MATEO 5
5
Ang Wali sa Bukid: Ang mga Kabulahanan
(Luc. 6:20-23)
1Sang ginatan-aw niya ang mga kadam-an, nagtaklad sia sa bukid, kag sang nakalingkod sia nagpalapit sa iya ang iya mga gintoton-an. 2Kag gintikab niya ang iya baba kag gintudloan sila, nga nagasiling:
3“Bulahan ang mga imol sa espiritu, kay ila ang ginharian sang langit.
4“Bulahan ang mga nagakasakit,#Isa. 61:2. kay sila lipayon.
5“Bulahan ang mga mapainubuson,#Sal. 37:11. kay sila magapanubli sang duta.
6“Bulahan ang mga ginagutum kag ginauhaw#Isa. 55:1-2. sang pagkamatarung, kay sila busgon.
7“Bulahan ang mga maloloy-on, kay sila makaagum sing kalooy.
8“Bulahan ang mga putli sing tagiposoon,#Sal. 24:4. kay sila makakita sa Dios.
9“Bulahan ang mga makigdaiton, kay sila tawgon nga mga anak sang Dios.
10“Bulahan ang mga ginahingabut bangud sa pagkamatarung,#1 Ped. 3:14. kay ila ang ginharian sang langit.
11“Bulahan kamo kon ang mga tawo magpasipala sa inyo kag maghingabut sa inyo kag maghambal sang tanan nga bagay sang kalautan batok sa inyo sing dimatuud bangud sa akon.#1 Ped. 4:14. 12Magkalipay kamo kag magkasadya, kay ang inyo balus daku sa langit, kay amo man ang paghingabut nila sang mga manalagna#2 Cron. 36:16; Binu. 7:52. nga nahauna sa inyo.
Ang Asin sa Duta
(Mar. 9:50; Luc. 14:34-35)
13“Kamo ang asin sang duta; apang kon ang asin magtab-ang, ano bala ang pagpaasin sini? Wala na ini sing pulus kondi nga ipilak sa gowa kag tapakon sang mga tawo.
Ang Kapawa sa Kalibutan
14“Kamo ang suga sang kalibutan.#Juan 8:12; 9:5. Ang banwa nga nahamtang sa ibabaw sang bakolod indi sarang malipdan. 15Wala man ang mga tawo nagasindi sing suga kag nagabutang sini sa idalum sang sulukban, kondi sa ibabaw sang tulungtungan,#Mar. 4:21; Luc. 8:16; 11:33. kag nagaiwag ini sa tanan nga yara sa balay. 16Sa amo nga bagay ig-iwag ninyo ang inyo kapawa sa atubangan sang mga tawo, agud nga makita nila ang inyo mga buhat nga maayo kag himayaon nila ang inyo Amay nga yara sa langit.#1 Ped. 2:12.
Ang Pagkabig ni Jesus sang Kasogoan
17“Dili kamo maghunahuna nga ako nagkari sa pagbungkag sang kasogoan kag sang mga manalagna; wala ako magkari sa pagbungkag kondi sa pagtuman. 18Kay sa pagkamatuud, nagasiling ako sa inyo, tubtub nga magtaliwan ang langit kag duta, indi nga mas-a mapataliwan sa kasogoan bisan isa ka kudlit, ukon isa ka tumbok, tubtub nga ang tanan matuman.#Luc. 16:17. 19Busa ang bisan sin-o nga maglalis sang isa sining mga sogo nga labing kubus kag magpanudlo sing subong sa mga tawo, tawgon sia nga labing kubus sa ginharian sang langit; apang ang bisan sin-o nga magtuman kag magpanudlo sini sia tawgon nga daku sa ginharian sang langit. 20Kay nagasiling ako sa inyo, nga kon ang inyo pagkamatarung indi maglabaw sa pagkamatarung sang mga escriba kag mga Fariseo, indi kamo nga mas-a makasulud sa ginharian sang langit.
Ang Pagkabig ni Jesus sang Kaakig
(Luc. 12:57-59)
21“Nabatian ninyo nga ginsiling sa mga dumaan, ‘Dili ka magpatay;#Ex. 20:13; Deut. 5:17. kag ang bisan sin-o nga makapatay may katalagman sa paghukom.’ 22Apang ako nagasiling sa inyo nga ang tagsatagsa nga nagapangakig sa iya utud [nga wala sing kabangdanan] may katalagman sa paghukom; ang bisan sin-o nga magsiling sa iya utud, ‘Banyaga!’ may katalagman sa corte, kag ang bisan sin-o nga magsiling, ‘Buang!’ may katalagman sa infierno nga kalayo. 23Gani kon nagadala ka sang imo dolot sa halaran, kag dira makadumdum ka nga ang imo utud may aligutgut sa imo, 24baya-i dira ang imo dolot sa atubangan sang halaran, kag lakat ka; pasag-uli anay sa imo utud, kag ugaling kari ka kag maghalad sang imo dolot. 25Pakig-abyan ka sing madali sa imo kasumpung, samtang nagaupud ka sa iya pa corte, basi kon itugyan ka sang imo kasumpung sa hukom, kag itugyan ka sang hukom sa bantay, kag isulud ka sa bilanggoan; 26sa pagkamatuud, nagasiling ako sa imo, indi ka makagowa didto tubtub nga imo mabayaran ang katapusan nga isa ka diotay.
