Юкъузни, йифизни
тӀуьн хьанвай заз накъварикай,
лугьудайла заз:
«Гьинва ви Аллагь?»
5Жуван рикӀе авайди ичӀириз,
хкида рикӀел за,
гьикӀ фенайтӀа зун
кӀеретӀдихъ галаз иман гвайбурун,
Аллагьдин КӀвалихъди
физвай сварагдин#41:5 Свараг – шадвилелди санал физвай инсанрин кӀеретӀ. кьиле акъвазна,
гьараяриз шадвилинни тарифрин –
суварик квай гзаф кьадар инсанрин юкьва.
6Куьз вун пелеш хьанва, зи чан?
Вучиз ква вак гъалаб?
Умуд кутур Аллагьдик,
за мад Адаз шукурда,
заз Куьмек ийидайдаз,
Аллагьдиз зи.
7Захъ авай чан пелеш хьанва,
гьавиляй за Вун рикӀел хкизва
Ярдан вацӀун чилелай,
кукӀушрилай Гьермандин – Мицар дагъдилай.
8Эверзава цин гургусди гургусдиз
Ви чарчаррин ванцелди;
Ви вири кьакьан лепеяр гьуьлуьн
фена зи винелай.
9Югъди Реббиди заз Вичин регьим ийизва,
йифизни за Адаз манияр лугьузва,
абур зи уьмуьрдин Аллагьдиз дуьа я.
10Аллагьдиз, зи Рагаз, лугьун за:
«Куьз Вуна зун алудна рикӀелай?
Куьз зун шехьиз, сиягь хьанва,
жуван душманди хкуьрнаваз намусдик?»
11Зи беденди азият чӀугвазва,
ажал гъидай хирекай хьиз,
гьар юкъуз лугьуз заз:
«Гьинва ви Аллагь?»
12Куьз вун пелеш хьанва, зи чан?
Вучиз ква вак гъалаба?
Умуд кутур Аллагьдик,
за мад Адаз шукурда,
заз Хилас ийидайдаз,
Аллагьдиз зи.
Currently Selected:
Забур 41: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
