Забур 104
104
Аллагьди Вичелди халкь хуьда
1Шукур ая Реббидиз, Адан тӀварцӀиз эвера,
рахух Адан крарикай халкьарин арада.
2Лагь тарифдин мани Адаз, лагь Адаз манияр,
суьгьбет ая Адан вири аламатрикай.
3Дамахар ая Адан пак ТӀварцӀел,
Ребби жагъурзавайбурун рикӀер шад хьурай.
4Къекъуьгъ Реббидихъ, къуватдихъ Адан:
Адан чинихъ къекъуьгъ датӀана.
5Ада авур аламатар рикӀел хуьх,
Адан ишараяр, Адан сивин дуванар,
6Адан лукӀ тир Ибрагьиман веледар,
Якьубан эвледар Ада хкянавай.
7Ам Ребби я, Аллагь чи,
Адахъ дуванар ава вири чил тирвал.
8Вичин Икьрар даим яз Адан рикӀел алама,
гайи гаф агъзур несилриз,
9 Ибрагьимахъ галаз кутӀунай Икьрар,
Вичин Исакьаз кьур кьин.
10Им Ада тестикьна къайда яз Якьубаз,
Исраилдиз даиман Икьрар яз,
11лагьана: «За Къенандин чил гуда ваз
пай яз ви ирсинин».
12Абурун кьадар гзаф туширла,
абур лап тӀимил тир,
Къенанда къурабаяр яз авай,
13са уьлкведай муькуьдаз
абур къекъвез авайла,
са пачагьлугъдай маса халкьариз,
14Ада садавни хаз тунач хатур абурун,
абурун паталай ахмурариз пачагьриз,
15лагьана: «Зи гуьцӀуьррик хкӀамир,
Зи пайгъамбарриз зиянар гумир».
16Ада чилел каш ракъурна,
фан пун хкудна.
17Абурулай вилик ракъурна инсан,
лукӀвилиз маса гайи Юсуф ракъурна.
18Бухавралди адан кӀвачер чуькьвена,
гарданда вик туна ракьун
19Реббидин гаф къведалди,
Реббидин гафуна адан гьахъвал къалурдалди.
20Пачагьди эмирна, кутӀуннавайди ахъайна,
ам халкьарин агъади азад авуна.
21Ада адакай вичин кӀвалин агъа авуна,
вичин вири мал-девлетдал гьаким авуна
22ада дуьз рехъ къалурун паталди
гьакимди мукьув авурбуруз,
агъсакъалриз камал чирун паталди.
23Исраил ахпа Мисридиз атана,
Хаман чилел кьил хуьз хьана Якьуб.
24Ада Вичин халкь гзаф авуна,
абурук чпин душманрилай гзаф къуват кутуна.
25Ада Вичин халкьдихъ нифрет
куькӀуьрна душманрин рикӀера,
амалдарвал – аксина лукӀарин Вичин.
26Вичин лукӀ Муса ракъурна
Вичи хкягъай Гьарунни галаз.
27Абуру къалурна Хаман чилерал
Адан керемат-ишараяр ва аламатар.
28Ада мичӀ ракъурна, мичӀи хьана,
Мусани Гьарун Адан гафуниз акси хьанач.
29Мисридин ятар элкъуьрна ивидиз,
ана авай гъетер терг авуна.
30Абурун чилел пайда хьана гзаф хъипер,
абур гьатта пачагьрин кӀвалерани аваз хьана.
31Ада гаф лагьана, абурун вири чилерал
абурал гьужумна бувунрин булутри, ветӀери бицӀи.
32Абурун чилел Ада хар ракъурна марфадин чкадал
ва хци цӀайлапанар.
33Абурун вири чилел ципицӀ багълар атӀана,
инжилдин ва маса тарарни.
34Лагьана – атана цицӀер,
куквар кьадар авачир.
35Абурун чилеллай векь вири тӀуьна,
майваярни, абурун никӀера авай.
36ГьакӀни Ада абурун чилел телефна
къуват авай вири сифтегьан ругулар –
а итимрин виридалай хъсан тир къуват.
37Ада акъудна Исраил
гимишни къизил гваз,
тайифайрин арада
садни авачир татаб жериди.
38Мисри шад тир абур хъфинал,
абурукай кичӀе тир адаз.
39Аллагьди экӀяна циф
абур далдадик кутун паталди,
цӀай куькӀуьрна абуруз
гун паталди йифиз экв.
40Халкьди тӀалабна, ракъурна Ада туртурар,
тухарна инсанар цавай атай фал.
41Раг падна, яд авахьна,
вацӀ хьиз, кьурумда.
42Куьз лагьайтӀа Адан рикӀел хтана
Вичин лукӀ тир Ибрагьимаз гайи пак гаф.
43Ада Вичин халкь, Вичи хкягъайбур, шаддаказ акъудна,
хвешивилин манияр лагьана абуру.
44Абуруз гана халкьарин чилер,
масадбуруз талукь тир мал-девлетни.
45Адан къайдайрал амал авун паталди,
хуьн паталди къанунар Адан.
Тариф ая Реббидин!
Currently Selected:
Забур 104: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
