Юнус 3
3
Мураддив агакъарай вяз
1Юнус пайгъамбардив кьвед лагьай гьилера Реббидин гаф агакъна: 2«Къарагъ, чӀехи Ниневия шегьердиз алад, За вуч ваз буйругъ авунатӀа, гьам ана лагь». 3Юнус къарагъна, Реббидин къалурвайвал, Ниневия шегьердиз фена; Аллагьдин вилерай чӀехиди тир гьисабзавай Ниневия шегьер кӀвачелай авун патал пуд югъ герек тир. 4Юнус шегьерда къекъвез хьана, са йикъан мензил атӀана ва икӀ лугьуз вязер авуна: «ЯхцӀур югъ ама – ахпа Ниневия чкӀида!» 5Ниневиявияр Аллагьдихъ инанмиш хьана: абуру сив хуьз хьана ва чӀехидалай гъвечӀидалди вирида шихин парталар алукӀна. 6И хабар Ниневиядин пачагьдивни агакьна, ада, вичин тахтунилай къарагъна, пачагьвилин парталар хтӀунна, ших алукӀна ва руьхъведал ацукьна, 7пачагьдинни везиррин тӀварцӀелай Ниневиядиз икӀ лугьун буйругъна: «Я инсанри, я кӀвалин гьайванри, я малари, я лапагри затӀни тӀуьн тавурай, чуьлдиз фин тавурай, ядни тахъурай. 8Инсанарни кӀвалин гьайванар ших алаз хьурай ва абуру Аллагьдиз кӀевиз шазда ийиз хьурай; гьар сад вичин чӀуру рекьелай элячӀрай ва чпин гъилералди ийизвай гужарикай къерех хьурай. 9Низ чида кьван, белки, Аллагьдин рикӀ регьимлу жен, Ада чалай Вичин къати хъел алудин ва чун телеф тежен». 10Аллагьдиз абурун крар, абур чӀуру рекьелай элячӀнавайди акуна, Аллагьди Вичи абуруз мусибат ийида лугьунай гьайиф чӀугуна, абурал а мусибат ракъурнач.
Currently Selected:
Юнус 3: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2018, 2023