JOSUE 1
1
Mga Pag-aman nga sa Paggubat
1Sang patay na si Moises nga alagad sang Ginoo, ang Ginoo nagpamolong kay Josue nga anak ni Nun, alagad ni Moises, 2“Si Moises nga akon alagad napatay na; busa karon tindug, tabok ka sini nga Jordan, ikaw kag ining bug-os nga katawohan, pakadto sa duta nga ginahatag ko sa ila, sa katawohan sang Israel. 3Ang tagsa ka duug nga matapakan sang dapadapa sang imo tiil nahatag ko ini sa imo, sono sa napamolong ko kay Moises. 4Kutub sa kamingawan kag sini nga Libano tubtub gid sa daku nga suba, ang suba nga Eufrates, ang bug-os nga duta sang mga Hethanon kag tubtub sa daku nga dagat nayon sa katundan mangin-inyo dulunan. 5Wala sing tawo nga makasarang sa pagtindug sa atubangan mo#Deut. 11:24-25. sa tanan nga adlaw sang imo kabuhi; subong nga ako nag-upud kay Moises, sa amo magaupud ako sa imo; indi ako magpabaya sa imo ukon magbiya sa imo.#Deut. 31:6, 8; Heb. 13:5. 6Magpakabakud kag magpakaisug;#Deut. 31:6-7, 23. kay papanublion mo ini nga katawohan sang duta nga ginsumpa ko sa ila mga ginikanan nga ihatag sa ila. 7Lamang magpakabakud kag magpakaisug gid, sa pagbantay sa paghimo sono sa bug-os nga kasogoan nga ginsogo sa imo sang akon alagad nga si Moises; dili ka maglipas gikan sini sa too ukon sa wala, agud nga may maayo ka nga kauswagan sa bisan diin ka makadto. 8Ining tolon-an sang kasogoan indi magbulag sa imo baba, kondi magpamalandong ka sa iya sa adlaw kag gab-i, agud nga makabantay ka sa paghimo sono sa tanan nga nasulat sini; kay niyan mapabugana mo ang imo dalanon, kag niyan may maayo ka nga kauswagan. 9Wala bala ako magsogo sa imo? Magpakabakud kag magpakaisug; dili ka mahadluk, ukon mahangawa; kay ang Ginoo nga imo Dios nagaupud sa imo bisan diin ka makadto.”
10Niyan si Josue nagsogo sa mga manugdumala sang katawohan, 11“Mag-agi kamo sa tunga sang dologan, kag sogoa ang katawohan, ‘Aman kamo sing balon; kay sa sulud sang tatlo ka adlaw magatabok kamo sini nga Jordan, sa pagsulud sa pagtag-iya sang duta nga ginahatag sa inyo sang Ginoo nga inyo Dios sa pagtag-iya sini.’”
12Kag si Josue nagpamolong sa mga Rubenhon, sa mga Gadhanon, kag sa katunga nga kabikahan ni Manases, 13“Dumduma ang mga polong nga ginsogo sa inyo ni Moises nga alagad sang Ginoo, nga nagasiling, ‘Ang Ginoo nga inyo Dios naghatag sa inyo sing pahuway; kag magahatag sa inyo sini nga duta.’ 14Ang inyo mga asawa, ang inyo mga magamay, kag ang inyo kahayupan magapabilin sa duta nga ginhatag sa inyo ni Moises sa tabok sang Jordan; apang kamo nga nalupit sa hinganiban magatabok sing una sa inyo mga utud ang tanan nga gamhanan nga lalaki nga isganan, kag magabulig sa ila, 15tubtub nga ang Ginoo makahatag sing pahuway sa inyo mga utud subong sa inyo, kag sila man makatag-iya sang duta nga ginahatag sa ila sang Ginoo nga inyo Dios; niyan magabalik kamo sa duta nga inyo kaugalingon, kag panag-iyahan ini, nga ginhatag ni Moises nga alagad sang Ginoo sa inyo sa tabok sang Jordan nayon sa bulutlakan sang adlaw.”#Num. 32:28-32; Deut. 3:18-20; Jos. 22:1-6. 16Kag sila nagsabat kay Jose, “Ang tanan nga ginsogo mo sa amon, himoon namon kag bisan diin ginapadala mo kami magakadto kami. 17Subong nga nagpamati kami kay Moises sa tanan nga butang, sa amo magapamati kami sa imo; lamang mag-upud sa imo ang Ginoo nga imo Dios, subong nga nag-upud sia kay Moises! 18Ang bisan sin-o nga maglalis sa imo sogo kag indi magpamati sa imo mga polong, sa tanan nga ginasogo mo sa iya, patyon sia. Lamang magpakabakud kag magpakaisug.”
Currently Selected:
JOSUE 1: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society