МатӀай 16

Фарисейрин тӀалаб

(Марк 8:11-21; ЛукӀа 12:54-56)

1Адан патав сакъаярни фарисеяр атана. Иса синагъ ийиз кӀанз, абур Адал Цавараллайдавай къалуриз жедай хьтин керемат-ишара ая лугьуз алахъна. 2Ада жаваб яз лагьана:

– Нянихъ квез цав яру яз акуртӀа, куьне лугьуда: хъсан гьава жеда. 3Экуьнахъ фад цав яру яз акуртӀа, куьне лугьуда: къе чӀимел гьава жеда. Цавуз килигиз квевай гьихьтин гьава жедатӀа тайинариз жезва, амма исятда гьихьтин вахт алукьнаватӀа, адан ишарайрай куь кьил акъатзавач.

4Къенин несил гьикьван чӀур ва чалкечир хьанва! И несилди керемат-ишара тӀалабзава, амма адаз Юнусан керемат-ишарадилай гъейри маса керемат-ишара аквадач.

Ам, гьабур туна, хъфена.

5Исадин тилмизар вирин а патаз экъечӀна, амма фу къачун абурун рикӀелай алатна. 6Исади абуруз лагьана:

– Килиг гьа, фарисейринни сакъайрин маядикай мукъаят хьухь.

7Тилмизри, лагьайтӀа, чпив фу гвач лугьуз ихтилатарзавай.

8Абурун гъавурда авай Исади лагьана:

– Фу гвач лугьун вуч лагьай чӀал я, иманда зайифбур? 9Куьн гилани са куьнинни гъавурда гьатнавачни? Куь рикӀел За вад фалди вад агъзур итим тухарайди аламачни? Амукьай фарай куьне шумуд зимбил ацӀурнай? 10Куь рикӀел За ирид фалди кьуд агъзур итим тухарайди аламачни? Амукьай фарай куьне шумуд зимбил ацӀурнай? 11За квез лагьайди факай туширди куьне вучиз кьатӀанач? Килиг гьа, фарисейринни сакъайрин маядикай мукъаят хьухь.

12Инал абур Ада лугьузвай мая фак кутадай мая туширдан гъавурда гьатна, Ам рахазвайди фарисейринни сакъайрин чирвилерикай тир.

Петруди иман къалурун

(Марк 8:27-30; ЛукӀа 9:18-21)

13Иса ФилипӀан Кесар шегьер авай патариз атайла, Ада Вичин тилмизривай хабар кьуна:

– Инсанри Зун, яни Инсандин Хва, вуж я лугьузва?

14– Садбуру Ягья пайгъамбар, муькуьбуру – Ильяс, пуд лагьайбуруни – Ермиягь ва я маса пайгъамбаррикай сад я лугьузва, – жаваб гана абуру.

15– Куьне Зун вуж я лугьузва? – жузуна Ада.

16– Ви Буба чан алай Аллагь я, Вун Адан Хва Месигь я, – жаваб гана Симун-Петруди.

17А чӀавуз Исади лагьана:

– Бахтавар я вун, Юнусан хва Симун, и гафар ваз инсанри чирнавайди туш, абур ваз цавараллай Зи Бубади чирнавайбур я. 18Зани ваз лугьузва: вун – Петру (яни Раг) я, гьа и раг За Захъ иманийрин кӀватӀалдин бинеда эцигда, гьатта агъа дуьньядин къуватривайни адан хура акъвазиз жедач. 19Вав За Цаварин Пачагьлугъдин куьлег вугуда: вуна чилел вуч къадагъа авуртӀа, гьам Цавараллайда къадагъа ийида; вуна чилел вуч ихтиярар гайитӀа, цавараллайдани гьа ихтиярар гуда.

20Исади Вичин тилмизривай Вич Месигь тирди садазни талгьун тӀалабна.

Исади Вичин кьиникьикай сад лагьай гъилера лугьун

(Марк 8:31–9:1; ЛукӀа 9:22-27)

21Гьа чӀавалай эгечӀна Исади Вичин тилмизриз Вич Ярусалимдиз фин лазим тирдакай лагьана:

– Агъсакъалри, чӀехи хахамри, тавратдарри Заз гзаф азиятар гуда, абуру Заз кьиникьин жаза гуда, пуд йикъалай Зал чан хкведа.

22Петруди Адаз къерехдиз эверна лагьана:

– Аллагьди яргъазрай, Агъа! Ви кьилел ахьтин крар татурай!

23Ада Петрудихъ элкъвена лагьана:

– Алат Залай, иблис! Ваз Зун рекьелай алудиз кӀанзавани? Ви рикӀе авайди Аллагьдиз талукьди ваъ, вири инсанри ийидай хьтин фикирар я.

24Ахпа Исади Вичин тилмизриз лагьана:

– Низ Захъ галаз къвез кӀанзаватӀа, къуй ам, чандилай гъил къачуна, вичин азабрин хашни кӀулаз яна Захъ галаз атурай. 25Низ вичин чан хуьз кӀанзаватӀа, адавай ам къакъудда. Зун патал ни вичин чан эцигайтӀа, адаз чан жагъин хъийида. 26Вичин чан пучна вири дуьнья къачуникай инсандиз вуч хийир ава? Къакъатай чан элкъвена къахчун патал гудай затӀ жагъинни мегер?

27Инсандин Хва, Вичин Бубадин баркалладик кваз, Вичин малаикарни галаз атана ахкъатда. Гьа чӀавуз Ада, чпин крариз килигна, гьардал къведайди вичел агакьарда. 28За квез рикӀивай лугьузва: инал акъвазнавайбурук ахьтинбур ква хьи, абуруз пачагь яз къведай Инсандин Хва акун тавунмаз, гьич ажални аквадач.

Currently Selected:

МатӀай 16: ЛезПК

Highlight

Copy