Exodo 14
14
Ang Pagtabok sa Mapula nga Dagat
1Dayon ang Ginoo nagsiling kay Moises, 2“Singgana ang mga Israelinhon sa pagbalik kag magpatindog sang ila kampo sa atubang sang Pi-hahirot, sa gintung-an sang Migdol kag sang Mapula nga Dagat, malapit sa Baal-zepon. Dira kamo magpatindog sang inyo mga tolda sa ubay sang dagat. 3Magahunahuna ang hari nga ang mga Israelinhon nagadalangdalang palibot sa duta kag indi makagwa sa desierto. 4Patig-ahon ko ang tagipusoon sang hari, kag pagalagson niya kamo kag ang akon pagdaog sa hari kag sa iya mga hangaway magahatag sa akon sing kadungganan. Dayon ang mga Ehiptohanon magakilala nga ako amo ang Ginoo.” Ang mga Israelinhon naghimo suno sa ginsiling sa ila.
5Sang masugiran ang hari sang Ehipto, nga ang mga Israelinhon nagpalagyo, sia kag ang iya mga opisyales nagbaylo sang ila mga hunahuna kag nagsiling, “Ano man ining aton ginhimo? Ngaa gintugotan naton ining mga Israelinhon nga magpalagyo kag indi na mag-alagad sa aton?” 6Gin-aman sang hari ang iya karwahi sa inaway kag ang iya mga hangaway. 7Gindala niya ang tanan nga karwahi lakip na ang 600 ka labing maayo nga karwahi nga may mga opisyales nga nagaupod sa ila tanan. 8Ginpatig-a sang Ginoo ang tagipusoon sang hari kag ginlagas niya ang mga Israelinhon nga naglakat nga madinalag-on.#14:8 naglakat nga madinalag-on: ukonsa idalom sang pag-apin sang Ginoo. 9Ang mga Ehiptohanon—upod sa ila tanan nga mga kabayo, mga karwahi sang hari, mga soldado nga nagasakay sa karwahi, kag mga hangaway—naglagas sa ila kag nalambot sila sa ila kampo sa higad sang Mapula nga Dagat malapit sa Pi-hahirot kag sa Baal-zepon.
10Sang nagahinampot ang hari, nakita sang mga Israelinhon ang mga Ehiptohanon nga nagapadulong sa ila. Hinadlukan gid sila kag nagsinggit sa Ginoo sa pagpangayo sang tabang. 11Nagsiling sila kay Moises, “Gindala mo bala kami diri sa desierto agod mapatay bangod kay wala sing lulobngan sa Ehipto? Tan-awa bala kon ano ang ginhimo mo sa pagpagwa sa amon sa Ehipto! 12Indi bala nga nagsiling kami sang una sang wala pa kami makahalin nga amo gid ini ang matabo? Nagsiling kami, ‘Pabay-i lang kami, nga magpaulipon sa mga Ehiptohanon.’ Mas maayo pa nga magpaulipon kami sang sa mapatay kami diri sa desierto.”
13Nagsabat si Moises sa mga tawo, “Indi kamo magkahadlok! Magpakalig-on kamo, kag tan-awa ninyo kon ano ang himuon sang Ginoo sa pagluwas sa inyo karon nga adlaw, ang mga Ehiptohanon nga inyo makita karon indi na gid ninyo makita liwat. 14Ang Ginoo ang magapakig-away para sa inyo, kag magpahimuyong lang kamo.”
15Ang Ginoo nagsiling kay Moises, “Ngaa bala nagapanawag ka sa akon sa pagpangayo sang bulig? Singgana ang mga Israelinhon nga magpadayon sila sa paglakat. 16Ibayaw ang imo sungkod, kag untaya ang imo kamot sa ibabaw sang dagat sa pagpihak sini, agod nga ang mga Israelinhon makatabok sa dagat nga nagaagi sa mamala nga duta. 17Patig-ahon ko ang mga tagipusoon sang mga Ehiptohanon agod lagson nila ang mga Israelinhon, kag ang akon pagdaog sa hari, sa tanan niya nga mga hangaway, sa iya mga karwahi, kag sa iya mga soldado nga nagasakay sa kabayo magapasidungog sa akon. 18Ang mga Ehiptohanon magakilala nga ako amo ang Ginoo, kon magdaog ako sa ila.”
