Кьурумда 9
9
Песагь кьиле тухун
1Мисридай экъечӀайдалай кьулухъ кьвед лагьай йисан сад лагьай вацра Синайдин кьурумда Ребби Мусадихъ галаз рахана. Ада лагьана: 2«Исраилдин рухвайри Песагь лазим тир вахтунда кьиле тухурай. 3Ам тайинарнавай вахтунда, рагъдандиз, алай вацран цӀукьуд лагьай юкъуз вири къалурнавай къайдайрал ва тагькимрал амал авуна кьиле твах».
4Мусади Исраилдин рухвайриз Песагь кьиле твах лагьана, 5ва абуруни Синайдин кьурумда, рагъдандиз, сифте вацран цӀукьуд лагьай юкъуз икӀ авуна. Исраилдин рухвайри Реббиди Мусадиз гьикӀ эмир авунатӀа, вири дуьм-дуьз гьакӀ авуна.
6Амма абурукай са бязибурувай Песагь а юкъуз къейд ийиз хьанач, вучиз лагьайтӀа мейитдик хкӀуна чиркин хьанвай. Лап гьа юкъуз Мусадинни Гьарунан кьилив атана 7абуру Мусадиз лагьана: «Мейитдик хкӀуна чун чиркин хьана, амма чун тайинарнавай вахтунда Исраилдин вири рухвайрихъ галаз санал Реббидиз ийидай умуми къурбандрикай къерех авун квез герек я?» 8«Куь гьакъиндай Реббиди вуч эмир ийидатӀа за чирдалди, вил алаз акъваз», – жаваб гана Мусади.
9Реббиди Мусадиз лагьана: 10«Исраилдин рухвайриз лагь: „Квекай ва я куь эвледрикай сад мейитдик хкӀуналди чиркин хьайитӀа, я тушни яргъал рекье аваз хьайитӀа, адавай гьар гьикӀ хьайитӀани Реббидин Песагь къейд ийиз жеда. 11-12Ада ам кьвед лагьай вацран цӀукьуд лагьай юкъуз рагъдандиз къейд авурай. Ада тӀили фахъ ва туькьуьл хъчарихъ галаз, пакамалди адакай са затӀни тун тавуна ва гьич са кӀарабни хун тавуна, кӀел тӀуьрай. Песагь кьиле тухудайла, ада вири къалурнавай къайдаяр кьиле тухурай. 13Амма вич михьи ва рекье авачир касди Песагь къейд тавуртӀа, ам вичин халкьдикай акъудна гадарда, вучиз лагьайтӀа ада тайинарнавай вахтунда Реббидиз садакьа ганач. Ада жавабдарвал чӀугвада.
14Куь арада уьмуьр тухузвай масанай атана ацукьнавайдаз Реббидин Песагь къейд ийиз кӀан хьайитӀа, ада къалурнавай къайдаяр ва тагькимар кьилиз акъудрай. Квехъ гьам куь арада уьмуьр тухузвай масанай атана ацукьнавайдахъ, гьамни уьлкведин эгьлидихъ сад хьтин къалурнавай къайдаяр хьурай“».
Алачухдин кьилел циф
15КӀвал, Шагьидвилин Алачух, эцигай юкъуз, цифеди кӀевна. Нянилай пакамалди ам Алачухдин винел алаз хьана ва цӀуз ухшар тир. 16ДатӀана гьа икӀ тир: цифеди ам юкъуз кӀевдай, йифиз лагьайтӀа ам цӀуз ухшар тир. 17Циф Алачухдал хкаж хьайи чӀавуз исраилвияр рекье гьатдай. Гьинал циф акъваз хьайитӀа, гьанал Исраилдин рухвайри кун кутадай. 18Реббидин эмирдалди Исраилдин рухваяр рекье гьатдай, ва Адан эмирдалди кун кутадай. Циф Алачухдал аламай кьван, абур кундал алаз жедай. 19Гьатта циф Алачухдин винел хейлин вахтуналди аламаз хьайитӀани, Исраилдин рухвайри Реббидиз яб гудай ва рекьиз экъечӀдачир. 20Бязи вахтара циф Алачухдин винел са шумуд юкъуз жедай. Тек са Реббидин эмирдалди абур кун кутуна акъваздай, ва Адан эмирдалди рекье гьатдай. 21Бязи вахтара циф нянилай пакамалди акъваздай, пакамахъ ам хкаж хьайи чӀавуз лагьайтӀа, абур рекье гьатдай. Юкъуз ва я йифиз, мус циф хкаж хьайитӀани, абур рекьиз экъечӀдай. 22Кьве юкъуз, са вацра ва гьадалайни гзаф – гьикьван чӀавалди циф Алачухдин винел алаз хьайитӀани, Исраилдин рухваяр кундал аламукьдай ва рекьиз экъечӀдачир. Амма ам хкаж хьайила, абур рекье гьатдай. 23Реббидин эмирдалди абуру кун кутадай, ва Адан эмирдалди рекье гьатдай, чпиз Реббиди Мусадин мецелай гузвай эмирар кьилиз акъуддай.
Currently Selected:
Кьурумда 9: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
