2-Петру 1
1
1 Иса Месигьдин лукӀ ва илчи Симун-Петрудин патай.
Чи Аллагь ва Хиласкар Иса Месигьдин гьахъ-михьивал себеб яз чавни гвай гьа багьа иман кьабулнавайбуруз.
2Къуй берекатни саламатвал, Аллагь ва чи Ребби Иса кьатӀуналди, артух хьурай квез.
Иманивилин уьмуьрдихъ эвер гун
3Илагьи къуватди чаз уьмуьр ва муъминвал патал лазим тир вири гана, Вичин хсуси баркалладалди ва чаз хъсанвилелди эверай Аллагьдин кьатӀуналди гана. 4Гьа икӀ Ада чаз чӀехи ва къимет авай хиве кьунар авуна, абурун куьмекдалди куьн дуьньядин члаф жедай гьевесрикай катдайвал ва иллагьи тӀулдиз талукьбур жедайвал авуна.
5Гьавиляй куьне жедай кьван вири ая, куь имандал эдеб алава жедайвал ая, эдебдал – чирвал, 6чирвилел – жувавай жув кьаз хьунухь, жува жув кьаз хьунал – сабур, сабурдал – муъминвал, 7муъминвилел – садаз сад кӀан хьун, садаз сад кӀан хьунал муьгьуьббат алава жедайвал ая. 8Квек ихьтин къилихар кватӀа ва абур артух жезватӀа, куьне чи Ребби Иса Месигь кьатӀун хийир авачирди ва бегьер тагудайди яз амукьдач. 9Ник и къилихар квачтӀа, ам буьркьуь я ва адаз яргъавайди хъсан аквазвач, вичин алатай гунагьрикай михьи хьун адан рикӀелай фенва. 10Гьавиляй, стхаяр-вахар, эвернавайбур ва хкянавайбур тирди тестикьарун патал мадни гзаф алахъа. ИкӀ куь кӀвач садрани галкӀидач, 11чи Ребби ва Хиласкар Иса Месигьдин эбеди Пачагьлугъдиз гьахьдай рак квез гегьеншдиз ахъа жеда.
12Квез и кар хъсандиз чизватӀани ва куьне кьабулнавай гьакъикъатда куьн мягькем хьанватӀани, и кар куь рикӀел хкун за садрани акъвазардач. 13Амма зун гьеле и алачухда, яни зи беденда, амай кьван гагьда куь рикӀел хкун за дуьз кар яз гьисабзава. 14И мукьвара зун, заз чи Ребби Иса Месигьди ахъаяйвал, и алачухдай хъфидайди заз чизва. 15Гьавиляй, зун куь арада тамукьдай чӀав атайлани, зун и гьакъикъатар гьи вахтунда хьайитӀани квевай рикӀел хкиз хьунал алахъда.
Иса Месигьдин чӀехи баркалла
16Чи Ребби Иса Месигьдин къуватдикай ва хтуникай лугьудайла, чна кьил акадардай махар ахъайзавачир. Чунни лагьайтӀа, Адан зурбавилин шагьидар хьанай. 17Адаз гьуьрметни баркалла Аллагь Бубади ганай, Аллагьдин ван Ам паталди чӀехи баркалла галаз акъатнай: «Им Зи рикӀ алай Хва я, Им Зи шадвал я». 18Чун Адахъ галаз санал пак дагъда авайла, цаварилай къвезвай и ван чаз хьанай.
19Гила чун пайгъамбарвилелди лагьай гафунихъ генани кӀевелай агъунва. Адаз, югъ алукьдалди ва куь рикӀера экуьнин гъед экъечӀдалди мичӀивиле нур гузвай чирагъдиз хьиз, дикъет гуналди куьне хъсан кар ийизва. 20Виридалайни вилик рикӀел хуьх: Каламда авай пайгъамбарвилин са гафни пайгъамбардин вичин туькӀуьрунрикай хкатзавайди туш, 21вучиз лагьайтӀа пайгъамбарвилин гафар са чӀавузни инсандин къастуналди лагьанвайбур туш, абур Пак Руьгьди юзун кутунвай инсанри Аллагьдин мецелай лугьузвай.
Currently Selected:
2-Петру 1: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