19Ang anghel sang Dios, nga nagauna sa mga hangaway sang Israel, nagsaylo sa ulihi nila. Ang haligi nga panganod nga nagauna sa ila nagsaylo man kag nagpabilin sa ulihi nila. 20Nag-ulot ini sa mga hangaway sang mga Ehiptohanon kag sa mga hangaway sang mga Israelinhon. Ang panganod nanginkadudulman para sa mga Ehiptohanon pero naghatag sang kasanag sa mga Israelinhon kag gani nagligad ang gab-i, kag ang mga hangaway sang mga Israelinhon kag sang mga Ehiptohanon indi makapalapit sa isa kag isa sa bug-os nga gab-i.
21Gin-untay ni Moises ang iya kamot sa ibabaw sang dagat kag ang Ginoo nagpahawa sang tubig paagi sa mabaskog nga paghuyop sang salatan sa bug-os nga gab-i, kag ang dagat nanginmamala nga duta. Ang dagat napihak, 22kag#1 Cor. 10:1-2; Heb. 11:29. ang mga Israelinhon nag-agi sa mamala nga duta, nga ang tubig nahimo nga daw pader sa ila wala kag sa ila tuo. 23Ang mga Ehiptohanon—upod ang tanan nga mga kabayo sang hari, ang iya mga karwahi, kag ang iya mga soldado nga nagasakay sa kabayo naglagas sa ila nga nag-agi sa tunga sang dagat nga napihak. 24Sang kaagahon ang Ginoo nga yara sa haligi nga kalayo kag panganod, nagtulok sa mga hangaway sang mga Ehiptohanon kag nagpasalangisag sa ila. 25Ginpauntat niya ang pagtiyog sang mga kariton sang ila mga karwahi, sa bagay nga ginbudlayan gid sila sa pagpalakat, kag ang mga Ehiptohanon nagsiling, “Malagyo kita sa mga Israelinhon, kay ang Ginoo nagapakig-away para sa ila batok sa aton!”
26Ang Ginoo nagsiling kay Moises, “Untaya ang imo kamot sa ibabaw sang dagat, kag ang tubig magauli sa mga Ehiptohanon kag sa ila mga karwahi kag sa ila mga soldado nga nagasakay sa kabayo.” 27Gani gin-untay ni Moises ang iya kamot sa ibabaw sang dagat, kag sang pagkaaga ang tubig nagbalik sa iya kinaandan nga lugar. Ang mga Ehiptohanon nagtinguha sa pagpalagyo halin sa tubig, pero ang Ginoo nagtagbong sa ila sa tunga sang dagat. 28Nag-uli ang tubig kag nagtabon sang mga karwahi, sang mga soldado nga nagasakay sa kabayo, kag sang tanan nga mga hangaway sang hari nga naglagas sa ila sa dagat, kag wala gid sing isa nga nabilin sa ila. 29Pero ang mga Israelinhon naglakat sa mamala nga duta sa tunga sang dagat nga ang tubig nahimo nga daw mga pader sa tuo kag sa wala nila.
30Sa sadto nga adlaw, ang Ginoo nagluwas sang mga Israelinhon sa mga Ehiptohanon, kag nakita sang mga Israelinhon ang mga bangkay sang mga Ehiptohanon nga nagahalal-id sa baybayon. 31Sang makita sing mga Israelinhon ang daku nga gahom sang Ginoo nga iya gindaog ang mga Ehiptohanon, nagkahadlok sila sa Ginoo. Nagtuo sila sa Ginoo kag sa iya alagad nga si Moises.
