Забур 26
26
Аллагьдал ихтибар авун
1 Давудан дуьа.
Ребби – зи экв, зи куьмек –
никай кичӀе хьурай заз?
Ребби – зи уьмуьрдин къеле –
никай къурху хьурай заз?
2Зал атайла небгетар,
зи як тӀуьн патал,
зи душманар, мидяяр зи
къарагъайла зал, –
абур татаб жеда,
абур алукьда.
3Кьушунди зун элкъуьрна кьурай, –
зурзадач зи рикӀ;
заз акси яз къарагърай дяве, –
гьа чӀавузни хуьда за секинвал.
4Тек са тӀалабун ийида за Реббидиз,
са гьам за жагъурзава:
Реббидин КӀвале завай амукьиз
жедайвал хьуй зи уьмуьрдин вири йикъара,
къенивилиз Реббидин
завай килигиз жедайвал хьурай,
Адан Ибадатханада жавабрихъ зун
къекъведайвал хьуй.
5Бедбахтвилин юкъуз Ада гуда Вичин патав заз далда,
чуьнуьхда зун пердедик
Алачухдин Вичин Пак,
хкажда зун рагал.
6Гьа чӀавуз зи кьил вине жеда
зун элкъуьрна юкьва тунвай душманрилай,
Алачухдив Адан Пак
къурбандар гуда за,
шаддиз гьарайиз,
мани лугьуз, макьам яда Реббидиз.
7Ван ша, я Ребби, за эверайла,
регьим ая заз, жаваб це.
8Зи рикӀе Ви гафарин ван ава:
«Зун жагъуриз алахъа!»
Я Ребби, зун къекъведа Вахъ.
9Жуван чин закай ийимир чуьнуьх.
Хъиле гьатна, жуван лукӀ кьулухъмир,
Вун я куьмек хьайиди заз.
Зун кьулухъмир, гадармир зун, я Аллагь,
зун Азад ийидайди!
10Гадаррай зун бубади, дидеди,
амма Реббиди зун ийида кьабул.
11Я Ребби, заз чира Ви рехъ,
твах зун дуьз рекьяй,
зи душманар лал хьун патал.
12Зун зи душманрин гъиле вугумир,
куьз лагьайтӀа заз акси яз рахазва
тапан шагьидар
ва хъел кваз къачузва нефес.
13Амма зун чӀалахъ я:
Реббиди гудай хъсанвал
заз чан алайбурун и чилел аквада.
14Умуд кутур Реббидик,
мягькем хьухь,
рикӀни жуван уьтквема,
умуд кутур Реббидик!
Currently Selected:
Забур 26: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
