Крар 24

Павелак кутазвай тахсир

1Вад югъ алатайла, кьилин хахам Гьанани Кесардиз атана. Абуру Павелак гьихьтин тахсир кутунватӀа сердердиз къалурна. Адахъ са бязи агъсакъалар ва дувандал рахун патал хкянавай Тертуьл лугьудай са кас галай. 2-3Павел дуванханадиз гъайила, анал Тертуьл Павелак кутазвай тахсирдикай рахана:

– Жанаби Феликс! Вун себеб яз чи уьлкведа ислягьвал ава. Вуна, камал гваз халкьдин гьакимвал авуналди, адан уьмуьр хъсанарзава. Вири и дегишвилер чна кьабулзава ва уьлкведин вири пипӀера халкьди ваз рикӀин сидкьидай сагърай лугьузва. 4Вавай вахт къакъуд тавун патал, за куьрелди лугьуда. За вавай регьимдалди яб гун тӀалабзава.

5Чаз и инсан халкьдик гъулгъула кутазвайди яз чида. Ада вири дуьньяда, вири Ягьудатда къал твазва, ва ам назаретвийрин кӀватӀал тӀвар алайбурун кьил я. 6-8Ам гьатта чи Аллагьдин КӀвал чиркин ийизни алахънай. Гьа чӀавуз чна ам кьунни авунай. Вуна адавай силис кьурла, чна адак тахсирар кутун дуьз кар тирдахъ вунни чӀалахъ жеда.

9 Чувудри Тертуьлан пад кьуна Павелак кутазвай тахсирар гьахъбур я лагьана.

Феликсан вилик авур рахунар

10Сердерди Павелаз рахадай ихтияр гайила, ада лагьана:

– Вун и уьлкведа халкьдин дуванбег яз са шумуд йис тирди заз хабар ава, гьакӀ хьайила ви вилик жув хуьн патал рахадай мумкинвал хьунал зун шад я. 11Зун ибадат авун патал Ярусалимдиз атана цӀикьвед йикъалай гзаф туширди вавай регьятдиз чириз жеда. 12Зак тахсирар кутазвайбуруз за Аллагьдин КӀвале, синагугра ва шегьерда са нихъ галаз ятӀани гьуьжетар ийиз ва я халкьдин арада гъулгъула тваз акунач. 13Исятда зак кутазвай тахсирар абурувай са куьналдини субутариз жедач. 14ЯтӀани, за чи бубайрин Аллагьдиз, Адан рекьел алайда хьиз ибадат ийизвайди хиве кьазва. Чувудри, лагьайтӀа, за кьунвай рехъ чӀуру чирвал яз гьисабзава. Къанунда лугьузвайдахъ ва пайгъамбарри кхьенвайдахъ зун чӀалахъ я. 15Абурухъ кьейи гьахъ-михьи тирбурални туширбурал Аллагьди чан хкунин умуд авайвал, захъни гьахьтин умуд ава. 16Гьавиляй зун Аллагьдинни инсанрин вилик датӀана жуван намус михьи яз хуьн патал алахънава.

17Зун инра авачиз са шумуд йис алатна. Гила жуван халкьдикай тир кесибриз куьмек гун патал ва Аллагьдин КӀвале къурбандар авун патал Ярусалимдиз хтанва. 18И ксар атана зал гьалтайла, за вири и кӀвалахар кьиле тухванвай ва Къанундив кьадай михьивилерни авунвай. А чӀавуз зи гуьгъуьна халкь авайди тушир, я къал акъуддайбурни авачир. 19Зак тахсирар кутаз кӀанзавай са бязи чувудар зал гьалтна. Абур Асия вилаятдай я. Ингье, исятда абур инал ви вилик квайтӀа ва чпи зак кутазвай тахсирар лагьанайтӀа, хъсан тир! 20Я тахьайтӀа, къуй инал алайбуру Меслягьатдиз закай вуч тахсир жагъанатӀа, гьадакай лугьурай. 21Абурувай зак кутаз жедай тахсир – «Кьейибурал чан хтунихъ за иман авуниз килигна, куьне къе зи дуван ийизва» гафар абурун вилик лугьун я.

22Феликсаз Реббидин рекьел алайбуру хьиз ибадат авун вуч затӀ ятӀа хъсандиз чизвай. Ада ийизвай дуван акъвазарна.

– Ви кардай къарар кьушундин кьилевай Луьси иниз атайла, за акъудда, – лагьана ада.

23Ада эфсердиз Павелелай вил алуд тавун, гьа са вахтунда адаз вич вичин ихтиярда жедай мумкинвални гун эмирна ва Павелан дустарини адан къайгъу чӀугвадайвал абурун вилик пад кьамир лагьана.

24Са шумуд югъ алатайла, Феликс вичин чувуд паб Дурзилани галаз атана. Ада Павел гъун эмирна. Феликсаз Иса Месигьдихъ иман авун вуч затӀ ятӀа чириз кӀанзавай. 25Павела гьахъ-михьивиликай, сабур хьуникай ва Къияматдин йикъакай лагьайла, Феликсаз кичӀе хьана.

– Къе авур ихтилатар бес я! – лагьана ада Павелаз. – Ахлад, маса гъилера заз вахт хьайила, за ваз мад эвер хъийида.

26Гьа са чӀавуз адан вил Павела вичиз ришвет гунални алай, гьакӀ хьайила ада, ам мукьвал-мукьвал вичин патав гъиз таз, адахъ галаз ихтилатар ийидай.

27Кьве йис алатна, Феликсан къуллугъдин чкадални ПуркӀас ФестӀ хьана, амма Феликса чувудар рази авун патал Павел къазаматда туна.

Currently Selected:

Крар 24: ЛезПК

Highlight

Copy