HUKOM 6
6
Ang Pagtawag kay Gideon
1Ang katawohan sang Israel naghimo sang malaut sa itololok sang Ginoo; kag gintugyan sila sang Ginoo sa kamut sang Midian sing pito ka tuig. 2Kag ang kamut sang Midian naglandas batok sa Israel; kag bangud sang Midian ang katawohan sang Israel naghimo nga sa ila sing mga gikab sa mga bukid, kag sa mga lungib kag sa mga pamakud. 3Kay kon magsab-ug ang katawohan sang Israel nagtaklad ang mga Midianhon kag ang mga Amalecnon kag ang katawohan sang Sidlangan nagtaklad sila batok sa ila; 4nagpahamtang sila sing dologan batok sa ila kag ginlaglag ang patubas sang duta, tubtub nga maglambut ka sa Gaza, kag wala magbilin sing pangabuhian sa Israel, bisan carnero ukon baka ukon asno. 5Kay nagtaklad sila pati ang ila kahayupan kag ang ila mga layanglayang, nag-abut sila nga madamu subong sang mga apan; sila kag ang ila mga camelyo indi maisip; kag nag-abut sila sa duta sa paglaglag sini. 6Kag ang Israel nag-ipoipo bangud sang Midian; kag ang katawohan sang Israel nagtuaw sa Ginoo.
7Sang nagtuaw ang katawohan sang Israel sang Ginoo bangud sang Midian, 8ang Ginoo nagpadala sing manalagna sa katawohan sang Israel; kag nagsiling sia sa ila, “Amo ini ang ginasiling sang Ginoo, ang Dios sang Israel: ‘Ako nagpataklad sa inyo gikan sa Egipto, kag ginpagowa ko kamo sa balay sang kahiolipnan; 9kag ako nagluwas sa inyo sa kamut sang mga Egiptohanon, kag sa kamut sang tanan nga nagpigus sa inyo, kag gintabog sila gikan sa atubangan ninyo, kag ginhatag sa inyo ang ila kuta; 10kag nagsiling ako sa inyo, ‘Ako amo ang Ginoo nga inyo Dios; dili kamo magkahadluk sa mga dios sang mga Amornon, nga sa ila duta nagapuyo kamo.’ Apang wala kamo magpamati sa akon tingug.”
11Karon nag-abut ang manugtunda sang Ginoo kag naglingkod sa idalum sang terebinto nga yara sa Ofra, nga naigo kay Joas nga Abiezernon, kag ang iya anak nga si Gideon nagawaswas sang trigo sa linasan sang uvas, sa pagtago sini sa mga Midianhon. 12Kag ang manugtunda sang Ginoo nagpahayag sa iya kag nagsiling sa iya, “Ang Ginoo nagaupud sa imo, ikaw nga isganan nga lalaki.” 13Kag si Gideon nagsiling sa iya, “O ginoo, kon ang Ginoo nagaupud sa amon, ngaa bala niyan nahanabu ini tanan sa amon? Kag diin na bala ang tanan niya nga kalatingalahan nga mga binuhatan nga ginsugid sa amon sang amon mga ginikanan, nga nagasiling, ‘Wala bala kami pagpataklara sang Ginoo gikan sa Egipto?’ Apang karon ginsikway kami sang Ginoo kag gintugyan kami sa kamut sang Midian.” 14Kag gintolok sia sang Ginoo kag nagsiling, “Lakat sa sini nga imo kusug kag luwasa ang Israel sa kamut sang Midian; wala ko bala ikaw pag-ipadala?” 15Kag nagsiling sia sa iya, “O Ginoo, paano bala nga pagluwas ko sang Israel? Yari karon, ang akon panimalay amo ang labi gid kaimol sa Manases, kag ako amo ang kubus gid sa panimalay sang akon amay.” 16Kag ang Ginoo nagsiling sa iya, “Apang ako magaupud sa imo, kag laglagon mo ang mga Midianhon subong sang isa ka tawo.” 17Kag nagsiling sia sa iya, “Kon karon nakapahamuut ako sa imo itololok, niyan pakitai ako sing tanda nga amo ikaw ang nagapakighambal sa akon. 18Ginaampo ko sa imo, indi ka maghalin diri tubtub nga ako magbalik sa imo, kag magdala sang akon dolot, kag magbutang sini sa atubangan mo.” Kag sia nagsiling, “Ako magahulat tubtub nga magbalik ka.”
