2-Саланиквийриз 1
1
Саламар
1Павелан, Силаван ва ТӀиматӀеян патай – чи Аллагь Бубадиз ва Ребби Иса Месигьдиз талукь яз Саланикда авай иманийрин кӀватӀалдиз.
2Чи Аллагь Бубадин ва Ребби Иса Месигьдин патай берекат ва саламатвал хьурай квез!
Ребби хкведай югъ вилив хуьн
3Чна куьн паталди Аллагьдиз датӀана шукур авун лазим я, стхаяр-вахар, икӀ авун дуьзни я, вучиз лагьайтӀа куь иман мад ва мад гзаф жезва, квехъ садан-садахъ авай муьгьуьббат артух жезва. 4Гьавиляй куь пайгарвиликай ва имандикай чун Аллагьдихъ иман ийизвайбурун кӀватӀалра дамахдивди рахазва. Куьне куь иман куьн хурук кутурла эхай кьван вири дарвилера ва бедбахтвилера къалурна.
5Им Аллагьди гьахъ-михьивал гваз дуван авунин ва Ада ваз Вичин Пачагьлугъда иштиракзавайвиляй вуна азаб чӀугунин шагьадатнама я. 6ГьикӀ лагьайтӀа Аллагь гьахъ-михьи я, квез азабар ийизвайбуруз Ада азабралди жаваб гуда, 7-8амма ахьтин азабар эхай квез чахъ галаз санал Ада секинвал гуда. Аллагь кваз такьур ва чи Ребби Иса Месигьдин Шад Хабар яб тагана амукьай вирибуруз бала гун патал цаварилай цӀун юкьва вай къудрат авай малаикар галаз Иса Месигь атай чӀавуз гьа икӀ жеда. 9Абуруз даиман жегьеннемдалди жаза гуда: эбеди яз Реббидивай ва Адан сейли къудратдикай яргъаз ийида. 10И кар, Ам Вичиз талукьбурун арада машгьур хьун патал ва вири иманийрин патай гьейранвал къачун патал, Ам атай юкъуз жеда. А юкъуз Адаз шукурар ийидайбурун арада куьнни жеда, вучиз лагьайтӀа куьн чна авур шагьидвилихъ агъуна.
11Гьавиляй чна датӀана куьн паталди дуьаяр ийизва. Чи Аллагьди куьн куь везифадиз лайих авайбур яз гьисабрай. Квез ийиз кӀанзавай гьар са хъсан кӀвалах ва имандин кар кьилиз акъудиз Аллагьдин къуватди куьмек гурай. 12Чи Ребби Исадин ТӀвар куь куьмекдалди машгьур хьун патал ва куьнни Адан куьмекдалди машгьур хьун патал, чна чи Аллагьдин ва Ребби Иса Месигьдин берекатдив кьурвал дуьаяр ийизва.
Currently Selected:
2-Саланиквийриз 1: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024