1-ТӀиматӀеяз 5

1Кьуьзуь итимдиз векъи туьгьметар ийимир, жуван буба вуна гьикӀ чӀалал гъидатӀа, ам гьа саягъда чӀалал гъваш. Жегьил гадайрихъ галаз стха хьиз хьухь. 2Яш хьанвай папарив дидейрив хьиз, жегьил папаривни михьивилелди, вахарив хьиз эгечӀ.

Хендедаяр иманийрин кӀватӀалда

3Гьакъикъатда чпиз куьмекдай са касни авачир хендедайрин къайгъу чӀугу. 4Хендедадихъ аялар ва я хтулар аватӀа, къуй абуру сифте нубатда чпин хизандиз талукь къайгъуяр ийиз ва чпин дидейринни бадейрин бурж вахгуз чир авурай. И кар Аллагьдиз хуш я. 5Ялгъуздаказ амукьнавай халисан хендедади Аллагьдик умуд кутада ва Адаз юкъуз-йифиз тӀалабунар ва дуьаяр ийида. 6Амма хендеда яз амукьай папа вичин кеф патал уьмуьр тухузватӀа, ам чан аламаз кьенвайдай кьуртӀа жеда. 7Са жуьрединни туьгьметар тахьун патал, винидихъ лагьанвай кьван вири крар инсанривай тӀалаб ая. 8Ни вичин мукьва-кьилийрин, сифтени-сифте вичин хизандин къайгъу чӀугвазвачтӀа, ам имандикай къерех хьанва ва ам иман гвачирдалайни пис я.

9Хендедадин пудкъад йис хьанвачтӀа ва я ада гъуьлуьз ийизвай вафа чӀурнатӀа, ам иманийрин кӀватӀалдин къаюмдик кутуна кӀандач. 10Ам хъсан крар авурди: аялриз тербия гайиди, мугьманар хуш хьайиди, Аллагьдиз талукьбурун кӀвачер чуьхвейди, четинвиле авайбуруз куьмекайди, вич гьар жуьре хъсан крариз бахш авурди яз малум хьана кӀанда.

11Жегьил хендедаяр ахьтин сиягьда твамир, вучиз лагьайтӀа абурун чандин гьевес квай мурадар Месигьдиз вафа хуьнилай гзаф гуж авайбур хьайи чӀавуз абуруз мад гъуьлуьз хъфиз кӀан жеда 12ва чпи эвелдай гайи вяд чӀур авуналди абуру чпел айиб гъида. 13Идалайни гъейри, абур кӀвалах тийиз вердиш жезва ва абурук вахт файда авачиз акъудунин, кӀваляй кӀвализ финин, фитнеяр авунин, чарадан крара кьил тунин ва герек авачир гафар лугьунин хесет акатзава. 14Гьавиляй заз жегьил хендедаяр гъуьлуьз хъфена, абуру аялар хана, кӀвалин-йикъан къайгъуйрал алахъна ва душманриз кьулухъай чӀурукӀа рахадай багьна тагана кӀанзава, 15вучиз лагьайтӀа абур себеб яз бязи хендедайри чпин иман гадарнава ва иблисдин рехъ кьунва.

16 Иманийрин кӀватӀалди чпиз гьакъикъатда куьмек кӀанзавай хендедайрин къайгъу чӀугун патал, иман гвай папари чпин мукьва-кьили хендедайриз куьмекар гун лазим я. Къуй а хендедайрикай кӀватӀалдиз артухан пар тахьурай.

Иманийрин кӀватӀалдин чӀехибур

17Чпин кӀвалах хъсандиз ийизватӀа, иманийрин кӀватӀалдин кьилевайбур, иллаки вязер ийизвайбур ва чирвилер гузвайбур, кьве къат артухан гьуьрметдиз лайих я. 18Вучиз лагьайтӀа Каламда лугьузва: «Юг гатазвай яцран сив агалмир»#Киххьей Къанун 25:4. ва: «КӀвалахзавайдаз гьакъи гана кӀанда»#ЛукӀа 10:7.. 19Иманийрин кьилевайдак кутазвай тахсир, кьвед ва я пуд шагьид авачиз хьайитӀа, кьабулмир. 20Масадбурузни кичӀе хьун патал, гунагьар ийизвайбурун крар виридан вилик ачухдаказ винел акъуд.

21За Аллагьдин вилик, Иса Месигьдин вилик ва хкянавай малаикрин вилик вавай кьетӀидаказ тӀалабзава: и тагькимар кьиле твах ва абурал, гьакъикъат течиз ийизвай фикир къерех авуна ва садни муькуьбурулай артухди яз такьуна, амал ая.

22Кьилел кьве кап эцигна садни тадидаказ кӀватӀалдин чӀехиди яз тайинармир. Адан гунагьрин жаваб ви хиве гьат тавурай. Жув михьидаказ хуьх.

23За ваз неинки са яд хъун, гьакӀни, ви хуьрекдин кӀвал ва мукьвал-мукьвал жезвай ви кефияр тахьун себеб яз, са тӀимил чехирни хъухъ лугьузва.

24Бязи инсанрин гунагьар гьеле дуван тавунмаз виле акьада, амма масабурун гунагьар са кьадар геж чир жеда. 25И къайда хъсан краризни хас я: са бязи хъсан крар гьасятда аквада, муькуьбур геж ашкара жеда.

Currently Selected:

1-ТӀиматӀеяз 5: ЛезПК

Highlight

Copy