1-Каринфвийриз 9

Иса Месигьдин илчи яз,

Павела вич масадбур патал муьтӀуьгъарун

1Зун азад тушни кьван? Зун илчи тушни бес? Заз чи Ребби Иса акуначни бес? Реббидин жигьетдай куьн арадиз атун зи кар тушни кьван? 2Масадбур патал зун илчи туштӀани, куьн паталди зун илчи я! Куьн Реббидихъ галаз хьун зи илчивал тестикь авун я.

3Зун айибзавайбуруз зи суалар ихьтинбур жеда. 4Чаз недайдини хъвадайди кьабулдай ихтияр авачни бес? 5Муькуь илчийри, Реббидин стхайри ва Кифади хьиз, жувахъ галаз имандаллай жуван пабни тухудай ихтияр чаз авачни кьван? 6Я тахьайтӀа жуваз недайди гъилиз гъун лазим тирбур анжах зунни Барнаба яни? 7Вичин аскервилин къуллугъдихъ галаз алакъада авай харжар гьи аскерди ийизва кьван? ЦипицӀбагъ кутуна, ахпа анай ципицӀар тинедайди вуж я? Нехир хуьз, адакай нек тахъвадайди вуж я? 8Ибур за анжах инсандиз хас кьатӀунрай лугьузвай гафар яни кьван? Къанундини гьадакай лугьузвачни бес? 9ГьикӀ лагьайтӀа, Мусадин Къанунда кхьенва: «Юг гатазвай яцран сив кӀевмир»#Киххьей Къанун 25:4.. Аллагьдин фикирда авайди яц яни? 10Им Ада чакай лугьузвачни мегер! Гьелбетда, чун паталди икӀ кхьенва: «Цан цазвайда цан цана кӀанда, юг гатазвайда юг гатана кӀанда ва гьарда бегьердикай вичин пай къачуда лагьана умудна кӀанда». 11Чна куь арадиз руьгьани тум вегьенватӀа, чна квелай агьвал галай бегьер къачуртӀа, им кьадардилай артухан кар жезвани кьван? 12Масадбуруз куь патай куьмек кӀан жедай ихтияр аватӀа, чаз гьабурулайни гзаф ихтияр ава.

ЯтӀани чна и ихтиярдикай менфят къачуначир, Месигьдин Шад Хабар чи патай са манийвални авачиз чукӀун патал, чун вири эхиз гьазур я. 13Ни Аллагьдин КӀвале ибадат ийизватӀа, гьадаз кьил хуьн патал лазим затӀар Аллагьдин КӀвале агакьзавайди квез чизвачни кьван? Ни къурбангандив ибадат ийизватӀа, гьадаз къурбанд авунвайдакай пай къвезвайди квез чизвачни кьван? 14Гьа икӀ Реббиди ни Шад Хабардикай муштулухар гузватӀа, адаз и кардай лазим затӀарни гурай лагьана эмирни авунва. 15Амма за и ихтияррикай садакайни менфят къачунач, гилани за куьне заз гьахьтин куьмек гун паталди кхьизвайди туш. Тариф квадарунилай заз кьейитӀа хъсан я. 16За Шад Хабардикай муштулухар гузва лугьуз дамахарзавач, им зи буржи я, за Шад Хабардикай муштулухар гун техъйиз хьайитӀа, заз жедайди гуж я! 17За и кар жува хкяна ийизвайди тиртӀа, завай и кардай къазанжини къачуз жедай, амма и кар за жуван буржи яз ийизва, вучиз лагьайтӀа и тапшуругъ заз Аллагьди ганва. 18Зи къазанжи куькай ибарат я? Ам адакай ибарат я хьи, Шад Хабардикай муштулухар гуз, за и кар гьакъи авачиз ийизва ва заз Шад Хабар гуникай за са менфятни къачузвач.

19Зун виридакай азад ятӀани, жезмай кьван гзаф инсанар Аллагьдихъ элкъуьрун патал за жувакай вирибурун лукӀ авунва. 20Чувудар желб авун патал, закай чувудар патал чувуд хьтинди хьана. Зун Къанундик квачирди ятӀани, Къанундик квайбур патал зун Къанундал амалзавайди яз хьана. 21Зун Месигьдин къанундик хьун себеб яз Аллагьдин къанундикай зун азад туштӀани, Къанун авачирбур Аллагьдихъ элкъуьрун патал закай абуруз Къанун авачир хьтинди хьана. 22Зайифбурни чӀалал гъидайвал, закай зайифбур патал зайифди хьанва. Гьич тахьайтӀа, са кьадар кьванбур хьайитӀани хиласун патал, закай вири патал вири хьана. 23И вири крар за Шад Хабардин хатурдай ва адан хийир-дуьаяр къачун патал ийизвайди я.

24Квез чизвачни кьван: звер авунин акъажунра иштиракзавайбур гзаф, амма гъалибдар сад жеда? Гьавиляй савкьват къачуз жедайвал звер ая. 25Гьар са иштиракзавайда акъажунриз гьазур жезвай чӀавуз вири затӀарилай гъил къачуда, икӀ ада пуч жедай таж къачун патал ийизва. Чун лагьайтӀа, пуч тежедай тажунихъ физ алахъзава. 26Гьавиляй за макьсад авачиз зверзавач ва гьава гъутарив язавач. 27Ваъ, масадбуруз Шад Хабардикай муштулухар гудай чӀавуз зун жуван дережадай вегьин тавун патал, за жуван беден лигимарзава ва за ам жуваз табий ийизва.

Currently Selected:

1-Каринфвийриз 9: ЛезПК

Highlight

Copy