Забур 138
138
Вири чидай, вирина авай Аллагь
1Манидаррин чӀехидаз. Давудан мани.
Ребби, вуна синагъна зун,
чида зун Ваз.
2Чида, зун ацукьзавани,
къарагъзавани,
зи фикиррин гъавурда
Вун акьазва яргъай.
3ХьайитӀани зун физваз,
за ял ягъиз хьайитӀани,
Вун датӀана къвалав гва зи,
чида Ваз зи вири рекьер.
4Эхь, зи мецел гьеле гаф татанмаз,
Ваз ам чизва, я Ребби.
5Вун захъ вири патарихъай галазва,
Вуна Жуван гъил эцигзава зал.
6И кар чир хьун зун паталди аламат я,
зи байих патал гзаф чӀехи кар я ам.
7Ви Руьгьдикай жеда завай гьиниз физ?
Гьиниз катиз жеда завай Вун авайвиликай?
8Зун хкаж хьайитӀа цаварал –
Вун гьана ава,
эвичӀайтӀа агъа дуьньядиз –
Вун гьана ава.
9Зун хкаж хьайитӀа
лувараллаз ярарин
ва я уьмуьр тухуз ацукьайтӀа
зун яргъал гьуьлерихъ,
10гьанани кваз тухуда зун гъили Ви,
Ви эрчӀи гъили кьада зун.
11ЛагьайтӀани гьатта за:
«МичӀивили кӀевда зун,
Зи вири патаривай
экуьникай йиф жеда»,
12лап гьа чӀавузни зун Вакай
мичӀивили кӀевирдач;
югъ хьиз, экуь жеда йиф,
гьам мичӀни, гьам эквни.
13Зи къене авай кьван вири Вуна халкьнава,
зун дидедин руфуна храна Вуна.
14Шукурда за Ваз
икӀ аламатдив зун халкь авунай.
Ажайиб я крар Ви,
вуч хъсан тушни заз и кар чир хьун.
15Зун чинеба халкь ийирла,
зи кӀарабар кӀевначир Вакай,
зун арадал гъанай устадвилелди
чилин дерин-деринда.
16Ви вилериз тамам тушир беден зи акунай,
Ви ктабда зи вири йикъар кхьенай
гьеле а йикъар садни алукь тавунмаз.
17Зун патал къимет авайбур я
Ви фикирар, я Аллагь!
Вуч чӀехи тушни абурун кьадар!
18Гьисаб ийиз женни абур,
гьикӀ лагьайтӀа къумадилай гзаф я.
Жедайлани уях зун,
генани Вахъ галазва зун.
19Аллагь, Вуна небгетар
тергнайтӀа, вуч хъсан тир!
КъекъечӀ завай, ивидихъ къанихбур!
20Небгетдаказ рахазва абур
Ваз акси яз,
Ви душманри Ви тӀварцӀикай
алазни-алачиз рахазва.
21Вун такӀанбур, я Ребби,
заз гьикӀ такӀан тахьурай?
Ваз акси яз къарагъзавайбуруз
за гьикӀ нифрет тавурай?
22Заз абур такӀан я нифретдив къати;
Ви душманар за зибур яз гьисабзава.
23Аллагь, синагъ ая зун,
чир ая зи рикӀ;
синагъ ая зун,
чир ая зи фикирар.
24Килиг, яни тапанди
зун алай рехъ,
твах зун Аллагьдин даим рекьяйтӀуз.
Currently Selected:
Забур 138: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
