ЭхкъечӀун 26

Гьалтунин Алачух

(ЭхкъечӀун 36:8-38)

1Реббиди давамарна: «Алачух патал кьелечӀ кушдикай, вили, мичӀи яру ва икьи яру рангарин гъаларикай цӀуд кетен хурух; абурал устадвилелди херупӀрин шикилар акъудна кӀанда. 2Гьар са кетендин яргъивал – къанни муьжуьд кьуьнт, гьяркьуьвал – кьуд кьуьнт; абурун виридан кьадар сад хьтинди хьана кӀанда. 3Вад кетен сад садак кукӀурна, са кӀус хьиз жеда. Маса вадни санал цуз. 4Са кӀусунин къерехда авай кетен тирвал вили рангунин кваквар ая, ва гьа ихьтин кваквар – муькуь кӀусунин къерехда авай кетендални. 5Са кӀусунин къерехда авай кетен тирвал яхцӀурни цӀуд кваг хьун лазим я – ва яхцӀурни цӀуд муькуь кӀусунин къерехда авай кетендал, кваг квакун къаншарда. 6Къизилдин яхцӀурни цӀуд кӀир гьазура ва кьве кӀусни сад садахъ галаз галкӀурна битав алачух арадал гъваш.

7ЦӀегьрен сарикай цӀусад кетен хурух – Алачухдин винел къат. 8Гьар са кетендин яргъивал – къанни цӀуд кьуьнт, гьяркьуьвал – кьуд кьуьнт; вири цӀусадни са кьадардинбур. 9Абурукай вад санал цвана галкӀура ва амай ругудни санал – ругуд лагьайди кьве кьат ая – ам гьахьдай чкадин винелай чӀере жеда. 10Са кӀусунин къерехдин кетен тирвал яхцӀурни цӀуд гьалкъа ая, ва яхцӀурни цӀуд гьалкъани – муькуь кӀусунин къерехдин кетен тирвал. 11Буьруьнждин яхцӀурни цӀуд кӀир ая, сад тир къат арадал къведайвал, абур гьалкъайрай туна, кьве кӀусни галкӀура. 12Винел къатуникай яргъивилиз артух яз амукьзавайдан са пай Алачухдин кьулухъ цлал фена кӀанда, 13кетенрин яргъивилин артухан пай лагьайтӀа, са кьуьнт са патахъай, са кьуьнтни муькуь патахъай, абур кьиляй кьилди кӀевдайвал – Алачухдин къвалан цлариз. 14Винелай гьерерин табагъ хамарикай са къат чӀугу, адан винелайни – гьуьлуьн кицӀин хъицикьрин къат.

15Алачух патал акӀаждин кӀарасдикай кьулар гьазура: 16гьар са кьулун яргъивал – цӀуд кьуьнт, гьяркьуьвални садни зур кьуьнт, 17гьар сад – сад садахъ галкӀурнавай кьве чукьвандикай. Алачухдин вири кьулар гьа ихьтинбур хьунухь лазим я.

18Алачухдин кьибле патан цал патал къад кьул раса 19– абурун кӀаник кутадай гимишдин яхцӀур пун – гьар са кьулунин кӀаник кьве пун, адан кьве чукьван патал. 20Гьа и тегьерда кьвед лагьай, кефер патан цал патални къад кьул 21ва гимишдин яхцӀур пун раса – гьар садан кӀаник кьве пун жедайвал. 22Алачухдин кьулухъ, рагъакӀидай патан цал патал ругуд кьул гьазура, 23кьулухъ патан пипӀер патал мадни кьве кьул, 24пипӀерин и кьулар кӀаникай кьве хиленбур яз, винелай са гьалкъадалди галкӀурай. Ихьтин кьулар кьвед хьун лазим я – гьар са пипӀе сад. 25И муьжуьд кьулуниз гимишдин цӀуругуд пун герек я, гьар са кьулунин кӀаник кьве пун жедайвал.

26АкӀаждин кӀарасдикай турвакьарни гьазура: вад – Алачухдин са патан цал тирвал къвезвай кьулар галкӀурун патал, 27вад – Алачухдин кьвед лагьай цал тирвал къвезвай кьулар галкӀурун патал ва вадни – адан кьулухъ, рагъакӀидай патан цал патал.

28Юкьван турвакьди кьакьанвал кьве чка пай жезвай чкадал цлан са патахъай муькуь патахъ кьван къвезвай кьулар галкӀурун лазим я. 29Кьулар къизилдалди кӀев ая, турвакьар кукӀурун патал абурук къизилдин гьалкъаяр кутур ва турвакьарни къизилдалди кӀев ая.

30Алачух ваз дагъдал къалурай къайдада хкажа.

31Вили, мичӀи яру ва икьи яру гъаларикай ва кьелечӀ кушдикай перде хурух; адал херупӀрин шикилар храна кӀанда. 32Ам акӀаждикай авунвай, къизилдал кӀевнавай, къизилдин къармахар квай кьуд гулуникай куьрсара. И цлар патал гимишдин кьуд пун герек жеда. 33Перде кӀирерикай куьрса. Адан кьулухъ Икьрардин сандух эциг. И пердеди пак тир чка Паквилерин Пак чкадикай чара ийида. 34Паквилерин Пак чкада авай Икьрардин сандухдин винел „Гунагьар алудзавай чка“ лугьудай къапсах эциг. 35Пердедин вилик экӀягъан эциг, адан къаншардани – чирагъган. Чирагъган Алачухдин кьибле патан цлав, экӀягъанни – кефер патан цлав акъвазарун лазим я.

36Вили, мичӀи яру ва икьи яру рангунин гъаларикай ва кьелечӀ кушдикай вичи Алачухдиз гьахьдай чка кӀев авун лазим тир гьар жуьредин рангарин перде хурух. 37Перде патал акӀаждин кӀарасдикай къизилдалди кӀевнавай, къизилдин кӀирер квай вад гул гьазура. Гулар патал буьруьнждикай вад пун цӀурурна кӀалубда цана раса».

Currently Selected:

ЭхкъечӀун 26: ЛезПК

Highlight

Copy