МатӀай 12

Киш йикъан гъавурда тун

(Марк 2:23-28; ЛукӀа 6:1-5)

1Гьа чӀавуз, са Киш юкъуз, Иса къуьлер цанвай никӀяй тӀуз физвай. Адан тилмизриз гишин хьанвай; абуру фидай рекье кьилер атӀуз, къуьлуьн тварар нез хьана. 2И кар фарисейриз акурла, абуру Исадиз лагьана:

– Килиг, Ви тилмизри Киш юкъуз къадагъа кар ийизва.

3– Давуд пачагьдиз ва адахъ галайбуруз гишин хьанвайла, абуру вуч авунатӀа, куьне Каламдай кӀелначни мегер? – лагьана Исади. – 4Давуда, Аллагьдин КӀвализ гьахьна, Реббидин вилик жедай фар къачуна вичини тӀуьна, галайбурузни гана. А фар хахамрилай гъейри садазни недай ихтияр авачир.

5Я тахьайтӀа хахамри Киш юкъуз Аллагьдин КӀвале кӀвалах авуналди Киш чӀурзавайди куьне кӀелначни мегер? Амма абурук тахсир квач. 6Амма За квез лугьузва: инал куь вилик Квайди Аллагьдин КӀвалелайни вине я. 7Куьн «Заз квевай кӀанзавайди къурбанд ваъ, регьим я»#Гьаши 6:6. гафарин гъавурда акьазвайтӀа, куьне тахсир квачирбурук тахсир кутадачир.

8 Инсандин Хва Киш йикъанни Иеси я.

Киш юкъуз сагъар хъувун

(Марк 3:1-6; ЛукӀа 6:6-11)

9Гьанай Иса синагугдиз фена. 10Ана члахъ гъил галай са инсан авай. Исадик тахсир кутаз кӀанз, фарисейри Адавай хабар кьуна:

– Киш юкъуз инсанар сагъар хъувун Къанундихъ галаз кьазвани?

11– Авай-авачир са хеб Киш юкъуз фуруз аватайтӀа, квекай ни ам акъуд тавуна гьана тада? – жаваб гана Исади. – 12Амма инсан хипелай артух я! ГьакӀ хьайила Мусадин Къанунди Киш юкъузни хийирдин крар ийидай ихтияр гузва!

13Ахпа Ада члахъдаз лагьана:

– Ви гъил инихъ ая.

Ада гъил яргъи авуна. Гьасятда адан гъил, муькуь гъил хьиз, сагъ хъхьана.

14Анай экъечӀайла, фарисейри, Иса рекьидай рекьер жагъурун патал, чпи чпихъ галаз меслятар ийиз хьана.

Хкянавай лукӀ

(Марк 3:7-12; ЛукӀа 6:17-19)

15Амма Исадиз и кар чизвай, Ам анай экъечӀна хъфена. Адан гуьгъуьна аваз гзаф инсанар фена; Ада, вири сагъариз, 16абуруз Вич вуж ятӀа лугьумир лугьуз хьана. 17Гьа икӀ, Яшай пайгъамбардин мецелай лагьай ихьтин гафар кьилиз акъатна:

18 «Ингье За хкянавай Зи ЛукӀ,

Адал Зи рикӀ ала, Зи шадвал Гьадалди я.

Адаз За Зи Руьгь гуда.

Ада халкьариз гьахъ дуван малумарда.

19 Ада гафунал гаф эцигдач, гьарай-эвер твадач,

куьчейра гьарай ацалтна ихтилатар ийидач.

20 Гьахъ дуван гъалиб тавунмаз, Ада я алгъанвай # 12:20 Алгъун – юкь агъузун нацӀ хадач,

я хкахьиз гьазур хьанвай чирагъ туьхуьрдач.

21 Вири халкьари чпин умудар Гьадак кутада» # Яшай 42:1-4. .

Иса ва Багьал-Зевул

(Марк 3:22-30; ЛукӀа 11:14-23; 12:10)

22Гьа чӀавуз Исадин патав жинерар квай буьркьуь ва лал са кас гъанай; Исади ам сагъарнай. А кас рахаз эгечӀнай ва адан вилерни ачух хъхьанай. 23Халкь мягьтел хьана:

– Белки и кас Давуд пачагьдин Хва ятӀа? – лугьуз хьана абуру.

24И гафар ван хьайи фарисейри лагьана:

– Жинерар хкуддай къуват Ада жинеррин кьилевайди тир Багьал-Зевулавай къачузва.

25Амма абурун фикиррин гъавурда авай Исади лагьана:

– Са пачагьлугъ сад садаз акси кьве патахъ пай хьайитӀа, а пачагьлугъ яргъалди амукьдач. Шегьер ва я хизан кьве патахъ пай хьайитӀа, а шегьер ва я кӀвал чӀур жеда. 26Иблисди вичи жин чукурзаватӀа, ам вич вичиз акси экъечӀзава. А чӀавуз адан пачагьлугъ сагъ амукьун мумкин яни? 27За а къуват Багьал-Зевулавай къачузватӀа, куь терефдарри ахьтин къуват нивай къачузва? Куь дуван ийидайбур гьабур хьурай! 28Куьне За жинерар хкуддай къуват Аллагьдин Руьгьдивай къачузва лагьайтӀа – им квехъ Аллагьдин Пачагьлугъ агакьна лагьай чӀал жеда.

