Кьурумда 1
1
Синайдин вакъиаяр
(1:1–10:10)
Исраилдин халкьдин кьадар тайинарун
1Кьвед лагьай вацран сад лагьай юкъуз, исраилвияр Мисридай экъечӀайдалай инихъ кьве йис хьайила, Ребби Синайдин кьурумда Гьалтунин Алачухда Мусадихъ галаз раханай. Ада лагьана: 2«Исраилдин элдин, сад садан гуьгъуьналлаз, гьар са итимдин тӀвар кьуна, тухум ва сихил тирвал кьадар тайинара. 3Гьарунахъ галаз санал аскервиле къуллугъ авуниз виже къведай вири исраилвияр, къад йис хьанвайбурулай гатӀунна ва гьадалай виниз, халкьдин кьушундин къайдада къелемдиз къачу. 4Гьар са тайифадай квез, вич вичин сихилдин кьил тир са касди куьмек авурай. 5Ингье квез куьмек гудайбурун тӀварар:
Рувенан патай – Шедеуран хва Элицур;
6Шимунан патай – Цуришаддаян хва Шелуьмиял;
7 Ягьудан патай – Аминадабан хва Нагьшун;
8Исахаран патай – Цуаран хва Натанаил;
9Забулунан патай – Гьелунан хва Элиаб.
10Юсуфан рухвайрин патай:
Ифраиман патай – Амигьудан хва Элишам;
Манашедин патай – Педацуран хва Гамалиял.
11Бунъяминан патай – Гидеунидин хва Абидан;
12Данан патай – Амишадаян хва Агьиэзер;
13Ашеран патай – Ахранан хва Пагиял;
14Гадан патай – Дегуялан хва Элиасаф;
15Нифталидин патай – Энанан хва Агьир».
16Ибур вири элдин патай тайинарнавайбур, тайифайрин регьберар, Исраилдин тухумрин кьиле авайбур тир.
17Мусадини Гьаруна тӀварба-тӀвар къалурнавай ксарихъ галаз санал 18-19кьвед лагьай вацран сифте юкъуз элдиз эверна. Исраилвийри чпин тухумдик акатзавайбур сихил тирвал малумарна, ва къад йис ва гьадалай гзаф тамам хьанвайбур, Реббиди Мусадиз эмир гайивал, сад садахъ галаз тӀварар кьаз къелемдиз къачуна. Ада Синай кьурумда авай абур икӀ гьисабна:
20 Исраилан сифте хва тир Рувенан эвледрикай:
аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар гьисабна. 21Рувенан тайифада абурун кьадар 46500 тир.
22Шимунан эвледрикай:
аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар къелемдиз къачуна. 23Шимунан тайифада абурун кьадар 59300 тир.
24Гадан эвледрикай:
аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар къелемдиз къачуна. 25Гадан тайифада абурун кьадар 45650 тир.
26Ягьудан эвледрикай:
аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар гьисабна. 27Ягьудан тайифада абурун кьадар 74600 тир.
28Исахаран эвледрикай:
аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар къелемдиз къачуна. 29Исахаран тайифада абурун кьадар 54400 тир.
30Забулунан эвледрикай:
аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар гьисабна. 31Забулунан тайифада абурун кьадар 57400 тир.
32Юсуфан хва Ифраиман эвледрикай:
аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар къелемдиз къачуна. 33Ифраиман тайифада абурун кьадар 40500 тир.
34Юсуфан хва Манашедин эвледрикай:
аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар къелемдиз къачуна. 35Манашедин тайифада абурун кьадар 32200 тир.
36Бунъяминан эвледрикай:
аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар къелемдиз къачуна. 37Бунъяминан тайифада абурун кьадар 35400 тир.
38Данан эвледрикай:
аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар къелемдиз къачуна. 39Данан тайифада абурун кьадар 62700 тир.
40Ашеран эвледрикай:
аскервиле къуллугъ авуниз виже къведай, къад йис ва гьадалай виниз тамам хьанвай вири итимар сад садахъ галаз тухум ва сихил тирвал тӀварба-тӀвар къелемдиз къачуна. 41Ашеран тайифада абурун кьадар 41500 тир.
42Нифталидин эвледрикай:
аскервиле къуллугъ авуниз виже къведай, къад йис ва гьадалай виниз тамам хьанвай вири итимар тухум ва сихил тирвал тӀварба-тӀвар къелемдиз къачуна. 43Нифталидин тайифада абурун кьадар 53400 тир.
44Гьа ибур Мусадини Гьаруна ва чпикай гьар сада вичин сихилрин векилвал ийизвай Исраилдин цӀикьвед регьберди сиягьдиз къачунвай итимар тир. 45Аскервиле къуллугъ авуниз виже къведай, чпин къад йис ва гьадалай виниз тамам хьанвай вири Исраилдин рухваяр чпин сихилар тирвал сиягьдиз къачунай. 46Абурун виридан кьадар 603550 тир. 47Амма Левидин тайифадай тирбур амайбурухъ галаз санал сиягьдиз къачунвачир.
48Реббиди Мусадиз лагьана: 49«Левидин тайифа къелемдиз къачумир ва амай Исраилдин рухвайрихъ галаз санал абурун кьадар тайинармир. 50Левийрал Шагьидвилин Алачух, адан вири къаб-къажах ва адаз талукь тир вири затӀар аманат ая. Абуру Алачух ва адаз талукь тир вири къаб-къажах ял авурай, абурун патахъай къайгъударвал авурай ва Алачухдин къваларив чпин кун туькӀуьр авурай. 51Алачух маса чкадиз акъуддай чӀавуз, ам левийри алудрай, ам экӀягъун герек тирла, гьа и кӀвалахни абуру кьилиз акъудрай. Патан кас адан мукьув атайтӀа, ам ажалдин хура твада. 52Исраилдин рухвайри алачухар халкьдин кьушундин къайдада, гьар сада вичин кундал, вичин пайдахдик экӀяда. 53Амма левийри, Исраилдин эл хъилек акат тийидайвал, алачухар элкъвена Шагьидвилин Алачухдин къваларив эцигда. Левияр Шагьидвилин Алачухдин къаравулар жеда».
54Исраилдин рухвайри, Реббиди Мусадиз гьикӀ эмир авунатӀа, вири дуьм-дуьз гьа жуьреда авуна.
Currently Selected:
Кьурумда 1: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
