Забур 30
30
Аллагьдин гъиликай далда кьун
1Манидаррин чӀехидаз. Давудан мани.
2Я Ребби, за жагъурзава Вакай далда,
заз садрани регъуь жервал ийимир!
Хас тирвал Ви гьахъвилиз азад ая зун!
3Яб акала захъ,
тади къачу хиласиз зун.
Хьухь зун патал катдай чка, къеле хьухь,
ана чуьнуьх жервал завай!
4Вун зи къеле, зи раг я,
Жуван тӀварцӀин хатурдай
зун твах ва заз рехъ къалура!
5Зал чинеба вегьенвай чилинай зун акъуда,
зун паталди кӀеле Вун я хьи.
6За Ви гъиле твазва зи чан,
На азадна зун, я Ребби, гьакъикъатдин Аллагь.
7Усал бутриз гьуьрметдайбур
заз аквадай вилер авач,
за анжах Реббидик кутазва умуд.
8За шадвалзава, хвешивалзава
Ви гьакъикъи муьгьуьббатдал,
куьз лагьайтӀа Ваз зи дерт-гъам акуна
ва чир хьана зи хажалат.
9На тунач зун душмандин гъиле,
Вуна зун генг чкадал акъудна.
10Заз четинзава, я Ребби!
Регьим ая заз,
хажалатдик зайиф хьанва вилер зи,
зи рикӀни жигер.
11Хажалатда куьтягь жезва уьмуьр зи,
сузада ава йисар зи.
Зи къуватар куьтягь хьанва зи гунагьриз килигна,
кӀарабар зи кьуранва.
12Душманри зи намусдик хкуьрзава,
гьакӀ хъуьрезва къуншиярни.
Хьанва жуван дустаризни буьуь зун,
куьчеда низ акуртӀа зун, катзава.
13Алуднава абуру зун, кьейиди хьиз, рикӀелай,
ханвай къаб хьиз ава зун.
14Буьгьтендин ван къвезва заз гзафбурувай.
Виринрихъай кичӀевал ава,
заз акси яз абур икьрар жедайла,
акъуддайла фенд зи уьмуьр къакъудун патал.
15За лагьайтӀа, я Ребби, Вак кутазва умуд,
лугьузва: «Вун Аллагь я зи!»
16Ви гъилева йикъар зи, азада зун душманрикай
ва зи геле къекъвезвайбурукай.
17Ви чини нур гуз хьурай лукӀрал Ви,
Ви регьимдиз хас тирвал куьмек це заз.
18Ваз эверна лугьуз, заз
регъуь тахьуй, я Ребби.
Небгетриз регъуь хьурай,
лал хьана, аватрай агъа дуьньядиз.
19Абурун таб гвай сивер липӀ хьурай,
гьахъ-михьибурукай терсвилелди,
лавгъавал гваз,
такӀанвилелди рахазвай.
20Вуч зурба я няметар Ви,
Вакай кичӀе тирбур патал На хуьзвай!
Аквадайвал инсанрин веледриз Вуна абур багъишзава
Вакай далда кьаз кӀанзавайбуруз.
21Фендерикай инсанрин Вуна абур чуьнуьхзава
пердедик ви мукьвавилин.
Вуна абур Жуван КӀвале
хуьзва къал гвай мецерикай.
22Шукур хьуй Ваз, я Ребби,
аламатдин регьим заз къалурай
Зун авай чӀавуз
элкъуьрна кьунвай шегьерда.
23Велвелада за жуван ийизвай фикир:
«Яраб зун вавай къакъуднава жал?»
Амма ван хьана зи дад-бидаддин Ваз,
за ваз минет авурла.
24Вафа гвай халкь, кӀан хьухь Ребби!
Вафа гвайбур хуьда Ада,
амма гъукь гвайбурув
агакьарда ацӀай эвез.
25Мягькем хьухь, уьтквем ая рикӀер куь,
Вирибур, Реббидик кутазвай умуд!
Currently Selected:
Забур 30: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