Currently Selected:
Exodo 14: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
Exodo 14
14
Ang Pagtabok sa Mapula nga Dagat
1Dayon ang Ginoo nagsiling kay Moises, 2“Singgana ang mga Israelinhon sa pagbalik kag magpatindog sang ila kampo sa atubang sang Pi-hahirot, sa gintung-an sang Migdol kag sang Mapula nga Dagat, malapit sa Baal-zepon. Dira kamo magpatindog sang inyo mga tolda sa ubay sang dagat. 3Magahunahuna ang hari nga ang mga Israelinhon nagadalangdalang palibot sa duta kag indi makagwa sa desierto. 4Patig-ahon ko ang tagipusoon sang hari, kag pagalagson niya kamo kag ang akon pagdaog sa hari kag sa iya mga hangaway magahatag sa akon sing kadungganan. Dayon ang mga Ehiptohanon magakilala nga ako amo ang Ginoo.” Ang mga Israelinhon naghimo suno sa ginsiling sa ila.
5Sang masugiran ang hari sang Ehipto, nga ang mga Israelinhon nagpalagyo, sia kag ang iya mga opisyales nagbaylo sang ila mga hunahuna kag nagsiling, “Ano man ining aton ginhimo? Ngaa gintugotan naton ining mga Israelinhon nga magpalagyo kag indi na mag-alagad sa aton?” 6Gin-aman sang hari ang iya karwahi sa inaway kag ang iya mga hangaway. 7Gindala niya ang tanan nga karwahi lakip na ang 600 ka labing maayo nga karwahi nga may mga opisyales nga nagaupod sa ila tanan. 8Ginpatig-a sang Ginoo ang tagipusoon sang hari kag ginlagas niya ang mga Israelinhon nga naglakat nga madinalag-on.#14:8 naglakat nga madinalag-on: ukonsa idalom sang pag-apin sang Ginoo. 9Ang mga Ehiptohanon—upod sa ila tanan nga mga kabayo, mga karwahi sang hari, mga soldado nga nagasakay sa karwahi, kag mga hangaway—naglagas sa ila kag nalambot sila sa ila kampo sa higad sang Mapula nga Dagat malapit sa Pi-hahirot kag sa Baal-zepon.
10Sang nagahinampot ang hari, nakita sang mga Israelinhon ang mga Ehiptohanon nga nagapadulong sa ila. Hinadlukan gid sila kag nagsinggit sa Ginoo sa pagpangayo sang tabang. 11Nagsiling sila kay Moises, “Gindala mo bala kami diri sa desierto agod mapatay bangod kay wala sing lulobngan sa Ehipto? Tan-awa bala kon ano ang ginhimo mo sa pagpagwa sa amon sa Ehipto! 12Indi bala nga nagsiling kami sang una sang wala pa kami makahalin nga amo gid ini ang matabo? Nagsiling kami, ‘Pabay-i lang kami, nga magpaulipon sa mga Ehiptohanon.’ Mas maayo pa nga magpaulipon kami sang sa mapatay kami diri sa desierto.”
13Nagsabat si Moises sa mga tawo, “Indi kamo magkahadlok! Magpakalig-on kamo, kag tan-awa ninyo kon ano ang himuon sang Ginoo sa pagluwas sa inyo karon nga adlaw, ang mga Ehiptohanon nga inyo makita karon indi na gid ninyo makita liwat. 14Ang Ginoo ang magapakig-away para sa inyo, kag magpahimuyong lang kamo.”
15Ang Ginoo nagsiling kay Moises, “Ngaa bala nagapanawag ka sa akon sa pagpangayo sang bulig? Singgana ang mga Israelinhon nga magpadayon sila sa paglakat. 16Ibayaw ang imo sungkod, kag untaya ang imo kamot sa ibabaw sang dagat sa pagpihak sini, agod nga ang mga Israelinhon makatabok sa dagat nga nagaagi sa mamala nga duta. 17Patig-ahon ko ang mga tagipusoon sang mga Ehiptohanon agod lagson nila ang mga Israelinhon, kag ang akon pagdaog sa hari, sa tanan niya nga mga hangaway, sa iya mga karwahi, kag sa iya mga soldado nga nagasakay sa kabayo magapasidungog sa akon. 18Ang mga Ehiptohanon magakilala nga ako amo ang Ginoo, kon magdaog ako sa ila.”