Ang Pagkabig ni Jesus sang Pagpanglahi
27“Nabatian ninyo nga ginsiling, ‘Dili ka magpanglahi.’#Ex. 20:14; Deut. 5:18. 28Apang ako nagasiling sa inyo nga ang tagsatagsa nga nagatolok sa babayi sa pagkaibog sa iya nakapanglahi na sa iya sa tagiposoon niya. 29Kon ang imo mata nga too nagapasandad sa imo, lukata ini kag ihaboy; kay maayo pa sa imo nga ang isa ka bahin sang imo lawas mawala sang sa ihaboy ang bug-os mong lawas sa infierno.#Mat. 18:9; Mar. 9:47. 30Kag kon ang imo kamut nga too nagapasandad sa imo, utda ini, kag ihaboy; kay maayo pa sa imo nga ang isa ka bahin sang imo lawas mawala sang sa magkadto ang bug-os mong lawas sa infierno.#Mat. 18:8; Mar. 9:43.
Ang Pagkabig ni Jesus sang Pagbulagay
31“Ginsiling man, ‘Ang bisan sin-o nga magbulag sa iya asawa, maghatag sia sa iya sing kalig-onan sa pagbulagay.’#Deut. 24:1-4; Mat. 19:7; Mar. 10:4. 32Apang ako nagasiling sa inyo nga ang tagsatagsa nga nagabulag sa iya asawa, luwas sa kabangdanan sang pagpakighilawas, nagahimo sa iya nga makilahion; kag ang bisan sin-o nga magpangasawa sang binulagan nagapanglahi.#Mat. 19:19; Mar. 10:11-12; Luc. 16:18; 1 Cor. 7:10-11.
Ang Pagkabig ni Jesus sang mga Sumpa
33“Liwat nabatian ninyo nga ginsiling sa mga dumaan, ‘Dili ka magsumpa sing butig,#Lev. 19:12. kondi tumanon mo sa Ginoo ang imo ginsumpa.#Num. 30:2; Deut. 23:21.’ 34Apang ako nagasiling sa inyo, Dili gid kamo magsumpa,#Sant. 5:12. bisan tungud sa langit, kay amo ini ang trono sang Dios,#Isa. 66:1; Mat. 23:22. 35ukon tungud sa duta, kay amo ini ang palatungan sang iya mga tiil,#Isa. 66:1. ukon tungud sa Jerusalem, kay amo ini ang banwa sang dakung Hari.#Sal. 48:2. 36Kag dili ka magsumpa tungud sa imo olo, kay indi ka sarang makahimo sing bisan isa lamang ka bohok nga magputi ukon mag-itum. 37Kondi ang inyo pagpamolong mangin-amo ‘Hoo’ ukon ‘Indi’; kay ang bisan anong labi pa sini nagagikan sa malaut.
Ang Pagkabig ni Jesus sang Pagtimalus
(Luc. 6:27-31)
38“Nabatian ninyo nga ginsiling, ‘Mata sa mata kag ngipon sa ngipon.’#Ex. 21:24; Lev. 24:20; Deut. 19:21. 39Apang ako nagasiling sa inyo, Dili kamo magbatok sa malauton. Kondi kon ang bisan sin-o magtampa sa imo pisngi nga too, itaya man ang isa sa iya; 40kag kon ang bisan sin-o buut makigkasaba sa imo kag magkuha sang imo bayo, baya-i sa iya ang imo kunup man; 41kag kon ang bisan sin-o magpilit sa imo sa paglakat sing isa ka milya, updi sia sing duha. 42Hatagi ang nagapangayo sa imo, kag ang buut maghulam sa imo dili pagdumilii.
Ang Pagkabig ni Jesus sang mga Kaaway
(Luc. 6:32-36)
43“Nabatian ninyo nga ginsiling, ‘Higugmaa ang imo isigkatawo#Lev. 19:18. kag dumti ang imo kaaway.’ 44Apang ako nagasiling sa inyo, Higugmaa ang inyo mga kaaway kag pangamuyo kamo tungud sa mga nagahingabut sa inyo, 45agud nga mangin-anak kamo sang inyo Amay nga yara sa langit; kay nagapasubang sia sang iya adlaw sa mga malauton kag sa mga maayo, kag nagapaulan sa mga matarong kag sa mga di-matarung. 46Kay kon kamo maghigugma sa mga nagahigugma sa inyo, ano bala ang inyo balus? Wala bala nagahimo man sing subong ang mga manugsukot sang buhis? 47Kag kon kamo magbugno lamang sa inyo mga utud, ano bala ang ginahimo ninyo nga labi sa iban? Wala bala nagahimo sing subong ang mga Gentil? 48Busa, magpakahimpit kamo, subong nga himpit ang inyo langitnon nga Amay.#Deut. 18:13.
Currently Selected:
MATEO 5: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society