ЭхкъечӀун 3

Мусадиз эверун

1Мусади вичин апаян, Мидияндин диндин къуллугъдар ЙитӀрадин, хпер хуьзвай. Са гъилера ам вичин суьруьни галаз кьурумдин лап яргъаз фена ва Аллагьдин дагъдив, Харебдив агакьна. 2Ана Реббидин Малаик адан вилик пайда хьана – валан къене кузвай ялав яз.

Мусадиз акуна: вал ялавди кьунва, амма кузвач. 3«Фена садра, – фикирна ада, – им вуч зурба аламат ятӀа килигин кван. Вучиз вал кузвач?»

4Реббидиз Муса килигун патал мукьва хьанвайди акуна – ва Аллагьди цӀай кьуна кузвай валай Мусадиз эверна: «Муса, я Муса!» «Гьай!» – жаваб гана ада. 5Реббиди лагьана: «Мукьув жемир. Жуван кӀвачин къапар хтӀуна: вун акъвазнавай чка пак чил я».

6«Зун ви бубайрин Аллагь я, – лагьана Ада Мусадиз. – Зун Ибрагьиман Аллагь я, Исакьан Аллагь я, Якьубан Аллагь я». Мусади чин кӀевна: адаз Аллагьдиз килигиз кичӀезвай.

7Реббиди лагьана: «Зи халкьдиз Мисрида инсаф тийизвайдакай Заз хабар ава. Заз абурун шел-хвалдин ван къвезва – кьилеллайбуру адаз зулумар ийизва! Заз Зи халкьди чӀугвазвай азабдикай хабар я. 8Зун, ам лукӀвиликай азад авун патал, атанва, ам Мисридай иер ва гегьенш, вичикай некни вирт хкатзавай чилел хутахун патал – къенанвийрин, хетийрин, амарийрин, перизийрин, гьивийрин ва ябусвийрин чилерал, – эвичӀнава. 9Исраилдин рухвайрин арзаяр Зав агакьнава. Ва гьакӀни, Заз мисривийри абуруз ийизвай зулум акуна. 10Гьавиляй алад, За вун фиръавандин кьилив ракъурзава: зи халкь, Исраилдин рухваяр, Мисридай акъуд!»

11«Зун вуж я хьи, – лагьана Мусади, – фиръавандин кьилив фена, Исраилдин рухваяр Мисридай ахкъуддайвал?»

12«Зун вахъ галаз я, имни вун Зи илчи тирвилин лишан жеда, – жаваб гана Реббиди. – Вуна Зи халкь Мисридай ахкъуддай чӀавуз, куьне и дагъдал атана Заз къуллугъда».

13Мусади жузуна: «Ингье зун Исраилдин рухвайрин кьилив фида ва абуруз лугьуда: „Зун куь кьилив куь бубайрин Аллагьди ракъурнавайди я“. Амма абуру: „Адан тӀвар вуж я?“ – лагьана хабар кьуртӀа, за вуч жаваб гун лазим я?» 14«Зун Я, Вуж Зун ЯтӀа, – жаваб гана Аллагьди. – Исраилдин рухвайриз гьа икӀ жаваб це: „Зун куь кьилив ракъурнавайдан тӀвар ‹Зун Ава› я“».

15Ва мадни Аллагьди Мусадиз лагьана: «Исраилдин рухвайриз лагь хьи, вун ракъурайди Ребби я, чпин бубайрин – Ибрагьиман, Исакьан ва Якьубан Аллагь. Им – даим Зи тӀвар я: несилрилай несилралди заз гьа икӀ эверрай.

16-17Гьавиляй алад фена Исраилдин агъсакъалар эвер гана кӀватӀа ва абуруз лагь: „Реббиди, куь бубайрин Аллагьди, Ибрагьиман, Исакьан ва Якьубан Аллагьди, зи вилик атана ва квез икӀ лугьун патал эмир авунвайди: ‹За куьн галайвал вил вегьена ва мисривийри квез вуч ийизватӀа акуна. Зани кьетӀна: За куьн Мисридин зулумдикай къенанвийрин, хетийрин, амарийрин, перизийрин, гьивийрин, ябусвийрин чилел – вичикай некни вирт хкатзавай чилел хутахда›“ лагьана абуруз малумара.

18Исраилдин агъсакъалар ви чӀалаз килигда. Абур вахъ галаз санал Мисридин пачагьдин кьилив фида, ва куьне адаз икӀ лугьуда: „Чи вилик Ребби, Исраилдин Аллагь атана. Чаз кьурумдиз фена пуд йикъан рехъ атӀана ва ана Реббидиз, чи Аллагьдиз, къурбанд ийидай ихтияр це“.

19Заз чида хьи, Мисридин пачагьди квез ихтияр гудач, куьн Зи къудратдизни килиг тавуна гужуналди кьуна акъвазариз алахъда. 20Амма За Жува, Жуван гъилелди Мисри кукӀварда. За аламатар къалурда – ва ахпа ада куьн ахъайда. 21За мисривийрин вилерай квез майилвал жедайвал туькӀуьрда, – ва куьн Мисридай гъил ичӀидаказ хъфидач. 22Куь папари чпин къуншияр тир мисриви папаривай къизилдинни гимишдин шейэр ва алукӀдай парталар тӀалабрай. Куьне гьатта куь аялрални чӀагана алукӀда! Куьн Мисридай гъиле гьатай гзаф девлет гваз хъфида».

Currently Selected:

ЭхкъечӀун 3: ЛезПК

Highlight

Copy