Крар 23

Меслягьатдин вилик

1КӀватӀ хьанвайбуруз вил яна, Павела лагьана:

– Стхаяр, къенин йикъал къведалди за Аллагьдин вилик виждан михьи яз жуван уьмуьр тухвана.

2Инал Павелан патав акъвазнавайбуруз кьилин хахам Гьананиди адан сив кутуна ягъун эмирна. 3Павела адаз лагьана:

– Аллагьди вунни яда, лацу чепедай асуннавай цал! Вун инал Къанундин бинедаллаз зи дуван авун патал ацукьнавайди я, амма вуна зун ягъ лугьуналди Къанун чӀурзава.

4Павелан патав акъвазнавайбуру лагьана:

– Аллагьдин кьилин хахамдин хатурдик вуна вуч лагьана хкуьрзава?

5– Стхаяр, заз ам кьилин хахам тирди чизвачир, – жаваб гана Павела. – Каламдани кхьенва эхир: «Ви халкьдин кьиле авайдакай чӀурукӀа рахамир»#ЭхкъечӀун 22:28..

6КӀватӀ хьанвайбурукай садбур сакъаяр, муькуьбурни фарисеяр тирди Павелаз чизвай, гьакӀ хьайила ада ван алаз Меслягьатдин векилриз лагьана:

– Стхаяр, зун фарисейдин хва фарисей я, зи дуванни кьейибурал чан хтуник умуд ква лугьуз ийизва.

7Ада икӀ лугьунни кумаз, фарисейринни сакъайрин арада гьуьжет гьатна. Меслягьат кьве патал пай хьана, 8вучиз лагьайтӀа, сакъайри мейитрал чан хтунар, малаикар, жинерар кваз кьазвачир. Амма фарисейри абур авай крар я лугьузвай. 9ЧӀехи гьарай-эвер акъатна. Фарисейрин патай тавратдаррикай са бязибур къарагъна хци гьуьжетар ийиз эгечӀна:

– И касдай чаз са пис карни аквазвач. Низ чида кьван, адахъ галаз Руьгь ва я малаик рахазвачтӀа?

10Гьуьжет акьван къати хьана хьи, кьушундин кьилевайдаз абуру Павел кӀус-кӀус ийиз кичӀе хьана. Гьавиляй ада аскерриз аниз фена, ам ккӀизвайбурун юкьвай акъудна, къеледиз хутах лагьана эмир гана.

11Гуьгъуьнин йифиз Павелан патав акъвазна Реббиди лагьана:

– ВикӀегь хьухь! Ярусалимда вуна Закай шагьидвал гьикӀ авунатӀа, Римдани вуна гьакӀ шагьидвал авун герек я.

Павелаз акси чӀуру къаст

12 Пакагьан экуьнахъ са бязи чувудар чӀуру къаст авун патал кӀватӀ хьана. Павел яна текьенмаз гьич са затӀни я ненни ийидач, я хъванни лагьана абуру кьин кьуна. 13Павелаз чӀуру къаст ийиз кӀанзавайбур яхцӀур касдилайни гзаф авай. 14ЧӀехи хахамринни агъсакъалрин патав фена, абуру лагьана:

– Чна, Павел яна кьин тавунмаз, сиве гьич са затӀни твадач лагьана кӀевелай кьин кьунва. 15Гьа икӀ куьне ва Меслягьатди, квез Павелавай галай-галайвал силис кьаз кӀанзава лагьана, кьушундин кьилевайдав ам иниз гъиз тур. Чун гьазур хьана акъвазда. Ам аниз агакьунни кумаз, чна ам яна рекьида.

16И чӀуру къастуникай Павелан вахан хциз хабар хьана. Адани къеледиз фена Павелаз хабар гана. 17Павелани эфсеррикай садаз эверна лагьана:

– И гада кьушундин кьилевайдан патав твах, и касдиз адахъ галаз ийидай ихтилатар ава.

18Эфсерди гада тухвана кьушундин кьилевайдаз лагьана:

– Къазаматнавай Павела заз эверна, и гада ви патав твах лагьана заз минетна. Адахъ ваз ийидай ихтилат ава.

19Кьушундин кьилевайда гададин гъил кьуна са патахъ тухвана. Адахъ галаз кьилди амукьайла, адавай хабар кьуна:

– Ваз вуч лугьуз кӀанзава?

20– Чувудри Павел пака Меслягьатдиз гъваш лугьун кьетӀна, – лагьана гадади. – И тӀалабун абуру гуя Павелавай галай-галайвал силис кьун патал ийизвайди я. 21Амма вун абурун чӀалахъ жемир, яхцӀур касдилайни гзафбуру ам чинеба вилив хуьда. Абуру ам текьенмаз чпи я недач, я хъвадач лугьуз кьин кьунва. Вун рази жеда лугьуз, абур гьазур хьана акъвазнава.

22Кьушундин кьилевайда гада ахъайна ва адаз эмирна:

– Вуна заз и агьвалатдикай ихтилатайди гьич садазни лугьумир.

Павел Кесардиз ракъурун

23Кьушундин кьилевайда вичин эфсеррикай кьведаз эверна эмир гана:

– Нянин кӀуьдаз кьве виш ях аскер, пудкъанни цӀуд миях#23:23 Миях – шивцел алай инсан. ва кьве виш кас жидаяр гвай аскерар гьазура. Чна Павел Кесардиз тухуда. 24Павелаз улакь гьазура. Килиг гьа, Павел Римдин пачагьдин сердер Феликсан патав сагъ-саламатдиз агакьардайвал ая.

25Ада ихьтин чар кхьена: 26«Луьси Клавдасан патай жанаби сердер Феликсаз саламар. 27И кас чувудри кьунай, абур ам рекьиз гьазур хьанвай. Зун жуван аскерар галаз атана, ам Римдин ватанэгьли тирди чир хьайила, ам хиласна. 28Абуру адак гьихьтин тахсирар кутазватӀа чирун патал за ам абурун Меслягьатдиз тухванай. 29Зун гъавурда гьатайвал, абуру адак кутазвай тахсиркарвал чувудрин Къанундихъ галаз алакъада ава. Заз адакай я рекьидай хьтин, я къазаматда твадай хьтин тахсир жагъанач. 30И касдиз чӀуру къаст авун патал чувудри гаф-чӀал сад авунвайди заз малум хьайила, за ам тадиз ви патав ракъурна. Адак тахсир кутазвайбуруз за чпин делилар гьихьтинбур ятӀа ваз чир ая лагьанва».

31Аскерар, чпиз эмир гайивал, Павелни къачуна йифиз АнтӀипатрисдиз атана. 32Гуьгъуьнин юкъуз ам мияхрихъ галаз Кесардиз ракъурна, абур элкъвена къеледиз хтана. 33Мияхар Кесардиз атана агакьайла, абуру сердердив чар ва Павел вич вахкана. 34Гьакимди чар кӀелна, Павелавай вич гьи вилаятдай я лагьана хабар кьуна. Павел Киликатдай тирди чир хьайила, 35ада лагьана:

– Вак тахсир кутузвайбурни иниз атайтӀа, гьа чӀавуз за ви кардиз яб гуда.

Гьакимди Павел Гьирудан дараматда къаравулар алаз хуьх лагьана эмир гана.

Currently Selected:

Крар 23: ЛезПК

Highlight

Copy