МатӀай 10

Тилмизар чирвилер гуз ракъурун

(Марк 3:15-19; 6:7-11; ЛукӀа 6:14-16; 9:1-5; Кр. 1:13)

1 Исади Вичин цӀикьвед тилмиздиз эверна, абуруз чӀуру жинерар хкуддай ихтияр ва гьар жуьредин тӀаларни азарар сагъар хъийидай къуват гана. 2ЦӀикьвед илчидин тӀварар ибур я: сад лагьайди, вичиз гьакӀни Симун лугьузвай, Петру, адан стха Эндирей, Зебедеян рухваяр тир Якьуб ва Ягья, 3ФилипӀ ва БартӀаламай, ТӀумай ва харж кӀватӀдайди тир МатӀай, Гьалфеян хва Якьуб ва Тадас, 4Симун Миллетбаз ва Иса маса гайи Искарият Ягьуд.

5Исади и цӀикьведни ракъурдайла, абуруз эмир авуна:

– Чувудар туширбурун вилаятриз фимир, самариятвийрин шегьердизни гьахьмир. 6Сифтени-сифте куьн, хипер хьиз, телеф хьанвай Исраилдин халкьдин патав алад. 7Вач, абуруз Цаварин Пачагьлугъдин вахт хьанвайдакай хабар це. 8Азарри кьунвайбур сагъар хъия, жузам квайбур михьи ая, кьейибурал чан хкваш, жинерар хкуда; квез гьавайда гьатайди гьавайда хгунни ая.

9Фидайла, жувахъ галаз я къизил, я гимиш, я къара пул къачумир, 10рекьиз я гьебе, я кьве къат пекер, я кӀвачин къапар, я аса тухумир, зегьметкешдив вичин тӀуьн агакьда. 11Гьи шегьердиз ва я хуьруьз куьн фейитӀа, ана лайих авай инсан вуж ятӀа жузуз; хъфидалди гьана акъваз. 12КӀвализ гьахьдайла, иесидиз «хийирар хьуй» лагь. 13КӀвал лайих авайди хьайитӀа, куьне а кӀвализ гъидай хийир ана амукьда; лайих авайди тахьайтӀа, куь хийир квел хкведа. 14Куьн са кӀвале, я са шегьерда кьабул тавуртӀа ва куь гафариз яб тагайтӀа, анай экъечӀна хъфидайла, кӀвачерал алай ругни кӀвах хъия. Идалди куьне абуруз Аллагьди чпиз жаза гудайди къалурда. 15За квез рикӀивай лугьузва: Къияматдин юкъуз гьа шегьердиз Садумдилайни Гамурдилай пис жеда.

Геле къекъуьникай

(Марк 13:9-13; ЛукӀа 21:12-17)

16За ракъурнавай куьн жанавуррин арада хипер хьиз жеда: гъуьлягъар хьиз акьул авайбур, лифер хьиз дугърибур хьухь. 17Инсанрикай мукъаят хьухь: абуру куьн дувандин гъиле твада ва чпин синагуграни куьн гатада, 18Ахпа Зун себеб яз куьн, Зи илчияр, гьакимринни пачагьрин патав тухуда. Куьне абурун ва халкьарин вилик Зи илчияр я лугьуз шагьидвалда. 19Куьн дувандиз гъайила, вуч ва гьикӀ лугьудатӀа лугьуз къайгъудик жемир, куьне лагьана кӀанзавай гафар квел гьасятда агакьда. 20Куьн ваъ, куь мецелай куь Бубадин Руьгь рахада.

21Стхади стха ам кьин патал маса гуда, бубади – велед; веледарни диде-бубайриз акси экъечӀда ва абур рекьида. 22Зи тилмизар хьуниз килигна, куьн виридаз такӀан жеда; эхирдал кьван эхайди хилас жеда.

23Са шегьерда куьн хурук кутаз хьайитӀа, маса шегьердиз кат. За квез рикӀивай лугьузва: куьн Исраилдин шегьеррилай элкъвена агакьдалди Инсандин Хва атана акъатда. 24Тилмиз вичин муаллимдилай артух туширвал, нуькерни вичин иесидилай артух туш. 25Вичин муаллим хьтинди хьайи тилмиз и кардал рази хьун лазим я. Вичин агъа хьтинди хьайи вач-хъша и кардал рази хьун лазим я. Хизандин кьилевайдал Багьал-Зевул лагьай тӀвар акьалтнаватӀа, ништа, адан кӀвалинбуруз вуч лугьузватӀа!

Исади кьве чин хьунухь айибун

(ЛукӀа 12:2-9)

26Квез душманрихъай кичӀе жемир, ашкара тежедай гьич са затӀни ва малум тежедай чинебан гьич са карни авайди туш. 27За квез буьркьвеба вуч лугьузватӀа, куьне ам эквеба лагь, За куь япал вуч лагьанатӀа, гьадакай кӀвалин чӀередилай хабар це. 28Беден яна рекьизвайбурухъай кичӀе жемир, абурувай руьгь рекьиз жедач. Гзафни гзаф чанни беден жегьеннемдин цӀа санал тергдай къуват Авайдахъай кичӀе хьухь. 29Са къара пулунихъ кьве нуькӀ къачуз жедачни мегер? Амма гьикьван абур гъвечӀи ятӀани, абурукай садни куь Бубадин ихтияр авачиз чилел аватдач. 30Куь кьилелни гьикьван чӀарар алатӀа гьисабнава. 31КичӀе жемир: гзаф нуькӀерилай куьн артух я.

32Гьар ни инсанрин вилик Зун ихтибардалди кьабулзаватӀа, Зани цавараллай Зи Бубадин вилик ам гьакӀ кьабулда. 33Инсанрин вилик ни Закай кьил къакъудайтӀа, Зани цавараллай Зи Бубадин вилик а касдикай кьил къакъудда.

Иса себеб яз чаравилер хьун

(ЛукӀа 12:51-53; 14:26-27; 17:33)

34Куьне фикирмир хьи, Зун и дуьньядиз ислягьвал гваз атанва; Зун ислягьвал ваъ, тур гваз атанва. 35Зун хва вичин бубадихъ галаз, руш вичин дидедихъ галаз, свас вичин къаридихъ галаз чара авун патал атанва. 36Инсандиз вичин кӀвалевайбурукай душманар хкатда.

37Низ вичин дидени буба Залай гзаф кӀандатӀа, ам Заз лайих туш; низ вичин хвани руш Залай гзаф кӀандатӀа, ам Заз лайих туш. 38Вуж вичин хаш кӀулаз яна, Захъ галаз къвезвачтӀа, ам Заз лайих туш. 39Вичин чан хуьз алахъдайдавай ам къакъатда; Зун патал вичин чан гайида ам хуьда.

Савкьват

(Марк 9:41; ЛукӀа 10:16; Ягь. 13:20)

40Куьн кьабулзавайда Зун кьабулзава, Зун кьабулзавайда Зун Ракъурайди кьабулзава. 41Ни пайгъамбар ам пайгъамбар я лагьана кьабулзаватӀа, адав пайгъамбардив агакьдай хьтин суваб агакьда; ни гьахъ-михьи кас хъсан кас я лагьана кьабулзаватӀа, адав гьа гьахъ-михьи касдив агакьай хьтин суваб агакьда. 42Ни са сукӀрада авай къайи яд зи лап гъвечӀи са тилмиздиз, ам Зи тилмиз я лагьана гайитӀа, За квез рикӀивай лугьузва, гьадавни вичин савкьват агакьда.

Currently Selected:

МатӀай 10: ЛезПК

Highlight

Copy