19Gani nagsulud si Gideon kag naghiwat sing tinday nga kanding, kag kalan-onon nga wala sing tapay nga isa ka efa nga harina; ang pataw ginbutang niya sa alat, kag ginbutang niya ang sabaw sa kolon, kag gindala ini sa iya sa idalum sang terebinto kag gindolot ini. 20Kag ang manugtunda sang Dios nagsiling sa iya, “Kuhaa ang pataw kag ang mga kalan-onon nga wala sing tapay, kag itungtung sila sa sini nga igang, kag boboan sang sabaw.” Kag ginhimo niya ang amo. 21Niyan ang manugtunda sang Ginoo nagbayaw sang ukbung sang sungkud nga yara sa iya kamut, kag nagtandug sang pataw kag sang mga kalan-onon nga wala sing tapay; kag may naggowa nga kalayo gikan sa igang kag naglamon sang pataw kag kalan-onon nga wala sing tapay; kag ang manugtunda sang Ginoo nadula sa iya itololok. 22Niyan nakita ni Gideon nga sia manugtunda sang Ginoo; kag si Gideon nagsiling, “Kailo, O Ginoong Dios! Kay karon nakita ko ang manugtunda sang Ginoo sa nawung kag nawung.” 23Apang ang Ginoo nagsiling sa iya, “Ang paghidait manginsa imo; dili ka magkahadluk, dili ka mapatay.” 24Niyan nagtukud didto si Gideon sing halaran sa Ginoo, kag ginhingalanan ini, Ang Ginoo paghidait. Tubtub sini nga adlaw yara pa ini sa Ofra, sang mga Abiezernon.
25Sa amo nga gab-i nagsiling sa iya ang Ginoo, “Kuhaa ang lalaki nga baka nga iya sang imo amay, ang ikaduha nga baka nga pito ka tuig, kag lumpaga ang halaran ni Baal nga iya sang imo amay, kag pudla ang Ashera nga yara sa luyo niya; 26kag tukud ka sing halaran sa Ginoo nga imo Dios sa putokputokan sini nga pamakud, sa nagakaigo nga bagay; niyan kuhaa ang ikaduha nga baka nga lalaki, kag magdolot sing halad-nga-sinonog upud sang kahoy sang Ashera nga imo pudlon.” 27Gani si Gideon nagkuha sing napulo ka lalaki sa iya mga sologoon, kag naghimo sono sa napamolong sang Ginoo sa iya; apang bangud nga nahadluk sia sa panimalay sang iya amay kag sa mga tawo sang banwa sa bagay nga indi makahimo sini sa adlaw, ginhimo niya ini sa gab-i.
28Sang pagkabangon sang mga tawo sang banwa sa kaagahon, yari karon, ang halaran ni Baal nalumpag na, kag napulud na ang Ashera nga yara sa luyo niya, kag nahalad ang ikaduha nga baka nga lalaki sa ibabaw sang halaran nga gintukud. 29Kag nagsilingay sila, “Sin-o bala ang naghimo sini?” Kag sang nagpakiana sila kag namangkot, nagsiling sila, “Si Gideon nga anak ni Joas ang naghimo sini nga butang.” 30Niyan ang mga tawo sang banwa nagsiling kay Joas, “Pagowaa ang imo anak, agud nga mapatay sia, bangud nga ginlumpag niya ang halaran ni Baal kag bangud nga ginpulud niya ang Ashera nga yara sa luyo sini.” 31Apang si Joas nagsiling sa tanan nga nagatindug batok sa iya, “Magapakigsumpung bala kamo tungud kay Baal? Ukon magaluwas bala kamo sa iya? Ang magpakigsumpung tungud sa iya patyon sia sa aga pa. Kon dios sia, magpakigsumpung sia tungud sa iya kaugalingon, bangud nga ang isa naglumpag sang iya halaran.” 32Busa sa sadto nga adlaw gintawag niya si Gideon Jerubbaal, nga nagasiling, “Magpakigsumpung si Baal sa iya,” bangud nga ginlumpag niya ang iya halaran.
33Niyan ang tanan nga Midianhon kag ang mga Amalecnon kag ang katawohan sang Sidlangan nagtipon sila sing tingub, kag nagtabok sila kag nagpahamtang sing dologan sa Nalupyakan sang Jezreel. 34Apang ang Espiritu sang Ginoo nag-abut kay Gideon; kag nagpatonog sia sing budyong, kag ang Abiezer nagtipon sing tingub sa olihi niya. 35Kag nagpadala sia sing mga manugbalita sa bug-os nga Manases; kag sila man nagtipon sing tingub sa olihi niya. Kag nagpadala sia sing mga manugbalita sa Aser, sa Zabulon, kag sa Neftali; kag sila nagtaklad sa pagsugata sa ila.
36Niyan si Gideon nagsiling sa Dios, “Kon buut ka magluwas sang Israel tungud sa akon kamut, sono sa napamolong mo, 37yari karon, ako magabutang sing panit nga may bulbul sa linasan; kon may ton-og sa panit lamang, kag mamala ang bug-os nga duta, niyan makahibalo ako nga buut mo luwason ang Israel tungud sa akon kamut, sono sa napamolong mo.” 38Kag nahanabu sing subong. Sang nagbangon sia sing aga pa kag ginpuga ang panit, ginlubag nga nagtubud ang ton-og gikan sa panit isa ka yahong nga puno sang tubig. 39Niyan si Gideon nagsiling sa Dios, “Indi magdabdab ang imo kaakig batok sa akon, kag magapamolong ako sini nga makaisa lamang; ginaampo ko, patilawa ako sini nga makaisa lamang sa panit; magmamala karon sa panit lamang, kag may ton-og sa ibabaw sang bug-os nga duta.” 40Kag sa sadto nga gab-i ginhimo sang Dios ang subong; kay mamala sa panit lamang, kag sa bug-os nga duta may ton-og.
Currently Selected:
HUKOM 6: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society