1-Каринфвийриз 4

Илчийрин алахъунар

1Гьа икӀ, чун чпел Аллагьдин сирер ихтибарнавай Месигьдиз къуллугъзавайбур хьиз кьабул ая. 2Низ ихтибар ийизватӀа, абурувай вафа кӀанзава. 3Куьне ва я квекай са ни ятӀани закай вуч лугьузватӀани заз са къайгъуни авач. За жува жуваз къиметни гузвач. 4Зи намус михьи я, ятӀани им гьакъикъатда зун гьахъ-михьивилиз акъуднава лагьай чӀал туш. Зи дуванбег Ребби я. 5Гьавиляй Ребби хкведалди са куьнизни виликамаз къимет гумир. Ада вири чинебан крар винел акъудда ва инсанрин рикӀерин чинебан ниятар винел акъудда, гьа чӀавуз гьар садав Адан патай тариф агакьда.

6За и гафар, стхаяр-вахар, закайни АпӀаласакай куь хийир патал, куьне, чалай чешне къачуна, «Кхьенвайдалай артухан затӀни мийир» келимадин мана вуч ятӀа гъавурда акьун патал, куьне, сад муькуьбурулай виниз хкажна, са касдалди дамахар тавун патал лугьузва. 7Вун муькуьбурулай хъсан яз кьазвайди вуж я? Вахъ Аллагьдивай къачун тавунвай кьилди ви вуч ава? Ахьтин затӀ авачтӀа, бес вучиз вуна, ам авайди хьиз кьаз, дамахарзава?

8Квехъ гила «вири» ава, куьн гила «девлет авайбур» хьанва, квекай чун галачиз «пачагьар» хьанва лугьуз фикирзава. Пагь, кӀандай хьи заз, квекай рикӀивайни пачагьар хьанайтӀа ва чнани квехъ галаз пачагьвал ийиз хьанайтӀа! 9Вучиз лагьайтӀа заз акӀ я хьи, Аллагьди чун, илчияр, инсанрикай эхиримжибур хьиз, кьиникьин жазадиз акъуднавайбур хьиз, виридаз аквадайвал вилик кутунва. Чакай дуьнья патал, малаикар патал ва инсанар патал тамаша хьанва. 10Месигьдин хатурдай чун «ахмакьар» я, куьнни – Месигьдалди «камалэгьлияр» я! Чун «зайиф» я, квехъ – «къуват ава»! Куь тарифарзава, чун русвагьзава! 11Чал виликдай хьиз кашни къанихвал, партал тахьун ацалтзава, чаз гатунар кьазва, чаз уьмуьр тухудай чка авач, 12чна пеле гьекь аваз жуван гъилералди кӀвалахзава. Чун негь ийидай чӀавуз чна жаваб яз хийир-дуьа ийизва; чи геле къекъвезва, чна эхзава. 13Чакай фитне ийизва, чна хъсан гафар лугьуналди жаваб хгузва. Къенин йикъалди дуьнья патал чун зирзибил хьиз, гадарнавай амукьаяр-руквар хьиз я.

14За и гафар квез регъуь хьун патал кхьизвач, ваъ, заз квез, зи кӀани аялриз хьиз, акьул гуз кӀанзава. 15Квехъ Месигьдал амалзавай агъзурралди муаллимар аватӀани, квехъ бубаяр гзаф авач. Квез Шад Хабар гъуналди, Иса Месигьдихъ галаз алакъада авай куь уьмуьрда закай квез буба хьанай. 16Гьавиляй квез минет я: залай чешне къачу. 17И кар патал за куь патав ТӀиматӀей ракъурнава. Ам зи играми хва я, Ада вичини Реббидиз вафа хуьзва. Ада Иса Месигьдихъ галаз авай зи уьмуьрдин вири бинеяр куь рикӀел хкида. За абур виринра, гьар са кӀватӀалда авайбуруз чирзава.

18Зун куь патав хкведач лугьуз, квекай бязибурун кьама ял гьатнава. 19Амма мукьвара, Аллагьди гайитӀа, зун куь патав къведа, гьа чӀавуз заз а дамахар гвайбурун гафар ваъ, абурун къуват вуч ятӀа чир жеда. 20Вучиз лагьайтӀа Аллагьдин Пачагьлугъ гафуна ваъ, карда дуьздал акъатзава. 21Квез вуч кӀанзава – зун куь патав лаш гваз къведани ва я муьгьуьббат гваз, милайим руьгьда аваз къведани?

Currently Selected:

1-Каринфвийриз 4: ЛезПК

Highlight

Copy