Якьуб 3

Мецикай

1Зи стхаяр-вахар, вири муаллимар жез алахъмир! Вучиз лагьайтӀа, чак, муаллимрик, кӀевелай тахсирар кутаз жедайди квез чизва. 2Чна лагьайтӀа, вирида гзаф крара гунагьар ийизва. Ни рахунра гунагьар ийизвачтӀа, ам тамамвилив агакьнавай, вичин бедендални кьенерар вегьиз алакьдай кас я.

3Шив муьтӀуьгъарун патал адан сиве залпанд туналди, чна адан вири беден идара ийизва. 4Ва я мисал яз гимияр къачун: гьикьван абур чӀехибур хьайитӀани ва гьихьтин къати гар аваз хьайитӀани, абур гъвечӀи элкъуьрагди гими гьалзавайдаз кӀани патахъ тухузва. 5Мезни гьакӀ я: ам гъвечӀи алат я, амма ам дамахар гваз чӀехи гафар рахада. Килиг – тамук акатнавай чӀехи цӀай бицӀи цӀелхемдилай гатӀунзавайди я. 6Мезни гьа цӀай хьиз я, чи бедендин алатрин арада ам виче нагьахъвили уьмуьр тухузвай чка я. Ада, вичи жегьеннемдикай цӀай кьунваз, уьмуьрдин вири еришдикни цӀай кутазва ва вири беден чиркинарзава.

7Ничхиррин, къушарин, чурчулрин ва гьуьлуьн гьайванрин вири жуьреяр муьтӀуьгъариз жеда, абур инсанди муьтӀуьгъарнава, 8амма мез садавайни табий ийиз жедач. Ам залпанд алачир, ажал гъидай агъудив ацӀанвай писвал я.

9Мецелди чна Реббидиз, чи Бубадиз, шукурар ийизва ва гьа мецелди чна Аллагьдиз ухшарвал аваз халкьнавай инсанриз лянет ийизва. 10Гьа са сивяй тарифни къаргъиш акъатзава! Зи стхаяр-вахар, икӀ хьана кӀандач. 11Гьа са чешмедай михьи ва уькӀуь яд авахьун мумкин яни мегер? 12Зи стхаяр-вахар, инжилдин тарцел – зейтунар ва я ципицӀ чӀередал инжилар экъечӀдани мегер? Гьа саягъда уькӀуь булахдай шит ядни авахьун мумкин туш.

Камалдин кьве жуьре

13Куь арада камал ва акьул авайди вуж я? Къуй ада вичихъ камалди гузвай муьтӀуьгъвал авайди лайих уьмуьрдалди къалуррай. 14Амма куьне рикӀе туькьуьл пехилвални жуван хийир кӀан хьунин эрзиманар хуьзватӀа, жуван тарифариз дамахармир ва гьакъикъатдин аксина таб ийимир. 15Ихьтин «камал» цаварилай къвезвайди туш, ам чилинди, инсандиз хасди, иблисдилай къвезвайди я. 16Инсанар пехилвили ва жуван хийир кӀан хьунин эрзиманри идара ийизвай чкада къайда тахьун ва гьар жуьредин чӀуру крар ава.

17Амма цаварилай къвезвай камал эвелни-эвел михьиди, ахпани ислягьвал кӀаниди, хъуьтуьлди, чӀалал къведайди, регьимдив ва къени майвайрив ацӀанвайди, нагьахъдиз садан падни такьазвайди ва кьве чин алачирди я. 18Ислягьвал арадал гъизвайбуру ислягьвилелди гьахъ-михьивилин майваяр гузвай тумар цазва.

Currently Selected:

Якьуб 3: ЛезПК

Highlight

Copy