Кьурумда 19
19
Михьи хъувунин яд
1Реббиди Мусадизни Гьаруназ лагьана: 2«Ингье Реббиди къалурнавай къанундин къайдаяр: Исраилдин рухвайриз ви кьилив викӀиник тахьай рехне квачир яру дуьгве гъиз тур. 3Ам хахам Элазарав гице. Ам кундилай къерехдиз акъудна, гьамни алаз тукӀурай. 4Хахам Элазара дуьгведин иви тупӀалди къачуна, Гьалтунин Алачухдин вилик пад галайвал иридра хъичинрай. 5Гьадаз акваз дуьгведин хам, як, иви ва нежесар курай. 6Хахамди муьтквердин кӀарас, исуп набатат ва икьи яру рангунин сар къачуна, абур кузвай дуьгведал вегьирай. 7Идалай кьулухъ хахамди вичин парталар чуьхуьрай ва вични эхъуьрай. Гила адавай кундал хквез жеда, амма няналди чиркин яз амукьда. 8А дуьгве кайидани парталар чуьхуьрай ва вични эхъуьрай. Гьамни няналди чиркин яз амукьда.
9Михьи тир сада, дуьгведин руьхъ кӀватӀна, ам кундилай къерехда са михьи чкадал эциграй. Ам Исраилдин элди михьивилиз акъуддай яд патал хуьрай. Им – гунагьдай къурбанд я. 10Дуьгведин руьхъ кӀватӀайда парталар чуьхуьрай. Гьамни няналди чиркин жеда.
И къалурнавай къайда гьам Исраилдин рухваяр, гьамни абурун арада уьмуьр тухузвай масанай атана ацукьнавайбур патал даиманди жеда.
11Мейитдик хкӀунвайди ирид йикъан вахтуналди чиркин жеда. 12Ада пуд ва ирид лагьай юкъуз вич целди михьивилиз акъудрай; ахпа ам михьи жеда. Амма ада вич пуд ва ирид лагьай юкъуз михьивилиз акъуд тавуртӀа, ам чиркин яз амукьда. 13Мейитдик хкӀунвайда ва михьивал тавунвайда Реббидин Алачух чиркин ийизва. Ихьтин кас Исраилдай акъудна гадарун лазим я. Ам михьивилиз акъуддай целди хъичиннавач: ам чиркин я; адан чиркинвал адал аламукьзава.
14Сад алачухдик кьейитӀа, ингье къанун: алачухдиз гьахьай гьар гьим хьайитӀани ва ана авай гьар гьим хьайитӀани ирид юкъуз чиркин жеда, 15ва къапсах алачир илисна кӀев тавунвай гьар гьихьтин хьайитӀани къаб-къажах чиркин жеда.
16Чуьлда турунив яна кьенвайдак ва я вичин ажалдикди кьенвайдак ва инсандин кӀарабдик ва я сурук хкӀур гьар вуж хьайитӀани ирид юкъуз чиркин жеда. 17Чиркин хьанвай кас патал са къапуна гунагьдай къурбанддикай амай руьхъ эциграй ва винелай авахьна физвай яд эличрай. 18Михьи тир сада исуп набатат къачуна ам цик кяна ва я алачух, вири къаб-къажах, ана авай инсанар ва я вичи инсандин кӀарабдик, сурук, яна кьенвайдак ва я вичин ажалдикди кьенвайдак хкӀунвайди хъичинрай. 19Вич михьи тир касди чиркин хьанвай инсан пуд ва ирид лагьай юкъуз хъичинрай; икӀ ада ирид лагьай юкъуз ам михьивилиз ахкъудда. Михьи хьанвайда парталар чуьхуьрай ва вични эхъуьрай. Гьа няниз ам михьи хъижеда. 20Амма чиркин хьанвайда вич михьивилиз акъуд тавуртӀа, ам Реббидин ибадатхана чиркин авунай жемятдин арадай акъудна гадарна кӀанда. Ам михьивилиз акъуддай целди хъичинначир: ам чиркин я. 21И къалурнавай къайда абур патал даиманди жеда.
Михьивилиз акъудунин целди хъичинзавайдани михьивилин цик хкӀунвайда парталар чуьхуьрай. Абур няналди чиркин жеда. 22Чиркин хьанвайди хкӀур вири затӀар чиркин жеда, ва абурук ни кягъайтӀани няналди чиркин жеда».
Currently Selected:
Кьурумда 19: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
