JUAN 14
14
Si Jesus kag ang Amay
1“Dili malisang ang inyo mga tagiposoon; magtoo kamo sa Dios, magtoo man kamo sa akon. 2Sa balay sang akon Amay may madamung hulut; kon wala, makasugid bala ako sa inyo nga nagakadto ako sa pag-aman sa inyo sing duug? 3Kag kon ako makakadto kag makaaman sa inyo sing duug, magabalik ako kag dalhon ko kamo kaupud nakon, agud nga kon diin ako didto man kamo. 4Kag kon diin ako makadto nahibaloan ninyo ang dalan.” 5Si Tomas nagsiling sa iya, “Ginoo, wala kami makahibalo kon diin ka makadto; paano bala ang pagkahibalo namon sang dalan?” 6Si Jesus nagsiling sa iya, “Ako amo ang dalan, kag ang kamatooran, kag ang kabuhi; walay nagaabut sa Amay, kondi paagi sa akon. 7Kon nakakilala kamo sa akon, nakakilala kamo kuntani sa akon Amay man; kutub karon nakilala ninyo sia kag nakita sia.”
8Si Felipe nagsiling sa iya, “Ginoo, ipakita sa amon ang Amay, kag tuman na sa amon.” 9Si Jesus nagsiling sa iya, “Kadugay na sa akon kaupud ninyo, kag wala ka makakilala sa akon, Felipe? Ang nakakita sa akon nakakita sa Amay; paano nga nagasiling ka, ‘Ipakita sa amon ang Amay’? 10Wala ka bala nagatoo nga ako sa Amay kag ang Amay sa akon? Ang mga polong nga akon ginapamolong sa inyo wala ko ginapamolong gikan sa akon kaugalingon; kondi ang Amay nga nagapuyo sa akon nagahimo sang iya mga buhat. 11Magtoo kamo sa akon nga ako sa Amay kag ang Amay sa akon; ukon indi, magtoo kamo sa akon bangud sang mga buhat gid.
12“Sa pagkamatuud, sa pagkamatuud, nagasiling ako sa inyo, ang nagatoo sa akon magahimo man sia sang mga buhat nga ginahimo ko; kag magahimo sia sing dalagku pa sining mga buhat, bangud nga ako nagakadto sa Amay. 13Bisan ano ang pangayoon ninyo sa akon ngalan, ina himoon ko, agud nga ang Amay mahimaya sa Anak; 14kon magpangayo kamo sa akon sing bisan ano sa [akon] ngalan, ina himoon ko.
Ang Espiritu Santo Ginasaad
15“Kon nagahigugma kamo sa akon, magabantay kamo sang akon mga sogo. 16Kag ako magapangayo sa Amay, kag magahatag sia sa inyo sing isa pa ka Mananabang, agud nga mag-upud sia sa inyo sa gihapon, 17bisan ang Espiritu sang kamatooran, nga indi mabaton sang kalibutan, kay wala ini makakita sa iya ukon makakilala sa iya; nakilala ninyo sia, kay nagapabilin sia sa inyo, kag manginyara sia sa inyo.
18“Indi ko kamo pagbayaan nga mga ilo; magabalik ako sa inyo. 19Sa diotay pa nga tion, kag ang kalibutan indi na makakita sa akon, apang kamo makakita sa akon; bangud nga ako nagakabuhi, kamo magakabuhi man. 20Sa sadtong adlaw makahibalo kamo nga ako sa akon Amay, kag kamo sa akon, kag ako sa inyo. 21Ang nagahuput sang akon mga sogo kag nagatuman sa ila, sia amo ang nagahigugma sa akon; kag ang nagahigugma sa akon higugmaon sang akon Amay, kag ako magahigugma sa iya kag magapahayag sang akon kaugalingon sa iya.” 22Si Judas (indi ang Iscariote) nagsiling sa iya, “Ginoo, paano bala nga ikaw magapahayag sang imo kaugalingon sa amon, kag indi sa kalibutan?” 23Si Jesus nagsabat sa iya, “Kon ang tawo nagahigugma sa akon, magabantay sia sang akon polong, kag ang akon Amay magahigugma sa iya, kag kami magakara sa iya kag magapuyo kami kaupud niya. 24Ang wala nagahigugma sa akon wala nagabantay sang akon mga polong; kag ang polong nga inyo ginapamatian indi akon kondi iya sang Amay nga nagpadala sa akon.
25“Ining mga butang napamolong ko sa inyo, sang nagapabilin pa ako sa inyo. 26Apang ang Mananabang, ang Espiritu Santo, nga ipadala sang Amay sa akon ngalan, magatudlo sia sa inyo sang tanan nga butang, kag magapahanumdum sa inyo sang tanan nga akon ginsiling sa inyo. 27Ang paghidait ginabilin ko sa inyo; ang akon paghidait ginahatag ko sa inyo; indi subong sang paghatag sang kalibutan ang paghatag ko sa inyo. Dili malisang ang inyo mga tagiposoon, ukon mahadluk. 28Nakabati kamo kon paano nga nagsiling ako sa inyo, ‘Ako magalakat, kag magabalik ako sa inyo.’ Kon naghigugma kamo sa akon, nagkalipay kamo kuntani, bangud nga ako nagakadto sa Amay; kay ang Amay daku pa sa akon. 29Kag karon nasugid ko sa inyo sa wala pa mahanabu ini, agud nga kon ini mahanabu, magtoo kamo. 30Indi na ako magpakighambal sing madamu sa inyo, kay nagapakari ang manuggahum sang kalibutan. Wala sia sing gahum sa akon; 31apang agud nga makilala sang kalibutan nga ako nagahigugma sa Amay, ginahimo ko ang sono sa ginsogo sang Amay sa akon. Tindug kamo, mahalin kita diri.
Currently Selected:
JUAN 14: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society