19Ang anghel sang Dios, nga nagauna sa mga hangaway sang Israel, nagsaylo sa ulihi nila. Ang haligi nga panganod nga nagauna sa ila nagsaylo man kag nagpabilin sa ulihi nila. 20Nag-ulot ini sa mga hangaway sang mga Ehiptohanon kag sa mga hangaway sang mga Israelinhon. Ang panganod nanginkadudulman para sa mga Ehiptohanon pero naghatag sang kasanag sa mga Israelinhon kag gani nagligad ang gab-i, kag ang mga hangaway sang mga Israelinhon kag sang mga Ehiptohanon indi makapalapit sa isa kag isa sa bug-os nga gab-i.
21Gin-untay ni Moises ang iya kamot sa ibabaw sang dagat kag ang Ginoo nagpahawa sang tubig paagi sa mabaskog nga paghuyop sang salatan sa bug-os nga gab-i, kag ang dagat nanginmamala nga duta. Ang dagat napihak, 22kag#1 Cor. 10:1-2; Heb. 11:29. ang mga Israelinhon nag-agi sa mamala nga duta, nga ang tubig nahimo nga daw pader sa ila wala kag sa ila tuo. 23Ang mga Ehiptohanon—upod ang tanan nga mga kabayo sang hari, ang iya mga karwahi, kag ang iya mga soldado nga nagasakay sa kabayo naglagas sa ila nga nag-agi sa tunga sang dagat nga napihak. 24Sang kaagahon ang Ginoo nga yara sa haligi nga kalayo kag panganod, nagtulok sa mga hangaway sang mga Ehiptohanon kag nagpasalangisag sa ila. 25Ginpauntat niya ang pagtiyog sang mga kariton sang ila mga karwahi, sa bagay nga ginbudlayan gid sila sa pagpalakat, kag ang mga Ehiptohanon nagsiling, “Malagyo kita sa mga Israelinhon, kay ang Ginoo nagapakig-away para sa ila batok sa aton!”
26Ang Ginoo nagsiling kay Moises, “Untaya ang imo kamot sa ibabaw sang dagat, kag ang tubig magauli sa mga Ehiptohanon kag sa ila mga karwahi kag sa ila mga soldado nga nagasakay sa kabayo.” 27Gani gin-untay ni Moises ang iya kamot sa ibabaw sang dagat, kag sang pagkaaga ang tubig nagbalik sa iya kinaandan nga lugar. Ang mga Ehiptohanon nagtinguha sa pagpalagyo halin sa tubig, pero ang Ginoo nagtagbong sa ila sa tunga sang dagat. 28Nag-uli ang tubig kag nagtabon sang mga karwahi, sang mga soldado nga nagasakay sa kabayo, kag sang tanan nga mga hangaway sang hari nga naglagas sa ila sa dagat, kag wala gid sing isa nga nabilin sa ila. 29Pero ang mga Israelinhon naglakat sa mamala nga duta sa tunga sang dagat nga ang tubig nahimo nga daw mga pader sa tuo kag sa wala nila.
30Sa sadto nga adlaw, ang Ginoo nagluwas sang mga Israelinhon sa mga Ehiptohanon, kag nakita sang mga Israelinhon ang mga bangkay sang mga Ehiptohanon nga nagahalal-id sa baybayon. 31Sang makita sing mga Israelinhon ang daku nga gahom sang Ginoo nga iya gindaog ang mga Ehiptohanon, nagkahadlok sila sa Ginoo. Nagtuo sila sa Ginoo kag sa iya alagad nga si Moises.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012