1-ТӀиматӀеяз 3
3
Кьиле акъвазнавайбурун ва шемасрин чка
1Дуьз лугьузва: инсанди иманийрин кьиле акъвазунихъ ялун тарифдай кар я. 2Кьиле акъваздайди са куьнайни тахсир кутаз тежедай кас хьун, герек, са папан гъуьл жен – сабурни акьул авай, дуьзвал гвай, мугьманар кӀандай, хъсан муаллим, 3хъивегьунал рикӀ алачирди, кикӀин тийидайди, амма инсанрихъ галаз рафтарвиле хъуьтуьлди, хкуькь тийидайди ва пул кӀан тийидайди хьун лазим я. 4Ада вичин хизан хъсандиз идара авун лазим я, адахъ аялар хьайитӀа, абур адан чӀалаз килигдайбур ва адаз гьуьрметдайбур хьун герек я. 5ГьикӀ лагьайтӀа, са нивай ятӀани вичин хизан кьиле тухуз тахьайтӀа, адавай Аллагьдин иманийрин кӀватӀалдин къайгъу чӀугваз гьикӀ хьурай? 6ЦӀийиз имандал атанвайдакай кьиле акъваздайди хьун герек туш: ахьтиндан кьама ял гьатун мумкин я, гьа чӀавуз адак иблисдик тахсир кутур саягъда тахсир кутада. 7Адаз туьгьметар татун патал ва ам иблисдин желедиз ават тавун патал адакай иман гвачирбурухъни хъсан фикир хьана кӀанда.
8Гьа ихьтин крар шемасризни талукь я: абур гьуьрмет авай, кьве мез авачир, хъивегьунал рикӀ алачир, темягькарвал квачир инсанар хьун лазим я. 9Абуру чаз гила ачух хьанвай имандин сирерал михьи намусдивди амал авуна кӀанда. 10Сифтени-сифте а ксарай кьил акъудна кӀанда. Абуруз акси яз рехне кутаз жедай хьтин са затӀни жагъун тавуртӀа, абуру шемасрин везифаяр кьиле тухурай.
11Папарни гьакӀ гьуьрмет хуьдайбур хьун лазим я, абуру фитнеяр авуна кӀандач, сабур гвайбур ва вири крара ихтибар алайбур хьана кӀанда.
12Шемасар тир кас са папан гъуьл хьун лазим я, ада вичин аялар ва кӀвалевайбур хъсандиз идара авуна кӀанда. 13Чпин везифаяр хъсандиз тамамарзавайбуру чпиз лайих дережа кьада ва абурувай Иса Месигьдихъ чпин имандикай чеб чпихъ кӀевелай агъунваз рахаз жеда.
14Мукьвара ви патав атуник за умуд кутазватӀани, и чар за ваз кхьизва. 15Зун эглеш жез хьайитӀани, гила ваз жув Аллагьдин кӀвале гьикӀ тухвана кӀандатӀа чизва; гьанаг – чан алай Аллагьдин кӀватӀал, гьакъикъатдин даях ва тестикьвал я. 16Чи имандин сир, са шакни алачиз, чӀехиди я:
Ам инсан яз атанай,
Руьгьди Ам гьахъ-михьивилиз акъуднай,
Ам акунай малаикриз,
Адакай хабарнай халкьарин арада,
Ам дуьньяда кьабулна иман яз,
Ам хкаж хъувунай баркалла алаз.
Currently Selected:
1-ТӀиматӀеяз 3: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