29Низ гуж авай касдин кӀвал атӀуз кӀанзаватӀа, ада эвелни-эвел къуват авайдан гъилер-кӀвачер кутӀунна кӀанда, идалай кьулухъ кӀвал тарашиз жеда. 30Вуж Захъ галаз туштӀа, ам Заз акси я; ни Зун галачиз вуч кӀватӀнатӀа, гьам вара-зара ийида. 31ГьакӀ хьайила За квез лугьузва: инсанрин гунагьрилайни, абуру ийизвай аси ихтилатрилайни гъил къахчуда, амма вуж Руьгьдикай чӀурукӀа рахаз хьайитӀа, адалай гьич садрани гъил къахчудач. 32Ни Инсандин Хцикай чӀуру гаф лугьузватӀа, адалай гъил къахчуда, вуж Пак Руьгьдикай чӀурукӀа рахаз хьайитӀа, адалай я и девирда, я къведай цӀийи девирда гъил къахчудач.

Тарарикайни майвайрикай

(ЛукӀа 11:43-45)

33Квез чизва, тар хъсанди ятӀа, адан майваярни хъсанбур жеда, тар писди ятӀа, адан майваярни писбур жеда. Тар писди яни, хъсанди яни, адан майвайрилай чир жеда. 34Гъуьлягъдин къеняй акъатайбур! Куьн ихьтин писбур яз хьайила, куьне хъсан гафар гьикӀ хьана лугьузвайди я? РикӀ ацӀайла, инсанди вичин рикӀе авайди лугьузвайди я. 35Хъсан инсанди хъсанвал вичин рикӀин хазинадай къачуна ийида, пис инсанди – писвал вичин пис рикӀяй. 36Амма За квез лугьузва хьи, нагьакьан гафар лагьай инсанри Къияматдин юкъуз а гафарай жаваб гана кӀанда. 37Ви гафариз килигна, вун гьахъ-михьивилиз акъудунни мумкин я, жаза гунни.

Юнус пайгъамбардин ишара

(МатӀай 16:4; ЛукӀа 11:29-32)

38Гьа чӀавуз тавратдаррикайни фарисейрикай са бязибуру Адавай хабар кьуна:

– Муаллим! Чаз са керемат-ишара къалура ман.

39Амма Ада абуруз жаваб яз лагьана:

– Къенин несил гьикьван чӀур ва чалкечир хьанва! И несилди керемат-ишара тӀалабзава, амма адаз Юнусан керемат-ишарадилай гъейри, маса керемат-ишара аквадач. 40Юнус пуд юкъузни пуд йифиз гьуьлуьн чӀехи гъетрен руфуна гьикӀ хьанатӀа, гьакӀ Инсандин Хвани чилин рикӀе пуд йифизни пуд юкъуз жеда. 41Къияматдин юкъуз Ниневдин агьалийри и несилдиз кар атӀуда. Юнусан несигьатриз яб гайи Ниневдин агьалийри туба авунай ва несилдиз Юнусалайни ЧӀехидан несигьатрин ван къвезва.

42Кьибле патан пачагь-ханум чилин лап а кьиляй Сулейман пачагьдин камал квай гафариз яб гуз атанай. И несилдиз Сулейман пачагьдилайни ЧӀехидан гафарин ван къвезва. Гьавиляй Къияматдин юкъуз кьибле патан пачагь-ханумди и несилдиз кар атӀуда.

Жин элкъвена хтун

(ЛукӀа 11:24-26)

43Жин инсандай экъечӀайла, яд авачир кьурумра вичиз секин са чка жагъун тавурла, къекъвез гьатна, ада лугьуда:

44– Жуван кӀвализ хъфин кван!

Элкъвена аниз хтайла, адаз анаг ичӀи яз ва къакъажнаваз жагъида. 45Гьанлай ам фена, вичелайни бетер ирид маса жинни къачуна вич кваз хьайи инсандиз гьахь хъийида ва архайин жеда. А жинерар акатай инсандиз авайдалайни пис жеда. И чӀуру несилдизни гьакӀ жеда.

Исадин дидени стхаяр

(Марк 3:31-35; ЛукӀа 8:19-21)

46Исади и ихтилат ийизвай чӀавуз Адан дидени стхаяр атана. Абуруз Адахъ галаз рахаз кӀанзавай. Амма абур кӀвализ гьахьнач. 47Са ни ятӀани Исадиз лагьана:

– Ви дидени стхаяр Вав рахаз кӀанз къецел акъвазнава.

48– Дидени стхаяр Зун патал вужар я кьван? – жаваб гана Ада.

49Вичин тилмизар гъилив къалурна, Ада лагьана:

– Ингье Зи диде ва Зи стхаяр-вахар! 50Цавараллай Зи Бубадин къаст ни кьилиз акъудзаватӀа, гьам Зи стхани я, вахни я, дидени!

Currently Selected:

МатӀай 12: ЛезПК

Highlight

Copy