МатӀай 22

Мехъерин межлисдикай кьиса

(ЛукӀа 14:16-24)

1 Исади чӀехи хахамризни фарисейриз мад са кьиса ахъайна:

2– Цаварин Пачагьлугъ вичин хциз мехъер ийиз гьазур хьанвай са пачагьдив гекъигиз жеда. 3Ада вичин лукӀар мугьманриз мехъерик эвериз ракъурна. Амма ша лагьайбуруз къвез кӀан хьанач. 4Ада мад вичин маса лукӀар ракъурна лагьана: «За теклифнавайбуруз фена лагь: „тӀуьн-хъун за гьазурнава, хвенвай данаярни жунгавар тукӀунва, вири гьазур я. Ша мехъерин межлисдиз“». 5Ша лагьайбуру мад адан теклиф япа кьун тавуна, гьар сад санихъ фена: садбур чпин никӀерал фена, садбур чпин алвердин гуьгъуьна гьатна; 6амайбуру адан лукӀар кьуна, абур гатана, яна кьена.

7А крарикай ван хьайи пачагьдиз хъел атана. Ада вичин кьушунар ракъурна абур телефна ва абурун шегьерни кана. 8Ахпа ада вичин лукӀариз лагьана: «Мехъерин межлис гьазур я, амма межлисдиз теклифнавайбур лайихбур хьанач. 9ГьакӀ хьайила алад куьчейрай тӀуз, гьалтай-гьалтайдаз зи межлисдиз теклифа». 10Абуру фена чпел гьалтай кьван хъсан ва пис инсанар кӀватӀна, межлис абуралди ацӀурна.

11Ахпа пачагь вичин мугьманриз килигиз атана, абурун арада адаз мехъерихъ галаз кьан тийизвай парталар алай са кас акуна. 12«Ихьтин пекер алаз вун иниз гьикӀ атанва, дуст кас?» – лагьана адаз пачагьди. Ада жаваб ганач.

13Инал пачагьди вичин кьилел-кӀвачел элкъвезвайбуруз лагьана: «Адан гъилерни кӀвачер кутӀунна, къачуна ам мичӀи къецел гадара, ана жедайди шел-хвални сарар регъуьнар я».

14Ша лагьанвайбур гзаф жеда, амма абурукай хкянавайбур – тӀимил.

Пачагьдиз гудай харж

(Марк 12:13-17; ЛукӀа 20:20-26)

15Гьадалай кьулухъ фарисеяр анай экъечӀна, Иса гафунал гьикӀ кьаз жедатӀа лугьуз, меслятар ийиз хьана. 16Абуру Адан патав Гьируд пачагьдин терефдарарни галаз чпин тилмизар ракъурна.

– Я Муаллим! – лагьана тилмизри. – Вун гьакъикъи я, Вуна, садазни гардан кӀирвал тавуна, Аллагьдин рекьер дуьздаказ къалурзава. Вун масадаз чин чуьхуьдай гафар талгьудай инсан тирди чаз чизва. 17ГьакӀ хьайила Вуна чаз лагь: Римдин пачагьдиз харж гун дуьз кар жезвани, жезвачни?

18Амма Исади, абурун чӀуру фикирар чиз, лагьана:

– Кьве чин алайбур! Куьне вучиз Зун кӀеве твазва? 19Харжунай гана кӀанзавай пул куьне Заз къалура.

Абуру динар гъана.

20– Идал алай шикил ва кхьенвай тӀвар нинди я? – хабар кьуна Исади.

21– Пачагьдинди я, – жаваб гана абуру.

– Гьавиляй пачагьдин пай пачагьдиз це, Аллагьдин пай – Аллагьдиз, – лагьана Исади.

22И гафарин ван хьайила, абур мягьтел хьана. Ам анал туна, абур хъфена.

Кьейибурал чан хтуникай

(Марк 12:18-27; ЛукӀа 20:27-40)

23Гьа юкъуз Исадин патав кьейидалай кьулухъ инсандал чан хкведач лугьудай сакъаяр атана, 24Адавай хабар кьуна:

– Муаллим! Мусади лагьанай: «Стхайрикай сад аялар тахьана кьейитӀа, къуй муькуь стхади адан паб къахчуна вичин стхадин тухум кухтурай»#Киххьей Къанун 25:5-6..

25Чи арада ирид стха хьана. Сад лагьайда паб гъана, амма вич кьена. Адахъ аялар тахьуниз килигна, адан паб кьвед лагьай стхадиз хкана. 26Гьам хьиз кьвед лагьайдини, пуд лагьайдини, гьатта ирид лагьай стхани кьена. 27Эхирдай гьа пабни кьена. 28Ам вири стхайрик гъуьлуьк хьуниз килигна, абурал чан хтайдалай кьулухъ а паб ирид стхадикай гьи стхадин паб жеда?

29– Квез я Калам, я Аллагьдин къуват течидайвиляй куьн гъалатӀ жезва, – жаваб гана Исади. – 30Чан хтайла инсанрин арада я папар гъунар, я гъуьлуьз финар хъжедач. Абур цавараллай малаикар хьиз жеда.

31Кьейибурал чан хтуникай рахайтӀа, квез и кардикай Аллагьди вуч лагьанватӀа куьне кӀелначни? 32Ада лагьанай: «Зун Ибрагьиманни, Исакьанни, Якьубан Аллагь я»#ЭхкъечӀун 3:6.. Ам кьейибурун ваъ, чан алайбурун Аллагь я.

33И гафарин ван хьайи халкь Адан гафарал мягьтел хьана.

Виридалайни кьилин тагьким

(Марк 12:28-31; ЛукӀа 10:25-28)

34Исади Вичин жавабралди сакъаяр кӀеве туна лагьай ван галукьай фарисеяр санал кӀватӀ хьана. 35Абурукай са тавратдарди, Иса кӀеве тваз кӀанз, хабар кьуна:

36– Я Муаллим! Аллагьдин вири тагькимрикай важибди гьим я?

37Исади лагьана:

– «Жуван Ребби Аллагь рикӀин вири сидкьидай, жуван вири руьгьдалди, жуван вири кьатӀунралди кӀан хьухь»#Киххьей Къанун 6:5.. 38Им сифтегьан ва лап важиб авай тагьким я. 39Гьадаз ухшар тир кьвед лагьай тагькимни ава: «Жув хьиз жуван мукьув гвайдини кӀан хьухь»#Леви 19:18.. 40Къанун ва пайгъамбаррин ктабар и кьве тагькимдал акъваз хьанва.

Месигь – Давуд пачагьдин Хва яни?

(Марк 12:35-37; ЛукӀа 20:41-44)

41Ахпа санал кӀватӀ хьайи фарисейриз Исади суал гана:

42– Месигьдикай куьне вуч фикирзава? Ам нин хва я?

– Давуд пачагьдин Хва я, – жаваб гана абуру.

43– Бес Руьгь акатай Давуд пачагьди вучиз Месигьдиз Агъа лугьузвай? – хабар кьуна Исади. – Давуда лагьана: 44«Реббиди зи Агъадиз лагьанай: „Ви душманар За Ви кӀвачерик вегьидалди Зи эрчӀи гъилихъай ацукь“»#Забур 109:1.. 45Давуд пачагьди Месигьдиз Агъа лугьуз хьайила, Ам адан хва гьикӀ жезвайди я?

46Садавайни са жавабни гуз хьанач ва гьа йикъалай эгечӀна мад Адавай са куьникайни хабар кьадай жуьрэт абуру хъувунач.

Currently Selected:

МатӀай 22: ЛезПК

Highlight

Copy