Хьунухь 46

Якьуб Мисридиз фин

1Исраил, вичин вири мал-девлет кӀватӀ хъувуна, рекьиз экъечӀна. Беэр-Шебадиз атайла, ада вичин буба Исакьан Аллагьдиз къурбанд авуна – 2ва йифиз Аллагьди ахварай адаз эверна: «Якьуб! Якьуб!» «Гьай», – жаваб гана Исраила.

3Аллагьди лагьана: «Зун Аллагь я, ви бубадин Аллагь я. Мисридиз физ кичӀе жемир, Мисридиз алад: ана за вакай чӀехи са халкь арадал гъида. 4Зун Вични квехъ галаз Мисридиз къведа, ва За куьн анай хкинни хъийида. Юсуфа вичин гъилелди ви вилер акьалда». 5Якьубани Беэр-Шеба туна, рехъ давамарна.

Чпив фиръаванди вуганвай дапурагра аваз Исраилан рухвайри Якьуб, чпин аялар ва папар тухузвай; 6чпин нехирар абуру вилик кутуна гьалзавай ва Къенанда гъилиз гъайи мал-девлетни къахчунвай. Гьа икӀ Якьуб вичин вири эвледарни галаз Мисридиз куьч хьана: 7рухваяр, рушар, хтулар – вичин вири тухум ада Мисридиз хкана.

Якьубан хизандин сиягь

8Ингье Мисридиз куьч хьайи Исраилан несилрин тӀварар:

Якьуб ва адан эвледар.

Якьубан сифте хва – Рувен. 9Рувенан рухваяр: Гьенух, Палу, Гьецран ва Карми.

10Шимунан рухваяр: Ямуил, Ямин, Агьад, Яхин, Цагьар ва къенанви папа хайи хва Шаул.

11Левидин рухваяр: Гершан, Къегьат ва Мерари.

12 Ягьудан рухваяр: Эр, Анан, Шелагь, ПерецӀ ва Зерагь. Эрни Анан гьеле Къенанда амаз кьенай, Пересаз лагьайтӀа кьве хва – Гьецранни Гьамул – хьанай.

13Исахаран рухваяр: Тала, Пува, Яв ва Шимран.

14Забулунан рухваяр: Серед, Элан ва Ягьлеил.

15Ибур Якьубаз, адан руш Динани хьиз, Лияди Падан-Арамда хайи несилар я. Рухваярни рушар вири кваз – къанни цӀипуд кас.

16Гадан рухваяр: Сифян, Гьаги, Шуни, Эсбан, Эри, Аради, Арели.

17Ашеран рухваяр: Йимнагь, Ишва, Ишви ва Берия. Абурун вах – Серагь. Бериядин рухваяр: Гьебер ва Малкиял.

18Ибур Якьубаз Лабана вичин руш Лиядиз къаравуш яз гайи Зилпади хайи несилар я, – цӀуругуд кас.

19Якьубаз Рахилакай хьайи рухваяр:

Юсуф ва Бунъямин.

20Мисрида Андин ибадатханада диндин къуллугъдар ПатӀи-Фарадин руш Асената Юсуфаз кьве хва хана: Манаше ва Ифраим.

21Бунъяминан рухваяр: Бела, Бехер, Ашбел, Герай, Наъман, Эхи, Раш, Мупим, Гьупим ва Ард.

22Ибур Якьубаз Рахилакай хьайи несилар я – цӀукьуд кас.

23Данан хва: Гьушим.

24Нифталидин рухваяр: Ягьциял, Гуни, Яцер ва Шилем.

25Ибур Якьубаз Лабана вичин руш Рахилаз къаравуш яз гайи Билгьадикай хьайи несилар я – ирид кас.

26Якьубахъ галаз Мисридиз атайбурун умуми кьадар, адан рухвайрин сусар квачиз, – пудкъанни ругуд кас.

Якьубан хизан Мисридиз атун

27Юсуфаз Мисрида идалай вилик кьве аял авай. Мисридиз куьч хьайи Якьубан тухумдин кьадар вири санлай пудкъанни цӀуд касдикай ибарат тир.

28 Ягьуд и вахтунда Якьуба вилик, Юсуфан кьилив, Юсуфа Гешенда абурун кӀвенкӀвел экъечӀун патал, ракъурнавай.

Абур Гешендив агакьна. 29Юсуфа вичин дапурагдик балкӀанар кутӀуниз туна ва вичин буба Исраилан вилик экъечӀун патал Гешендиз рекье гьатна. Ам бубадин вилик экъечӀна, адан гардан кьуна ва адан къужахда яргъалди шехьна. 30«Гила, заз вун сагъ яз акурдалай кьулухъ, зун кьейитӀани жеда», – лагьана Исраила.

31-32Юсуфа вичин стхайриз ва вири сихилдиз лагьана: «Зун фиръавандиз Къенандай зи патав стхаяр ва вири зи сихил атанвайди, абур чубанар тирди, лапагар хуьзвайди, чпихъ галаз лапагар ва къарамалар хканвайди ва мад мал-девлет гвайди лугьуз физва.

33Куьне лагьайтӀа, фиръаванди квез эверна ва куьн квел машгъул я лагьана хабар кьурла, 34икӀ жаваб це: „Фиръаван, вун сагърай. Чун аял чӀавалай, чи бубаяр хьиз, чубанар я“. И чӀавуз куьн Гешен чилел тада, вучиз лагьайтӀа хипер хуьзвай вирибур мисривийри мурдар хьанвайбур яз гьизабзавайди я».

Currently Selected:

Хьунухь 46: ЛезПК

Highlight

Copy