Забур 101
101
Умуд кӀеви хьун
1Вич пелеш хьанвайла ва вичин шел-хвал Реббидин вилик ичӀирдайла, азабдик квайда авур дуьа.
2Ребби, ван ша дуьадин зи,
зи гьарай Вав агакьрай.
3Ви чин закай чуьнуьхмир
хажалатдин юкъуз зи,
захъ яб акала, за ийидайла минет Ваз,
жаваб це фад.
4Квахьнава зи йикъар гум хьиз,
цӀа хьиз, канва кӀарабар зи.
5Ханва зи рикӀ, шуьткьвенва, векь хьиз,
зи рикӀелай алатзава гьатта жуван фу тӀуьнни.
6За цӀугъзава кӀевидаказ,
зи кӀарабар зи хамуник ккӀанва.
7ТӀиб хьиз я зун кьурумда,
байкъуш хьиз я харапӀайрал алай.
8Ксанвач зун, ацукьнава,
Тек къуш хьиз, къавал.
9Яргъи югъди зи душманри русвагьзава зун,
зал хъуьрезва абур,
заз абуру лянетзава.
10Фан чкадал руьхъ незва за,
жува хъвазвайдакни
акадарзава накъвар за,
11Ваз закай хъелни гъазаб авайвиляй,
куьз лагьайтӀа На кьуна зун гадарна.
12Зи йикъар квахьзавай хъен хьиз я,
зун, векь хьиз, шуьткьуьзва.
13Амма Вун, Ребби,
амукьзава даим яз.
РикӀера жеда Вун
несилрилай несилралди.
14Вуна, къарагъна,
регьим ийида Сигьандиз,
куьз лагьайтӀа вахт атанва адаз регьимдай,
адан вахт атанва.
15Куьз лагьайтӀа Ви лукӀариз адан къванер багьа я,
абуру чӀугвазва гьайиф адан руквадин.
16Реббидин тӀварцӀикай кичӀе жеда халкьариз,
чилин вири пачагьриз – баркалладикай Ви,
17куьз лагьайтӀа Реббиди Сигьан эхцигда,
пайда жеда аваз Вичин баркаллада.
18Чара атӀайбурун дуьадин ван жеда Адаз,
абурун минетар кьулухъдач.
19И кар кхьирай къведай несилар паталди,
арадал атанвай цӀийи халкьди Реббидин тарифда.
20Килигна Ам кьакьанрай
Вичин пакханадин.
Цаварилай килигзава Ребби чилиз,
21есирдин сузадин ван хьун паталди,
кьиникьин жазадиз акъуднавайбур
азад авун паталди,
22Реббидин тӀвар Сигьандал малумарун паталди,
Ярусалимда Адан тариф малумарун паталди,
23къуллугъ авун паталди Реббидиз
кӀватӀ хьайи чӀавуз
халкьар, пачагьлугъар.
24Ада рекье зи къуватар зайифна,
тӀимиларна йикъар зи.
25За лагьана:
«Зи Аллагь! Зи йикъарин юкьвалай
хутахмир зун.
Ви йисар физва несилрилай несилралди.
26Вуна дегь заманда эцигна бине чилин,
цаварни кар я Ви Гъилерин.
27Чилни цавар терг жеда,
амма Вун амукьда даим яз;
абур, либасар хьиз, куьгьне жеда,
парталар хьиз, дегишда абур, квахьда абур.
28Амма Вун гьа Вун я,
эхир авач йисариз Ви.
29Ви лукӀарин рухваяр амукьда,
абурун эвледар мягькем жеда вилик Ви».
Currently Selected:
Забур 101: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
